2 Salum, Sadoc, Ahitob,

3 Amarías, Azarías, Meraiot,

4 Zeraías, Uzi, Buqui,

5 Abisúa, Finees, Eleazar, itan Aarón, jara tsoa ikámatianbi japari ikon sacerdote iká iki.

6 Nato Esdrassa iká iki, ja Moisés meranxon Israelbaon Diossen jato esé menia kikinhakin onanna, itan Ibon akinnai joni, jaskara iketianra apo Artajerjesnin jatíbi jan yokatabo menia iki. Jaskatira Esdras, ja Babiloniainoax,

7 Jerusalénhain baneti kaai westíora tsamá israelitabo betan kaa iki. Jato xaran iká iki sacerdotebo betan Levitabo, bewaibo, xepóti koirannaibo, itan Dios rabiti xobonko teetaibo, jatianra iká iki ja Artajerjes apo iká moa kanchis baritia.

8 Ja Artajerjes apo iká moa kanchis baritia jawen pichika oxe iketianra, Jerusalénhain Esdras nokota iki,

9 ja baritia reken oxe, reken nete iketianra Babiloniainoax kaai pikota iki, jatianra ja chosko oxe kaax, ja baritiaribi pichika oxe, reken nete iketian Jerusalénhain nokokana iki. Diossen jakonhakin akinnara nokota iki.

10 Jatianra Esdrasnin shinanna iki ja Ibon esé onanboresti, itan jan yoiai keskati iti, jainxon ja esébo itan ja koshi joibo israelitabo jato axeati.

11 Esdras, sacerdote itan jato axeai ikax, Ibon Israel menia jatíbi koshi joibo, itan esébo onan iketianra, apo Artajerjesnin nato kirika wishá neskati iká menia iki:

12 “Ja icha mai iboa apo Artajerjesninra, ja sacerdote itan ja naikanmea Diossen esé onan ixon jato axeai joni Esdras, saludanai.

13 Jatíbi israelita nokon maibotiibi ikábo Jerusalénhain miibetan bokasaibora moa bokanti atipanke ixonra en yoike, levita itan sacerdoteboribira moa kati atipanke.

14 Judá mai itan Jerusalén jemaki jawekeska iki ixon ointira, ja apon jawen kanchis joni, jan shinankinnaibo betan rabéxon mia raanai, ja Diossen esekan yoiaibo min kikinhakin onanna iketian.

15 Jan shinanman akinnaibaon, itan apon jawen shinanmanbi, ja Jerusalénhain jaa Israelnin Dios menia plata itan orobo botanwe,

16 jainoax jatíbi plata itan oro nato Babilonia mainmea min biti atipanabora min boti iki, ja Jerusalénhainoa Dios rabiti xobo jan ati, jonibo betan sacerdotebaon jaton shinanmanbi meniaiboribira min boti iki.

17 Nato korikinin marowe waka bake benebo, carnerobo, carnero benebo, jabé axon meniti bimi berobo, itan uva xeati, ja jawékibo maton Dios menikinra, Jerusalénhainoa Dios rabiti xobonko makan tsamanaton petipinxon min menoti iki.

18 Oro itan plata texeatonki maton jawe ati iki ixonra, ja mibé ikábo betan min shinanti iki, ja Dios keenai keskáakin.

19 Ikaxbi, ja Diossen xobonkoxon já rabikin ati jawékibo mia meniabo, Jerusalénhainoa Dios banekin miinbi menitanwe.

20 Wetsa jawéki mato maxkatabo, ja Dios rabiti xobo meran tee atibora, nokon jawéki jain benxoati xobonkonia maton biti iki.

21 Jatian ea, Artajerjes apo ixonra, en mato koshi joi yoia, jatíbi koriki koiranaibo ja bari kaiori iká Éufrates paronkoniabaon, sacerdote itan ja Diossen esé onanxon jato axeai Esdrasnin yokatabo, jatíbi jawéki washiyamakin menikanti,

22 kimisha waranka kimisha pacha kilo kamanra plata menikanti iki, rabé chonka rabé waranka litro trigo, rabé waranka rabé pacha litro uva xeati, rabé waranka rabé pacha litro xeniribi, jatian tashira, ja yokatati menikanti iki.

23 Jatíbi jawen xobonko teekin ati jawekibo mato Diossen yokata, basiamakin jatíbi menikanwe, ja apon bakeboki, itan jawen mainko masá teneti raanaketian.

24 Onankanwe ja apo kopiati, tee kopi kopiati itan jawéki ati kopí kopíatibora, ja sacerdotebaon, levitiabaon, bewaibaon, xepóti koiranaibaon, ja Diossen xobonko teetaibaon, iamax wetsabires inonbi ja Dios rabiti xobonko teetai jonin atima iki.

25 Mia, Esdras, ja min Diossen mia onan shinan menia kopi, jan jato joi benxoakinti itan jan jato ikinti joni koshibo janewe, abákanon Éufrates paro bekeiba iká mainmea ja bari jikiaiori iká jatíbi jonibo atikeskabiakin jato joi benxoaxonkin. Jatiribi jonibora moa min Diossen esé onanbo iki; ja onanamabora min jato axeati iki.

26 Jaweratobaonki min Diossen esé senenhakashamai, itan ea apon esébo senenhayamai, jabora jatianbi reteti iki, wetsabora wetsanko raankanti iki, wetsabora korikinin kopíamakanti iki, iamax wetsabora cárcel meran raankanti iki”, akin wishaara iká iki.

27 Jatianra Esdrasnin neskáakin orana iki: “Non papabaon Ibo Diossa jakon iki, jaskákinra Jerusalénhainoa Ibo rabiti xobo jato amanon ixon, apo shinanmaa iki,

28 jawen noi shinanman amaara apon, itan jan eseaibaon jainoax jawen iresama jonibaon ea koshi shinan menia iki, jan akinnara Jerusalénhain ebé baneti kati israelita iresamabo en jato tsinkiti atipana iki”, akin.