Judá jonibo Ibon Asiria apoibakea xabaa
(2 Crónicas 32.20-23; Isaías 37.1-38)
19
Jabé teetai kimisha jonira apo Ezequías yoii bokana iki, Asiria joni koshin ja chiké maxkatemea jonibo yoia joira yoikana iki, ja ninkáxonra jawen chopa noshia iki, masá shinanni chexakakinra xaxa chopa sawea iki, jatianra Ibon xobonko kaa iki.2 Jainxonra ja apo iká xobonko teetaibaon joni koshi Eliaquim, itan Sebna, ja joi wishai, jainoax ja iresama sacerdotebo, masá shinankin saweti xaxa chopabo saweyabo, ja Amósnin bake profeta Isaías betan yoyo iti jato raana iki,
3 apon joi bomaira iká iki: “Ramara noa masá shinantiain iki, noara masá tenetiain iki, jainoaxa noa rabintiainbires iki, noara ja iti nete nokoketian ainbo bakenkasabi koshioma keskábo iki.
4 Min Ibo Diossen, moa ninkata ipainon riki, ja sontárobaon koshi Asiria apon yoiti raanara iká iki, jiria Dioski jakonmai yoyo iti, ja yoii ikai joibo janbi ninkáxon jiria Diossen masá tenemapainon riki, min Diossenra moa ninkábirake. Jaskara iken, noa texeabo kopí oranwe”, iki iká.
5 Ja Ezequíasnin joi boai jonibora, Isaías betan yoyo iki bokana iki,
6 jaskáakin yoikanara, Isaíasnin, neskáakin Ezequías yoiti jato yoia iki: “Neskarara Ibon yoia iki: ‘Asiria apon yonotibo eki jakonmai onsati yoyo ika joiboki rakéyamakanwe.
7 Oinwe, ja ninkatax jakiribi jawen main kati joira en ninkámai, jatianra jainoa en jato retemaa mawáti iki’ ”.
8 Jaskataitianra Asirio apo jawen sontárobo betan Laquissainoax kaax, Libna jemameabo betan reteanani kaa iki. Jaskara ninkatax Asiria sontárobaon joni koshi Jerusalénhainoax kaa iki, Libnainoax jabé nokoananira kaa iki.
9 Libnainxonra Asiria apon ninkata iki, Etiopía apo Tirhaca, jabé reteanani moa joai. Jakopíra Asiria apon, ja Judáinoa apo Ezequíaski ja joi boaibo betan jakiribi benaakin joi raana iki,
10 kirika wishaa bokanatonra neskara yoia iki: “Min Dios, mia jaki koshiatoninra, mia yoiai jawekeskáaxonbi Jerusalén jema en iboakin bitima ixon; ikaxbi já paranmayamakanwe.
11 Minbira moa ninkata iki, ja Asiriainoa apobaon jatíbi ja akasai mainmeabo kikinhakin jato keyoabo. ¿Jaskara ikenbiki min xabakaati shinanai?
12 ¿Nokon rekenbo jatopari iká Asiria apobaon jato keyoaitianki, nato jemabo, ja diosbaon jato kishpinmaa iki: ja Gozán, Harán, Resef; ja Telasarhain jaa jonibo, Bet-edén mainmeaboki jato kishpinma iki?
13 Ja Hamat, Arfad, Sefarvaim, Hena, Ivainoa apobora reteanantiainoax moa mawákana iki”, iki iká.
14 Ja joi boaibaon kirika meniara Ezequíasnin bia iki, jatianra yoyo aka iki. Ja aká pekáora Ibon xobonko kaxon, ja kirika Ibo bebon chopexon,
15 neskáakin orana iki: “Israelnin Ibo Diossé, min yakátira ángel querubínbaon pekaten iki: miabicho riki jatíbi maibotiibi apobaon Dios; minra nai betan mai jonia iki.
16 Netéxon ninkáwe Ibó. Min bero chopexon oinwe Ibó, Senaqueribnin eki raana kirika yoyo awe, jatíbi ja joibora mia jiria Dioski, jakonmai yoyo ikabo iki.
17 Ikon riki, Ibó Asiria apobaonra jaton mainmea jonibo keyoa iki, itan jaton maiboribi ramia iki,
18 jainxonra jaton diosbo menokana iki, jabo diosma iketianra akana iki, jiwi iamax makan jonin aká jawékiboresa iká iki. Jakopíra keyokana iki.
19 Rama non Ibo Diossé, jawen koshiaxon noa akaitian noa xabaawe, jatíbi maibotiibi ikábaon nato mainxon, Ibo, miabichores Dios onankanon ixon”, akin.
20 Jatianra Isaíasnin, Ezequíaski joi raana iki: “Ibo, Israelnin, Diossenra yoiai: ‘Senaquerib Asiria apoki, orankin min ea yokatara en ninkata iki’ ”, ikira Ibo iká iki.
21 Asiria apo yoii Ibo iká joibora neskara iki:
“Jerusalén jemara,
westíora xontakonin akai keskákin,
mia osankanai, Senaquerib.
Jerusalénra mia jabatai oinnax miki shiroi bonketai.
22 ¿Tsoaki min jakonmaa iki itan tsoaki min jakonmanin yoina iki Senaquerib?
¿Tsoki jakonmaiki mia koshín saí ika iki,
itan tsoaki rabíanan min oinna iki?
¡Israelnin jakon Dioskira mia iká iki!
23 Senaquerib, min joi boaibo meranxonra Ibo min jakonmanin yoina iki. Miara neskata iki:
‘Tson topontimatii nokon reteananti carrobaonra,
manan maxkáinbo ea mapeta iki,
Líbano manan kikin keyáinra ea kaa iki.
Jawen konxán kikin keyábora en xatea iki, jawen pino jiwi kikin metsábora en reraa iki.
Manan maxkain kikin ikainbora ea nokota iki,
jawen niibo kikin metsá joa banaa keská ikainra ea nokota iki, ikira Senaquerib iká iki.
24 Wetsabaon mainra
chinixon en pozoa iki, jainoara en onpax xeaa iki,
nokon tae napaxen jamáxonra
Egipto parobo en tsosinmaa iki’.
25 Jatianra Diossen Senaquerib yokata iki: ¿Ikaxbi minki onanyama iki, ea Ibo,
jaskara iti shinanxon nato jatíbi jawékibo aká?
Moatianbiresa jaskara atibo en shinanna iká iki,
jaskara ikenra rama en moa ake;
jaskara ikenra jakonhakin aká jemabo min keyoai,
ja keyotaton texeabobichores tsamátiakinra min akai, Senaquerib.
26 Jain jaa yosma jonibora,
ikonbiresi raketi itan ikonbiresi rabinni,
wainkonia xobi keskábo ikana iki,
ramashaman ania xobi paxa keskára ikana iki,
xobo pekaten xobi xoxoketian,
aniamatianbi bari pikotaiorikeax niwe xana bexon menoa choshia keskára ikanai.
27 Diossenra yoia iki: Senaquerib, enra onanke jatíbi mia jain katanax joaibo
itan jatíbi min akaibo;
jainxonra en onanke mia ikonbiresi eki sinata.
28 Jatian mia sinatai itan mia rabitai onanxonra,
min rekinhain meosoti en mia axonai,
min kexainra kaaitian mia jan tsasiati en mia axonai,
jaskáxonra mia jan joá bainribi
en mia raanai”, akinra Diossen aká iki.
29 Jatianra Isaíasnin Ezequías yoia iki:
“Jaskáaxon jaskara iki kaai onantira neskara iti iki:
nato baritia itan wetsa baritia joaitonra,
janbix xoxoa trigobo maton piti iki,
ikaxbi ja kimisha baritia itinra matonbi banaxon maton tsekati iki,
uva banaxonra, jawen bimibo maton kokoti iki.
30 Ja Judáinoa mawatabaon texera, yobín bana keskábo iti iki:
jakoni taponax icha bimiai keskábora ikanti iki.
31 Jaskara ikenra jatíribi texeabo Jerusalénhain banéti iki;
jara Sión mananman mawáyamai texeabo jaréspariti yoii iká iki.
Jatíbi atipana Ibora, jaskara atin keena iki, akinra Isaíssen Ezequías aká iki.
32 Jatianra Isaíassen Ezequías yoia iki: Asiria apo yoiira, Ibo neskatai:
‘Jerusalénhainra jikitima iki,
westíora piabira potatima iki,
yami panatiabora jato betan reteanankantima iki,
chiké mapétira westíora tapobi ja katemakin akantima iki.
33 Ja joá bainribira moa jakiribi kati iki;
ja jemanra moa jikitima iki.
Ea, Ibonra, en jaskara akai yoiai.
34 Nokon yonoti David kopíres itan ea kopíbira
nato jema koiranxon,
jawen jonibo en xabaati iki’ ”, akinra aká iki.
35 Ja yamébira Ibon ángelnin kaxon, pacha posaka chonka pichika waranka sontáro Asiriabo jain ikáinoa jato retea iki, ja nete xabaketianra moa mawá ikana iki.
36 Jatianra Senaquerib Asiria apo, jawen sontárobo betan jatíbi jaton carpa peotabo bibaini Níniveain bokana iki.
37 Ikaxbi westiora netera, ja rabiti xobonkoxon Senaqueribnin jawen dios Nisroc rabiaitian, Adramelec betan Sarezer jawen bake rabekan kaxon retea iki, ja akáxa Ararat mainko jabati bokana iki. Japekáora jawen bake Esarhadón, jawen toan apo iká iki.