Jonatánman bake Mefi-boset Davidkan akinna
9
Wetsa netera Davidkan jan akinnabo jato yokata iki: “¿Jakia Saúlnin rarebo mawayamai texea, Jonatán shinanxon en ja akinti?” akin.2 Saúlnin rarebaon yonotira westíora joni jaa iki, jawen jane Siba, jara Davidhiba joti kenaa kaa iki. Joketianra apon yokata iki: —¿Miarin Siba? —akin. Jatianra jan aká iki: —Min ea yononon ikaxa, ea neno iki —akin.
3 Jatianra apon yokata iki: —¿Tsoaki japaria Saúlnin rarebo, Diossen janenko en jawentanibires akinti? —akin. Jatian Siban yoia iki: —Westíora Jonatánman bakera japarike, jara okenbekonbi jawen tae moa chantoa iki —akin.
4 —¿Jaki jawerano iki? —akinra apon aká iki. Jatianra Siban yoia iki: —Lodebarhain riki, Amielnin bake Makirnin xobonko —akin.
5 Jatianra jainoa bexonkanon ixon apo Davidkan jato yoia iki;
6 jatianra Mefi-boset, Jonatánman bake, Saúlnin baba Davidhiba nokotax, ja kikin iketian ja bebon beota iki. Jatianra David saí ika iki: —¡Mefi-boset! —iki. Jatianra jan aká iki: —Eara neno iki min yoia senenhaxonox —akin.
7 Jatianra Davidkan yoia iki: —Rakéyamawe, min papa Jonatán shinankinra, ayorakin en mia jakonhati iki. En amaara min papashoko Saúlnin jatíbi mai mia banexonti iki, jainoax jatíbitian nokon mesan min piti iki —akin.
8 Ikaxbi beokainxon Mefi-bosetnin yoia iki: —¿Jawekopíki nato min yonoti jaskáakin min oinnai, ea ochiti mawata keskares ikenbi? —akin.
9 Jaskákenbira, Saúlnin moatianbi yonoti Siba, apon kenaxon, yoia iki: —Min Ibon babara en menike, jawena itan jawen awinnina, jainoax jawen bakebaona jatíbi jawéki jabaona inon ixon biti ikábo.
10 Jaskara ikenra, mia itan min bakebaon jainxon min yonotibaon, já waiaxonti jake, ja min yoá tsekaabora xobon min benxoati iki, ja min ibon kikin rarebobo ja jawékiai jati kopi, jatian ja min ibon baba Mefi-bosetkanra, jatíbitian nokon mesankoxon ebé pinoxiki —akinbo. Sibára, chonka pichika bakeya itan rabé chonka yonotia iká iki,
11 Jatian janra apo yoia iki: —Jatíbi ja ati min yoiara ea min yonotinin mia axonti iki —akin. Jatianra Mefi-bosetkan jatíbitian David betanbi mesanxon piá iki, jaribi westíora apon bake keska itaanan.
12 Jainoaxa westíora bake maxkoyaribi iká iki, jawen jane iká iki Micaías, jatianra jatíbi ja Siban xobonko jaabo, Mifi-bosetkan yonoti iká iki.
13 Ikaxbira Mefi-boset okenbekonbi jawen tae chanto ikáx, jatíbitian apo betanbi jawen mesanxon piti kopí, Jerusalénhainbi jaa iká iki.