Salomónman Tiro apo Hiram betan ja senenhabekonti joi aká
(2 Crónicas 2.1-18)
5
Jawen papa Davidkan toan Salomón apo imakana ninkáxonra, Tiro apo Hiramman, já ointi jawen joni koshibo raana iki, Hiramra iká iki jatíbitian David betan jakon iká.2 Jatianra Salomónman, Hiram joi bomaa iki:
3 “Minra moa onanke nokon papa Davidkanra, jawen Ibo Dios xoboaxonti atipanyamaa iki, reteananti meranbires ixon, Ibon jawen rawibo jatoaresmai kamanpari.
4 Ikaxbi ramara, nokon Ibo Diossen jatíbiain jaskarabo moa itimaakin noa tantimaa iki, non rawíbora yamake, jan masá teneti isinboribira yamake.
5 Jaskara iketianra, nokon Ibo Dios rabiti xoboaxonti en shinanke, ja nokon papa David yoini keská, jan yoia iki jawerato jawen bakeki jawen toan apo imai, janparires jainxon já rabiti xobo axonti.
6 Libanohainoa konxanbo ea xatexonkanon ixon jato yoiwe. Ea tee axonaibaonra mia tee axonaibo akinti iki, min yokatatiira min jonibo kopíati en mia meniti iki, minra kikinhakin onanke, nonra ja sidoniobaon akai keskáakin jiwi xateti onanyamake”, iki iká.
7 Salomónman joi bomaa ninkataxa Hiram kikinni raroi saí ika iki: “¡Rama Ibo jakon ibanon, janra David kikin onan shinanya bake menia iki, kikínbires icha israelita jonibora jato ikinti iki!” ikibo.
8 Jatianra Hiramman, Salomón joi bomaa iki: “Min joi bemaara en bike, konxanbo itan pino jiwi min ea yokatara, mia axonkin en senenhati iki.
9 Ea tee axonaibaonra, Líbano mananmamea apakexon aniparo kaman bokanti iki, jainoara tapanhaxon, jain boti min yoiainko bokanti iki. Jainxonra ja tapan chorokanti iki. Jainoara ja jiwibo min biti iki. Ja min senenhatin ea keenai riki, jain apo iká xobo meran iká jonibo min jato jawékiati meniti”, iki iká.
10 Jaskáaxonra Hiramman, Salomón, ja keena keskáakin jatíbi konxán itan pino jiwibo menia iki,
11 jatianra Salomónman, Hiramman jain apo iká xobo meran ikábo jawékiati menia iki: chosko millones chosko pacha waranka litro trigo jainoax chosko waranka chosko pacha litros oliva akana xeni jabiresshaman. Salomónman baritiatiibi, Hiram meniara jaskara iká iki.
12 Jaskáxonra, ja meniti yoia ixon, Ibon, Salomón jakon ati onan shinan menia iki. Jainxonribira, Hiram betan Salomónman ja senenhati joi abékona iki, jatianra moa jakon ibekona iki.
13 Jatianra apo Salomónman jatíbi Israel jonibo teaxon koshi jato teemati, koshi joi pikoa iki. Ja koshi teetiainra kimisha chonka waranka joni jato tsinkia iki,
14 jabora oxetiibi rawinnanani, jatian kati iketian, ja bokanaitiibi chonka warankabo Líbanoain jato raankana iki. Jaskáaxa, ja jonibo westíora oxe Líbanoain ikax, rabé oxe jaton xobonko ikax iki, ikana iki. Ja teetaibo jato koiranaira jawen jane Adoniram iká iki.
15 Salomónman jonibora jaríba iki, kanchis chonka waranka joni jawéki papiaibo, posaka chonka waranka jonira makan kaxkexon panchaaibo mananman ikana iki,
16 ja kimisha waranka kimisha pacha joni, jaskáakin tee ati jato yoiaiboribira jaa iki.
17 Apo Salomónmanra, Dios rabiti xobo jan koshiati mai meran ati, ani itan kopí makanbo jato bimaa iki, jakonhakin kaxkepakea makánboribira iká iki.
18 Salomón betan Hiramman jonibo, ja xoboati onanbo, itan ja Guebalnin jonibaonra, Dios rabiti xoboati jiwibo tanyanxon, makanbo panchaakin kaxkepakekana iki.