Apo Ciron koshi joi kirika merakana
6
[Jaskarabo inontianra, Dario iká iki Persiainoa apo, janra ja Jerusalén iká mainko jato ikinna koshi Tatnai kirika bomaa iki, Ciron aká koshi joi kirika benanon ixon, ja israelitabaon jakiribi Ibo rabiti xobo ati yoii iká.]1 Jatianra apo Darionin jato yoia iki, ja Babiloniainoa jakon kirikabo jain ati ikainko benxokaata kirikabo, jakonhakin oinpakekanti.
2 Jatianra Media main iká Ecbatana jeman, jain apo iká xobonkonia, westíora kirika nokokana iki, neskati iká wisháya:
3 “Ja apo iká, reken baritia iketianra, Ciro, ja apo ixon ja senenhakanti joi pikoa neskara iká iki: Ja Jerusalénhainoa Diossen xobo yoiira neskata iki: Jaki koshiti makanbo rakanxonra ja Diossen xobo jakiribi akanti iki, Dios menikin jainxon yoina menokanti kopí. Ja Diossen xobora rabé chonka kanchis metro keyá iti jake, jawen naxbára rabé chonka kanchisibi iti iki;
4 jainxonra, ani makan jatiobibo kimisha joyó akátiibi, jiwi benáshaman westíora joyó akanti iki. Ja jatí jawen kopí ikábora apon koriki koiranaiton kopiáti iki.
5 Ja Jerusalénhain iká Diossen xobonkonia tsekaxon, oro vasobo, betan plata vasobo, Nabucodonosornin Babiloniain boabora, jakiribi Jerusalénhain boxon, Diossen xobonko ja ikátiainkoribi maton ati iki”, iki iká.
Apo Darionin kirika bomashokoa
6 Tatnai jaton joni koshi iketian, jainoax Setar-boznai betan jabé ikáboribi ja bari kaiori iká Éufrates paro mainmea joni koshibo iketianra, apo Darionin koshi joi jato bomaa iki neskáakin: “Jerusalénhainoax pikókanwe,
7 jato teayamakanwe, ja judíobaon joni koshin, itan jaton wetsa koshibaonribi ja moa ikátiainkoribi Diossen xobo abákanon.
8 Aríbaxonbira en mato yoiai, jaskáaxon ja israelita joni koshibo, Diossen xobo akanaitian maton jato akinnon ixon: Nokon koriki koirannaira en yoiai, ja bari kaiorikea Éufrates paro main ika jonibo jato kopí yokáti. Ja koríkininra jan tee ati jawékibo kopiati iki. Ja tee jenekanaketianra winómayamakin kopiati iki.
9 Jaskáribiakin, netetiibi ja Jerusalénhainoa sacerdotebo jawenbi maxkámayamakin, jatíbi ja maxkatabo yokákanaitian jato menikanwe, waka bake benebo, carnerobo, iamax carnero bakebo, ja Dios menikin jatiobi keyokin menoxontibo. Jainxonribi menikanwe trigo, tashi, uva xeati iamax xeni,
10 abákanon naikanmea Dios jawen keenshaman jawékibo menoxonkin, itan ea apo iketian, eki itan nokon bakebokiribi orankin.
11 Jainxonra en yoiribiai, jaweratonki nato en yoia ati ikenbi yoitimakin senenhayamai, jara jawen xobo natapotibi kenshoxon pibebainkin chachixon reteti iki, jatianra jawen xobo keyokin ras akana, manish tsamana keská baneti iki.
12 ¡Jatian jain jawen jane iti Jerusalén Diossen katota ikenbi, ja Ibo rabiti xobonko atikoma jawéki imaibo, jato jakonma imaibo, tsoa apo inonbi iamax jawerato mainmeabo inonbi, jato keyobanon! Ea, Darioninra jaskara akanon ixon koshi joi en menike. Ja yoia keskáshaman senenbanon”, iki iká.
Jankenhai kaman tee akana
13 Ja bari kaiorikea Éufrates paro mainmea jato ikinna joni koshi, Tatnai, itan Setar-boznai, itan jabé ikábaon, apo Darionin jaskara ati koshi joi menia, jatíbi ja yoia keskáshaman senenhakana iki.
14 Jaskaaxonra ja israelitabaon joni koshibaon, jakiribi ja xoboakin peoxon jeneyamakin tee chibankana iki, ja profeta Hageo betan Idokan bake Zacaríassen yoia chibankin. Jainxon rabiti xobo jakiribi akin jankenhakanara iká iki, ja Israelbaon Diossen yoia keská, itan jaskara akanon ixon ja Ciro, Dario, Artajerjes ja Persia apobo ixon jato yoia keskáshaman.
15 Ja Diossen xobo jakiribi akin jankenhakanara iká iki, ja Dario persiain apo iká moa jawen sokota baritia itin, Adar oxe kimisha neteya iketian.
Pascua fiesta akin ja Ibo rabiti xobo menikana
16 Ja sacerdotebo, Levitabo, jainoax jatíbi ja yatanxon bokana jakiribi joá israelitabora, já rabiti xobo Dios menii raroshamanhanan fiesta akana iki.
17 Ja akanontianra, Dios menikin retekana iká iki, pacha waka bake benebo, rabé pacha carnero, chosko pacha carnero bake, itan chonka rabé chivoribi, israelitabo tsamábotiibira westíorabo retekana iki, jatíbi jonibaon ocha kopi.
18 Japekáora, ja Jerusalénhaixon Dios rabiti kopí, ja sacerdotebo jatian tee akí ikantibo jato axonpakekana iki, jatian Levitabora jaton ati tee ikáinkobiribi jato imapakekana iki, ja Moiséssen kirika wishakan yoiai keskáain.
19 Ja yatanxon bokana jakiribi beabaonribira, Pascua fiesta akana iki, ja reken oxe chonka chosko nete iketian.
20 Ja sacerdoteboya, levitabora, Dios bebon jakon inox chokíkana iki, jaskatira jakonshamanbo ikana iki. Jaskara ixonra, ja yatanxon bokana beabo kopí, itan jato betan sacerdotebo kopí, jainoax jatobi kopíribi, Pascua iketian Dios menikin yoina retekana iki.
21 Jatíbi ja yatanxon bokana bea israelitabaonra Pascuatian pikana iki, ja ikon Dios ikonhayamaibaon akanai jawekibo janetaanan, ja israelitabaon Ibo Dios chibannox jato ikánabo betanbi.
22 Kanchis nete kamanra, levaduraoma aká panman fiesta akí raroshaman ikana iki, Ibonbi jato kikinhakin raromaara iká iki, jan amaaton ja Persia apon, ja israelbaon Dios jainxon rabiti xobo jakiribi akanon ixon jato akinna iketian.