2 Wetsa netenra Acabnin Nabot yoia iki: —Min uva wai ea meniwe nokon mai chité inon ixon, jara moa nokon xobo patax iki. Jawen toánra wetsa uva wai bebon jakon en mia meniti iki; iamax ja kopí koriki en mia meniti iki —akin.

3 Ikaxbi Nabotnin, Acab yoia iki: —Ja nokon anibaona en bia jawéki, en mia menitira Dios keenyamai —akin.

4 Jaskáara Akáb kikínbires onís itan sinata jakonma shinanni jawen xobonko kaa iki, nokon anibaona en bia jawékira en mia meniamai akin Nabotnin aká. Nokotaxa chikéki bekepiax rakata iki, itan pitinbobi keenyamaa iki.

5 Jatianra jawen awin Jezabelnin já patax kaxon yokata iki: —¿Jawekeskatiki mia kikinni onisai, itan min pikáshamai? —akin.

6 Jatianra Acabnin yoia iki: —Nabot betanra ea yoyo ike, enra yokáke jawen uva wai ea maromanon ixon; iamax já keenketian jawen toan wetsa uva wai en meniti. Ikaxbira jan ea menikashamake —akin.

7 Jatianra jawen awin Jezabelnin yoia iki: —¡Ikaxbi mia ikebetin, ja Israelbo jaskánon ixon jato yoiai! Wenixon pitanwe, moa jakon shinantanwe. ¡Enra Nabotnin uva wai mia bixonai! —akin.

8 Jatianbira ja ainbaon, Acabnin janenko jato bomatibo kirika wishaa iki, jaskáxonra ja apon sellón apakea iki; jaskáatananra jain Nabot iká jemamea joni koshiboki bomaa iki.

9 Ja kirikabo jato bomaara iká iki neskata: “Ayunani tsinkínon jato yoiwe, jaskáaxon jonibo bebon Nabot yasánkanwe.

10 Jainxon rabé joni jansoi yoyo iti já bebon yasánkanwe, jaskáaxon Nabotki jakonmakin yoyo imakanwe, ikon riki natonra Dios betan apo jakonmakin yoike, iki imakanwe. Japekáora jemankonia pikoxon, wetsanko boxon makanman tsakaanan maton reteti iki”, iki iká.

11 Jatianra ja Nabotnin jemamea jonibaon, jato ikinai joni koshibaon, itan ja jemamea kikin jonibaon, ja Jezabelnin jato kirika raanxonatonin ati yoiai keská akana iki.

12 Ayunanti jato yoixonra, jonibo bebon Nabot yasánkana iki.

13 Jatianra jansoi yoyo inon ixon rabé joni bekana joá iki, jatíbi jonibo bebomeaxa Nabotki jakonmai yoyo ika iki, ikon riki, Nabothra Dioski itan apoki jakonmai yoyo ika iki, ikira ikana iki. Jatianra jemamea pikóxon makanman tsakaanan retekana iki.

14 Ja aká pekáora, Jezabel joi bomakana iki, Nabothra makanman tsakakana moa mawáke iki iká.

15 Jaskara ninkatatianbira Jezabelnin, Acab, yoia iki: —Ja mia maromakashamai iibata, Nabotnin uva wai moa bitanwe. Nabothra yamake, ramara moa mawá iki —akin.

16 Nabot mawata ninkatax, kaxonra, Acabnin, jawen uva wai moa iboakin bia iki.

17 Jatianra Ibon, ja Tisbeainoa Elías yoia iki:

18 “Ramabi ja Samariain jaa Israelbaon apo Acab betan, yoyo itanwe. Ramashokobira ja Nabotnin uva wainko iki, já moa iboakin bii kaa riki.

19 Ja yoitanwe: ‘Ibora neskatai: Nabot retexonra jawen uva wai min bichina iki, jakopira jainxon ochitibaon jawen jimi taxoainxon, min jimiribi taxokanti iki’ ”, akin.

20 Jatianra Elíasnin, ja Acab yoia iki: —¿Nokon rawí ixonbiki min ea nokoa? —akin. Jatianra Elíasnin aká iki: —Jenjén, enra mia nokoke, Ibonra oinke jakon ayamakin, jakonma jawékires min akai.

21 Jaskara iketianra Ibon yoike: Jakonmabires rabinti jan miki raanai, mibébira jatíbi min rarebobo jato keyoai; Israelhain iká jatíbi min chiní bake benbobora jato mawámai.

22 Jaskáxonra, jatíbi min rarebobo en reteti iki, Jeroboam betan Baasakan rarebobo aníkeskaakin, mato jatixonra Israel ochamaa iki, jakopíra ea ikonbiresi sinata iki.

23 Ja Jezabel yoiira Ibo neskáke: Ja Jezabelra, Jezreel main iká wainkoxon ochitibaon piti iki.

24 Ja min rarebo jemameax mawatabora, ochitibaon jato piti iki; jatian ja wainkoniax mawatabora pimis tetébaon jato piti iki —akin aká iki.

25 (Tsoabira Acab keska yamaa iki, jara iká iki jawen awin Jezabelnin jaskara ati shinanxona, Ibo bebonxon jakonmabires akai.

26 Jatonbi aká diosbo rabixonra jakonmabires jawéki aká iki, amorreobaon akai keskáribira aká iki, jabora israelitaboibakea Ibon jato potaa iki.)

27 Jatíbi jaskarabo ninkáxonra, Acabnin jawen chopa noshia iki, jaskáaxonra xaxa chopa sawexon ayunana iki. Ja chopayara oxaa iki, kikinbires onisa nia iki, moa jaskáwetsatimara shinanna iki.

28 Jatianra Ibon Elías yoia iki:

29 “¿Minki oinna Acab ebebonmeax namanbirestonin shinanmeeta? Já shinanmeeketianra, japariketian jawen rarebobo en masá tenemayamai, ikaxbira jawen bake apo iketian en masá temati iki”, akin aká iki.