2 Ikaxbi ja kimisha baritia itinra, Judáinoa apo, Josafat, Israelbaon apo Acab oinni kaa iki.

3 Jatianra Israelbaon apon, jawen joni koshibo yoia iki: —Matonra moa onanke, ja Galaadhainoa Ramot jemara noa israelitabaona iki. Jatian, ¿Jawekopíki non jawebi ayamai Sirio apon iboa ikenbi biribanoxon? —akin.

4 Jatianra ja Josafat yokata iki: —¿Galaadhain iká, Ramot jeman iká sontáro betan reteanani ea kaitianki, mia ebé katín kenti iki? —akin. Jaskáara Josafatnin yoia iki: —Ea ikaitianra ja nokon sontárobo, itan nokon kabayoboribi moa miibetan iki, jainoax min sontáro betanribi iki.

5 Ikaxbi kaamatianbi Ibon keenrin ixon onanoxonpari yokáwe —akin.

6 Jatianra ja Israelbaon apo Acabnin, ikonma profetabo jato tsinkia iki, chosko pachara ibirakana iki, jainxonra jato yokata iki: —¿Noaki iti iki, ja Galaadhinoa Ramothain iká sontárobo betan reteanani? —akin. Jatianra jabaon yoia iki: —Reteanankanwe, Ibon amaara min jatoaresti iki —akin.

7 Ikaxbi Judá mainmea apo Josafatkan jato yokata iki: —¿Nenoki wetsa Ibon profetabo yamaa, jaribi non onanoxon yokáti? —akin.

8 Israelbaon apo Acabninra, apo Josafat yoia iki: —Westíoraparira jake, já meranxon onannoxon Ibo non yokáti. Jara Imlakan bake Micaías iki. Ikaxbira en omisai, jawetianbira jakon jawéki ea jan yoiamai, jakonma jawékiboresa ea yoiai —akin. Ikaxbira Josafatnin yoia iki: —Jaskara yoiamawe —akin.

9 Jatianbira Israelbaon apo Acabnin, westíora sontárobaon koshi oficial kenaxon, yoia iki: —¡Imlakan bake Micaías, ishton jonon yoiwe! —akin.

10 Jatianra ja Israelbaon apo Acab betan ja Judábaon apo Josafat, reteanani jan panáti saweax, ja Samariain jikiti plaza ikainko apo iti yakátinin yakábekona iká iki, jatíbi ikonma profetabaonra rama iti joi bia iki.

11 Quenaanákan bake Sedequíassenra, yami waka machan keska jaweti aká iki, jatianra saí ika iki: “¡Ibonra neskara yoike: ‘Nato machanbaonra kikinhakin jato keyoai kaman siriobo min jato reteti iki!’ ” ikibo.

12 Jatíbi ikonma profetabaonra, ja apo jaskáakinbires yoikana iki: “Galaadhinoa Ramot jemanko iká sontárobo betan reteanankanwe, Ibon amaara maton jato jatoaresti iki”, akin.

13 Ja joi boai joni Acabnin raanatonra, Micaías kenai kaxon yoia iki: —Jatíbi ikonma profetabaonra, jatixonbishaman, apo jakonhakin yoikanke. Jaskara ikenra, en mia yokatai jatíbi jabo iká keskáribii jakonni mia yoyo iti, min yoia joi jakonribi inon ikax —akin.

14 Jatianra Micaíasnin yoia iki: —¡Ibon janenkora en ikon yoiai, ja ati Ibon ea yoiaresa en yoiti iki! —akin.

15 Japekáora Micaías apo Acab betan yoyo iki kaa iki, nokóketianra ja apon yokata iki: —Micaías, ¿Noaki iti iki Galaadhain iká Ramot jemankonia sontárobo betan reteanani? —akin. Jatian Micaíasnin yoia iki: —Jato peowe, minra jatoaresti iki, Ibon mia amaara min jatoaresti iki —akin.

16 Ikaxbi Acabnin yoia iki: —¿Jawetiakinki en mia yoiti iki, Ibon janenko onantiakin min ea ikonshamanres yoinon ixon? —akin.

17 Jatian Micaíasnin yoia iki:

18 Jatianra Acabnin, Josafat yoia iki: —¿Miaki en yoiamaa iki, nato joninra jawetianbi ea jakon jawékibo yoiamai, jakonma jawékiboresa ea yoiai ixon? —akin.

19 Micaíasnin yoiribia iki: —Jaskáakin min yoia kopí, Ibon yoia ninkáwe: Jawen ani yakatinin yakatara en Ibo oinna iki, jainoax naikanmea jatíbi ángel sontárobora jawen mekayao itan jawen mexkao já patax charókana iká iki.

20 Jatianra jábo Ibon yokata iki, tsoamein paranshamanxon Acab shinanmai kati iki, Galaadhinoa iká Ramot jemankonia sontáro betan reteanankin jato peonon ixon itan jainoax mawati kanon ixon. Jatíribibaon westíora jawéki yoiketianra, jatian wetsabaonbiribi wetsa jawéki yoia iki.

21 Ikaxbi westíora jakonma shinanra Ibo bebon kaax, en abátanon parankin iki iká iki. Jatianra Ibon yokata iki, jawekeskaxonki min ati iki,

22 jatianra ja shinanman yoia iki, Acabnin jatíbi ikonma profetabo meranra jato jansomai shinan ea iti iki, Jatianra Ibon yoia iki, jaskáaxon min paranti iketian, moa atanwe, minra ati iki.

23 Jaskara ixonra rama moa min onanke, jatíbi ja min, ikonma profetabora, Ibonbi ja janso shinanman jato paranti imake, jatianra jainres mia moa mawáti jake —akinra aká iki.

24 Jatianra Quenaanánin bake Sedequíassen, Micaías nokobainxon westíoraakin tantash axon, yoia iki: —¿Jan mia yoyo ati Ibon shinanki eibakeax pikotax jawerano kaa? —akin.

25 Jatianra Micaíasnin yoia iki: —Chitébotiibi joneti kawanhatanai netera min onannoxiki, jaweranoki kaa ixon —akin.

26 Jatianra Israelbaon apo Acabnin jaskara ati jato yoia iki: —¡Ja Micaías yatanxon ja jemamea koshi Amón bebon itan nokon joni koshi Joás bebon boxonra maton presoati iki!

27 Amón itan Joás yoikanwe, enra yoiai cárcel meran akanon ixon, jaskáxon ichamashoko piti, itan ichamashoko onpax menixon masá tenemakanwe, jatíbi jakonbires itan jiriapari ea joai kaman —akin.

28 Micaíasninra tekibainkin yoiribia iki:

29 Jatianra Acab betan Josafat jaton sontároboya, Galaadhain iká Ramot jemankonia sirio sontárobo betan moa reteanani bokana iki.

30 Ikaxbira kaamatianbi Israelbaon apon Josafat yoia iki: —Onankanaketianra wetsa chopa saweax ea reteanani kaai, jatianra min nokon chopa saweti iki —akin. Jaskataxa Israelbaon apo Acab, wetsa chopa saweax onantimatax moa reteanani kaa iki.

31 Ikaxbi Siriainoa aponra, carromeax reteananai jawen kimisha chonka rabé sontárobaon koshi capitánbo jato yoia iki, Israelbaon apoma iketian tsobébi reteanantima.

32 Jatianra ja carromea sontarobaon koshi capitánbaon, Josafat oinxon shinankana iki, jara Israelbaon apo Acab iki ixon, jatskákinra moa retenoxon katekana iki. Jatianra Josafat akinkanon ikax saí ika iki,

33 jatianra oinkana Israelbaon apoma iketian, moa chibankin jenekana iki.

34 Ikaxbi westíora sirio sontároninra, ja ati shinanxonmabi pia potaa kaxon, Israelbaon apo Acab ja mawátiainshaman jan panati sawea naxaranbi pian tsakaa iki. Jatianra jan carro boai joni yoia iki: —Moa banéwe, reteanantiainoa ea moa pikowe, eara kikinbiresakin tsakakanke —akin.

35 Ja netera ikonbiresi reteanankana iki, jatianra ja apo Acab, Siriobo betan reteanankin jawen carro napo chankanxon tewankana iká iki. Ikaxbira ja yantánbi moa mawata iki, ja tsakakanainoax jimi jokonaira, ja carro napo baita iki.

36 Jatian moa bari jikiketianra, sontáro joyotabaon ninkata iki: “¡Westíorabo jaton jeman, itan jaton main moa botankanwe,

37 moara apo Acab mawáke!” iki ikanaitian. Jatianra ja apo Acab mawata Samariain bokana iki, jainra miinkana iki.

38 Japekáora Samariain ianshokon ja carro chokakana iki, jainra tsini ainbobo nashiai iká iki, ochítibaonra Acabnin jimi taxoa iki, ja Ibon jaskati yoia keskára iká iki.

39 Acab jaskara winota joi, jainoax jatíbi jan akábo itan jawen marfil xobo, jainoax jan aká jemabo, jabora Israel apobo jaskara ikana yoiai kirikain wishakana iki.

40 Ja Acab mawata pekáora, jawen bake Ocozías, jawen toan apo jikixon jato ikinna iki.