Miara nokon bake iki
2
¿Jaweakiki ikon Dios onanma jonibo saa ikanai?¿Jawekopíki shinankoxonmabi jaskara atibo akanai?
2 Nato mainmea apobo, itan jato ikinnai joni koshibora rabetax,
jaton Iboki, itan ja katota apoki yoitimai sinákanai,
3 neskatibora sai ikanai:
“¡Jawen cadenabaon noa nexaabo chorokaanon akanwe!
¡Noa jan nexaabo xabakaanon akanwe!”
4 Ja Ibo, naikan apo ixon jato ikinnatonra,
jato osannai;
5 japekáora sináxon, jato rateai;
kikinbiresi sináxonra jato yoiai:
6 “Siónhainoa nokon apo itira, en moa imake,
jara ea jain iká nokon manan iki”.
7 Ja Ibon jaskara ati shinannara en mato yoiai:
Janra ea yoia iki: “Miara nokon bake iki;
ramara ea min Papa iki.
8 Ea yokáwe, jatianra papan bake ixon bitibo maibotiibi iká jonibo en mia meniti iki,
nato nete senenainko kamanbira,
jatíbi mina iki.
9 Ja min yami kekotininra,
apobo min jato xatepaketi iki.
¡Mapó kentíbo toeai keskákinra min jato besheati iki!” akin.
10 Apobo, itan nato mainmea jato
ikinnai koshibó, neskara onanshamankanwe,
¡Ja en mato onanmai kikinnishaman axekanwe!
11 Kikin iketian jaki rakéanan Ibo rabikanwe;
saki iananbi já bebon beokanwe,
12 mato iamaketianra, ja bain kaaitian sináxon mato mawámanake,
maton ayamaara Ibo ishtonbires kikinni sinatai.
¡Jan koiranon ixon jaki chipóti benaibora, raroshamares ikanti iki!