2 jabé ikábo bebonmeax itan Samaria sontárobo bebonmeaxa neskata iki: “¿Jaweki nato onitsapi judíobaon shinannai? ¿Jatonmein shinannai nenonxon jakiribi Dios yoina menoxonti? ¿Westíora netebi tee keyotimein shinankanai? ¿Ja manish tsama menotainoa bená makanbo bitimein shinankanai?” iki.

3 Jatian já patax itina ja amonita joni Tobías ishokoa iki neskati: “Ja chiké akanaipari oinkanta, ¡Westíora maxó awinmanbira jain neexon poxati atipanke!” iki.

4 Jatianra en orana iki: “Non Diossé: Ja noki shiroi jaskákanai ninkawe. Jabo noki shiroai keskáakin wetsabo jato amawe, jaton rawí jato bebon koshi ixon, yatanxon wetsa main jato botankanon ixon jato amawe.

5 Jakonma akana iketian jato shinanxonreswe, jaton ochan shinanbenoyamawe, jakiribi chiketi teetaibokira jakonmai shirokanke”, akin.

6 Ja chiké akinra non chibanresa iki, naponbekon senenra jawen keyá moa non aká iká iki. Ja teetai jonibora kikin rayáshamanbo ikana iki.

7 Ikaxbi ja Sambalat, Tobías, árabe jonibo, Amón jonibo, jainoax Asdod jemamea jonibora, jaskáakin ja Jerusalén chiké ras ika kinibo jakiribi non xépokin peoketian onanax, noki kikinbiresi sinákana iki,

8 jatianra jatikaxbi tsinkixon shinankana iki, ja Jerusalénhain teetaibo betan reteananti, jaskáaxon moa shinan tsokasmaxon noa tee jenemati shinannax.

9 Jatianra noa akinnon ixon non Dios orana iki, jaskáaxonra noa akannaketian, netenyabi yamé jabaon noa koiranti jonibo non imaa iki.

10 Ikaxbi Judá jonibo neskati yoyo ikana iki: “Non koshira moa yamake, ja chiké ras ika potatira ichabires iki, nato chiké jakiribi benáatira moa non atipanyamake” iki.

11 Jatian non rawíbaonbiribi shinanna iki, ja noa ikain weixon noa retexon, non akai tee moa ayamanon ixon noa bechitei bekanaibi non ointima.

12 Ikaxbi jatiribi jato ochoma jaa judíobaonra, basimabo joxon noa yoikana iki, ja jonibaon jatíbioxon noa akí bekanaibo.

13 Jaskara ikenra en jato yoia iki, ja rarebobires bianananax ja chiké ras iká pekáobo iti, ja chiké keyáma ikainbo iti, itan ja chiké ras iká kininkobo iti, jaton espadayabo, jaton wanin kenshoyabo, jaton pia itan kanótiabo ikanti.

14 Jatianra rakékanai oinxon, ja kikin jonibo itan jato ikinna joni koshibo, jainoax wetsa joniboribi en jato yoia iki: “Jatoki rakéyamakanwe. Shinankanwe, Ibora ani koshi iki, itan onsá iki, jaskara iketian maton kaibobo kopí, maton bake benbobo betan maton bake ainbobo kopí, maton awinbo betan maton xobobo kopí reteanankanwe”, akin.

15 Jatian ja non rawíbaon moa noa benxokaatabo onankanketian, itan Diossenbi jaskáaxon noa ati shinanabo jato ras akanana onankanketianra, ja chiké tee akí jatikaxbi noa boribakana iki, noa westíorabora non apachoai tee non aríbakana iki.

16 Ja netera naponbekon senen jatí icharibi nokon joni teeti peokookana iki, jatian jatí icharibi ikana iki jan reteananti tsomayabo, wanín kenshoyabo, yami panatiabo, pia itan kanótiabo, jainoax yami xopanantiabo. Jainnoa joni koshibaonra jatíbinin ja Judá jonibo akinkana iki,

17 ja jakiribi benaakin chiké akí teetaibo. Jan chiké ati jawéki papiaibaonra jeneyamakin bereskana iki, ikaxbira iresshamakana iki, wetsaorikea mekenman tee ayananbira, benkex mekenman jaton jan reteananti tsomayabo ikana iki.

18 Jatíbi ja chiké akí teetaibora jaton cintorain espadayabo ikana iki, reteananti jato jan keshanai trompeta akai jonira epatax iká iki,

19 ja kikin jonibo betan ja joni koshibo, itan jatíribi jonibora moa en jato yoia iká iki: “Ja non ati teebora kikinshaman icha iki, non rebestankin atira nenké iki, ja chikébotiibira noa janbiskana iki, noa westíorabora noabichobo ikanai.

20 Jaskara iken, noa akanaitian ja trompeta xoon ikai ninkatax, mato noki joti iki noa akinni, jatianra non Dios nobetan ikax noa kopí reteananti iki”, akinbo.

21 Jaskati, ja bari pikotaitian peokootax yametai kaman noa teetaitianra, jatí icha joniribi jaton wanín kensho tsomaabo potayamakin noa koirankana iki.

22 Jainxonribira, jaskarabo ikaitian jatíbi jonibo, itan ja noa akinaiboribi en jato yoia iki, ja Jerusalén jema chichobi yamé winókanon ixon, noa yamé koiranshini neten teekanti kopí.

23 Jaskáribiira, eabi, nokon kaibobo inonbi, noa akinnai jonibobi, ja ebé ixon ea koirannai jonibaonbi, tsonbi non chopa jopéyamaa iki, itan jatikaxbi wanín kensho tsomayabo noa ikana iki.