2 Ja Ibo rabiti xobo Salomónman jato amaara iká iki, jawen nenké rabé chonka kanchis metroya, jawen naxbá iskon metro, itan jawen keyá chonka kimisha metro wetsa naponbekon.

3 Ja Dios rabiti xobo bebonkiri iká chibóra jawen nenké iskon metro iká iki, ja xobon naxbátioribi, jainoax ja chibó tekiara chosko metro wetsa naponbekon ja xobo bechiakiri iká iki.

4 Salomónman jato amaa xobon ventanabora iká iki, xechaakin kano kekoayabo.

5 Jainxonra ja xobo katei iká chikékibi, jemaori wetsa chitéboribi akana iki, jawen nenkékiriakin itan pekáoriribira akana iki.

6 Ja chitébora kimisha pekataya iká iki, ja namanmea chitéra rabé metro rabé chonka pichika centímetro, jawen naxbá iká iki; ja mananhokea chitéra rabé metro kanchis chonka centímetro jawen naxbá iká iki; jatian ja bochiki maxkaten iká chitéra, kimisha metro chonka pichika centímetro jawen naxbá iká iki; ja xobo chiké kinianaketianra, jemaorikea irakantibo nenkémabo aká iki.

7 Ja xoboakinra makan kaxkepakexon panchaakinbo raseneankana iki, ja makánbora jainoa bikanainkoxonbi kaxkexon moa ati keskáakin jankenhakanabo iká iki, jakopíra ja xoboakanainko martillo, yami itan jan teeti akana yami jawékibo tas ikai ninkátima iká iki.

8 Ja namanmea chitekan xepótira, ja xobo mekayao iká iki, ja mananho iká chitéain kati itan ja maxkaten iká bochikia chitéain mapéti tapitira, nocho poinki keská iká iki.

9 Ja xoboakin moa keyokinra Salomónman jonibaon, konxán irakantibo itan ja tablaninribi mapokana iki.

10 Jaskaaxonra ja teetaibaon xobo katemakin wetsa chiteboribi akana iki, jawen keyára rabé metro rabé chonka pichika centímetro iká iki, jabora chikékibi konxán kaxkebaon tenwanmakana iki.

11 Jatianra Salomón Ibon, yoia iki:

12 “Ja xobo rama min akaira, en mia yoiai, nokon esébo itan nokon koshi joibo min chibanketian, itan jatíbi ja senenhati en yoia joibaon yoiai keská, jakonhakin min senenhaketianra, mia jaskara imati, min papa David en yoini en senenhati iki;

13 jatianra israelitabo betan ea jati iki, itan nokon joni Israelbora en jato potatima iki”, akin.

14 Salomón tee axonaibaonra Dios rabiti xobo jankenhakana iki.

15 Ja xobo chichokea chikéra, konxán tablanin rapoa iki. Ja napoorikea jan nabeta chikéra bochikixon namanhakin jiwi tablanin rapoa iki, ja tapora pino jiwi tablanin rapokin nabékana iki.

16 Jainxonribira bochikixon namanhankin, konxán tablabaon chikébo akana iki, jara jawen naxbá, jawen nenké itan keyá iskon metro iká iki, ja xobo chichó senenainra, jain Dios iká Chité iká iki.

17 Dios rabiti chité, xobo meran ikára, jawen nenké chonka posaka metro iká iki.

18 Ja xobo napoori iká chiké pekatenra jakiribi konxán tablabaon joa jisáboaxon, itan bimi jisáboaxon nabékana iki. Jatianra jatíbi konxán ikáx, westíora makánbi jishtima iká iki.

19 Salomónmanra xobo meran, jain Dios iti Chité jakonhayona iki, Ibon ja senenhabekonti aká joi jain iká ani bonanti jain anoxon.

20 Jain Dios iti Chitekan chichokea xabára jawen nenké, jawen naxbá itan jawen keyá, iskon metro iká iki. Ja bebonra Salomónman, jainxon incienso ininti menoti, konxán jato amaa iki, jara oron rapoa iki.

21 Jainxonribira ja xobo chichó itan jain Dios iti Chité kikin oronbires rapoa iki, jaskáaxonra oro cadenabo ja bebon aká iki.

22 Jaskáaxonra ja xobo napoori jatíbiain orónbires rapoa iki, jain Dios iká Chité bebon iká, jainxon incienso ininti menotiribira oron rapoa iki.

23 Jainxonribira jain Dios iká Chité meran iti, rabé ángel querubín keská peiabo, olivo jiwi akana iki. Ja rabébira jawen keyá chosko metro wetsa naponbekon iká iki,

24 jainoax ja rabekan pechira rabé metro chonka pichika centímetrobo iká iki. Jaskara ikaxa ja rabekan pechibo peata, wetsa pechi rebonkoniax wetsa rebokaman jawen nenké chosko metro wetsa napónbekonbo iká iki.

25 Ja ángel querubín keská akanara jatio rabébires iká iki; jaskara ikaxa, ja rabébi chosko metro wetsa napónbekon iká iki, itan ja jisá rabébires.

26 Jawen keyáribira, chosko metro wetsa napónbekon iká iki.

27 Jabora Salomónman, jain Dios iká Chité meran jato amaa iki. Jaton pechibora peata iká iki, jabora chikéki okén mepibekona iká iki, ja wetsaorikea jaton pechira jain Dios iká Chité napónbeconshaman mepibekona iká iki.

28 Jainxonra Salomónman ja ángel querubín keskábo oron rapoa iki,

29 jainoax ja ani xobo chichokea chikéainbora jatíbiain ángel querubin jisáakinbo, xebon jisábo itan joa jisábo akana iki.

30 Jainxonribira ja xobon tapo chichó oronbires rapoa iki.

31 Jain Dios iká Chitéain jikiti xepótira, olivo jiwi aká iki, jan tewantira xepotiain jiwi bochiki itan oken abékona iki, jainoax ja xepóti witábora jan metsaati pichika paróyabo iká iki.

32 Ja olivo jiwi akana xepoti tabla oken ibékona pekatenra, chaxaxon ángel querubin jisáboakin, jainxon joa jisáboakinribi axon jatíbi jabo oronbires rapokana iki.

33 Ja xobo naponmea iká chitekan xepóti witábora iká iki, olivo jiwi chosko paroyabo.

34 Ja rabé xepótinin jan xépoti rabé tablabora, pino jiwi akana iki, ja rabébira iká iki yexketai.

35 Jainra ángel querubín jisáboakin chaxakana iki, xebon jisábo, itan joa jisábaon raoakanara iká iki, jaskáaxonra oronbires rapokana iki.

36 Jainxonribira ja chichó xabá iká katemakin chikékana iki, makan kaxkebo panchaakin rasenenhabaonra kimisha joyó pekatakin akana iki, ja mananhora westíora joyó konxán tonronbo akana iki.

37 Ja apo iká chosko baritia itin, Ziv oxe iketianra, Salomónman Ibon xobo akin jan tewanti makanbo mai meran tipinmakin jato peomaa iki;

38 jatian ja apo iká jawen chonka westíora baritia itin, Bul oxe iketian, baritia posaka oxe itínra, xobo jatíbi jaskáakin ati shinanna keskáboakin moa senenhakana iki. Kanchis baritia senenra Salomónman jato ani xoboamaa iki.