2 Jatianra Elíasnin Eliseo yoia iki: —Mia nenobi banéwe, Ibonra ea Betelhain raanai —akin. Ikaxbira Eliseonin yoia iki: —Ibon janenko itan mia kopira en ikon yoiai, enra miabicho imati atipanyamake —akin. Jaskataxa Betelhain kabékona iki.

3 Ikaxbira ja Betelhain jaa ikon profetabaon, ja Eliseo bechii jokonxon yoikana iki: —¿Minki moa onanna, ja rama min maestro mia Ibon bichinnai? —akin. Jatianra Eliseonin jato aká iki: —Jenjén, moara en onanke, ikaxbi maton jawebi yoiamakanwe —akin.

4 Japekáora Elíasnin, Eliseo yoia iki: —Nenobi banéwe, Ibonra Jericóain ea raanai —akin. Ikaxbira Eliseonin yoia iki: —Ibon janenko itan mia kopira en ikon yoiai, enra miabicho raanyamai —akin. Jatianra Jericóain kabékona iki.

5 Jericóain jaa ikon profetabora, Eliseo bechii jokonkana iki, jatianra yoikana iki: —¿Minki moa onanna, ja rama min maestro mia Ibon bichinai? —akin. Jatianra Eliseonin jato yoia iki: —Jenjén, moara en onanke, ikaxbi maton jawebi yoiamakanwe —akin.

6 Jatianra Elíasnin yoia iki: —Nenobi banéwe, Ibonra Jordán paron ea raanai —akin. Jaskáara Eliseonin yoia iki: —Ibon janenko itan mia kopira en ikon yoiai, enra miabicho imati atipanyamake —akin. Jatianra moa kabékona iki.

7 Ikaxbira pichika chonka Jericóainoa ikon profetabo nokotaxbi, jato pekáo jawetio ochóres tsasitoshikana iki, jatianra Elías betan Eliseobiribi, Jordán paro kexabi banékana iki.

8 Jatianra Elíasnin, jawen perakootinin xeixon jan jene rishkia iki, jaskáara ja jene chopetax oken ibékona iki, jaskáketianra mai manxaman ikai keskati ja paron shitábekona iki.

9 Moa shitáxonra Elíasnin, Eliseo yoia iki: —Ea miibakeax ochotamabi yoiwe, en mia jawe axontininki mia keenti iki —akin. Jatianra Eliseonin yoia iki: —Ea keenai riki, min toan ea Ibon kikin profeta Israelhain itin —akin.

10 Jatianra Elíasnin yoia iki: —Ikonbires atikoma jawékira min ea yokáke. Ikaxbi, ja ea Diossen boaitianbi jain ixon oinxonra, nato min ea yokata min biti iki. Ikaxbi ea oinyamaxonra min bitima iki —akin.

11 Jabo kaai, yoyo ikainaitianra, ishtonbires chiibires carro pikota iki, chibires kabayobaon niniairibi, jatianra ja ikon profeta rabé moa potaananbekona iki. Jatianra Elías naikan kaai mayaniwen keyata iki.

12 Kaai oinnaxa Eliseo saí ika iki: “¡Nokon papá, nokon papá, miara Israelbaon kikin koshi sontárobo tsamata keská iká iki!” iki. Japekáora Eliseonin, moa Elías oinwetsayamaa iki. Jatianra Eliseonin jawen chopa bixon, oniskin noshia iki.

13 Jaskata pekáora Elíasnin perakooti pakebaina bia iki, jainoaxa Jordánhin jakiribi kaa iki, jatianra ja paro kexa jainpari baneta iki.

14 Jainxonra ja perakootinin jene rishkii saí ika iki: “¿Iboki jawerano iki, ja Elíasnin Dios?” iki. Ja jene rishkiatianbira, ja jenebi chopetax oken ibékona napo, Eliseonin paro shitaa iki.

15 Ja oinxonra, já bebon iká Jericóainoa ikon profetabaon, yoia iki: “¡Ramara Elíasnin shinan Eliseo meran iki!” akin. Jatianra ja bechii beax, já bebon beoxon,

16 yoikana iki: —Oinwe, noa min yonotibo xaranra, pichika chonka koshi shinanya jonibo jake. Min maestro benatankanon ixon jato raanwe, Diossen shinanman nokoxon jawerato manan maxkaten, iamax mai teshanpain boxon potaaresa inake —akin. Ikaxbira jan yoia iki: —Iamarake, matonra tsoabi raantima iki —akin.

17 Jaskara ikenbira, jabaon ayorakin teaxon, senentiainbi, ja pichika chonka joni raankana iki, boxonra jabaon kimisha nete kaman Elías benakana iki, ikaxbi nokoyamakana iki.

18 Jatianra Jericóain jakiribi bokana iki, ja Eliseo jain baneta ikáinko, jatianra jato yoia iki: —Mato kayamanon ixonra en moa mato yoia iki —akin.

19 Ja Jericó jemamea westíora joninra Eliseo yoia iki: —Oinwe, nato jemara jakon iki, ja min oinna keská, ikaxbi jene jokonaira jakonma iki, itan nato mainra jawebi xoxoyamai —akin.

20 Jaskáketianra Eliseonin jato yoia iki: —Bená tazonman axon ea tashi bexonkanwe —akin. Ja tazón boxonkanatianbira,

21 jainoax jene jokonainko Eliseo kaa iki, jainra tashi reoa iki, ja akira neskata iki: —Ibonra yoiai: ‘Nato onpaxa en moa kerásma imake, moara jawetianbi mawákantima iki, main jawebi xoxoyamaira moa yamai’ iki ixon —akin jato aká iki.

22 Jaskáatianbira onpax jakon iká iki, ja Eliseonin jaskara iti yoia keská.

23 Japekáora Eliseo moa Betelhain kaa iki. Ja bain mapeti kaaitianra, westíora tsamá ja jemamea bakebo jokona iki, jatianra jaki shiroi peokooxon, saí akana iki; “¡Mapéwe mankó, mapéwe mankó!” akin.

24 Jatianra Eliseonin jatoki bechiakexon jato oinna iki, jaskáxonra Ibon janenko jato jakonmakin shinanxona iki. Jatianbira, manish meranoax jatoki rabé oso pikóxon, ja chosko chonka rabé bakeranon, beshéakin jato jaxkayona iki.

25 Japekáora Eliseo, Carmelo mananman kaa iki, jainoaxa Samariain jakiribi kaa iki.