2 Ja jawékia jonira iká iki icha carneroya, itan icha wakaya,

3 ikaxbi ja jawékioma jonira maroxon bia westíora carneroyashoko iká iki. Jara janbi koirana iki, jatianra ja carneroshoko já betanbi itan jawen bakebaon ikinna ania iki; jawen piai pitiribira piá iki, jan xeai vasonribira xeaa iki, jainoax jawen xochinko rakataxbo oxaa iki. ¡Ja jonira jawen bake ainbaon ikai keskati jaon keena iki!

4 Wetsa netenra, ochó niai joni ja jawékia joniiba nokota iki; ja joninra jawen carnero itan jawen waka westíorabi ja merata joni pimati pitiaxonkashamaa iki, jawena ayamakinra jawebioma joni jawen carneroshoko bichinna iki, jaskáaxonra ja nokota joni pimati pitiaxona iki —akin.

5 Ja jonikira David kikinbiresi sinata iki, jatianra Natán yoia iki: —¡Diossen janenkora en mia yoiai jaskara aká jonira moa mawáti iki!

6 ¡Jainxonra westíora carneroshokotonin kopítii, choskoakin kopíati iki, jawekeskáaxonbi noibayamakin jaskaa kopí! —akin

7 Jatian Natánman yoia iki: —¡Ja jonira miabi iki! Jaskara iketian Israelnin Ibo Diossen onantiakin yoiara neskara iki: ‘Israelbaon apo itira en mia katota iki, jaskáaxonra Saúlnin reteti ikenbi en mia amayamaa iki;

8 jain apo iti xobora en mia menia iki, jainxonra ja min ibon ainbobo en mia menia iki, jaskáaribanonbira Israel betan Judakan apo en mia imaa iki. Ja min oinna ichama iketianra, bebonbires en mia meniti iká iki.

9 ¿Jawekopíki ea min Dios ikenbi, nokon joiki shirokin ja en atima yoia, nokon keenma min aká iki? Ikon riki amonitabomara iká iki, jan Urías reteabo, minra retea iki, jawen awin binoxon.

10 En yoiabi yoitimaxon, Urías hitita jonin awin, min awin iti, min bia iketianra, min bakebo jawetianbi jakonmanani reteanani jenékantima iki.

11 Ea, Ibo ixonra onantiakin en yoiai: En amaara min kikin rarebobaonbi mia jakonmaati iki, jatianra mí bebonmeabi min awinbo westíora min rarebo en meniti iki, janra netenbi jonémabi jato yoranti iki.

12 Min joné aká iketianra, jatíbi Israelbo bebonxon netenbi jonémabi en amaa ati iki’ —akin.

13 Natán bebonmeaxa David keshaa iki: —Ibokira ea ochake —iki. Jatianra Natánman yoia iki: —Ibonra min ocha kopí mia masá tenemayamai, jaskara ikaxa mia mawáyamai.

14 Ikaxbi ja Ibo, min kikinbiresakin jakonma aká kopíra, ja min pikóbena bake, Betsabé betan aká mawáti jake —akin.

15 Jatianra Natán moa jawen xobonko kaketian, ja Davidkan Uríasnin awin betan aká bake, Ibon kikinbiresakin isinmaa iki.

16 Jatianra Davidkan ja bake kopi, kikinbiresakin Dios yokata iki, itan ayunana iki, jainoaxa mainbi rakatax yamé iishinna iki.

17 Jatianra ja apon xobonko iká jan shinankiinai jonibaon, mainbi rakáketian wenímakaskin teakana iki, ikaxbira já weníkashamaa iki, jainxonribira jato betan piamaa iki.

18 Kanchis nete winota pekáora moa bake mawata iki, jatianra Davidkan joni koshibo ja yoitinin raketa iki. Shinankanara iká iki: “Ja bake mawatamatian non yoiabira noa ninkáxonyamaa iki, ¿Jawekeskaxonki rama ja bakera moa mawáke akin non yoiti iki? ¡Jakonmabires jawékira ati iki!” iki ikábo.

19 Ikaxbira jawen joni koshibo jatonbiribi yoyo ikanaitian, moara bake mawáke ixon Davidkan onanna iki; jaskákinra jato yokata iki: —¿Moaki bake mawata? —akin. Jatian jabaon yoia iki: —Moara mawáke —akin.

20 Jatianra David, mainmeax wenitaanan nashionax inintinin iká iki, jainxonra wetsa chopa sawea iki, jaskatax Ibo rabiti carpa xobonko Ibo rabii jikia iki. Jaskáa pekáora jawen xobon kaa iki, jatianra jato piti yokáxon moa piá iki.

21 Jatianra jawen joni koshibaon yokata iki: —¿Jawe akíki mia iitai? Ja bake mawatamatianra min ayunana iki, itan mia winia iki, jatian ja bake moa mawáketianki, ¡Min weníxon pia! —akin.

22 Jatian Davidkan yoia iki: —Ja bake mawatama iketianra en piti tenea iki, Ibonra ea noibaxon mawámayamakin jamabirati iki ikaxa ea winia iki.

23 Ikaxbi rama moa mawáketianki ¿Jawekopí en ayunanti iki, jakiribi jamati atipanyamaxonbi? ¡Jabé ikira ea kanoxiki, ikaxbira já moa ebetan ikí jowetsayamai! —akin.

24 Jaskata pekáora David, jawen awin Betsabé onisai tantimai kaa iki. Ja oinni kaxon yoranara, benbo bake pikota iki, jara Salamón akin, Davidkan janea iki. Ja bakera Ibon noia iki,

25 jaskáaxonra profeta Natán meranxon David onanmaa iki. Jatianra Ibon yoia senenhaxonkin, ja bake Jedidías akin janei Natán kaa iki. Ja iki, Ibon noia iki iká.