Ibon ángel Boquimhain iká
2
Ja Ibon ángelra Gilgalhainoax Boquimhain kaa iki, jain kaxonra israelitabo jato yoia iki: “Enra mato Egiptonkonia pikoa iki, jaskáaxonra nato main en mato bea iki, maton anibo ja mai meninoxonra en jato neskáakin yoia iki: ‘Ja senenhabekonti joi en mato betan akára, jatíbitian en senenhati iki,2 ja main jaa jonibo betan ja senenhabekonti joi maton ayamaara jakon iti iki, jaskáyamakinra jainxon yoina menotibo maton jato ras akananti iki’. Ikaxbira maton ea yoiti ixonyamaa iki, ¡Oikanwe maton jaskara aká!
3 Jakopíra, rama en mato yoiai: Jain jaa jonibora en mato pikoxonti atipanyamake. Ja joniboyabi jaton diosbora, jan mato ramímatibo iki”, akin.
4 Jatianra ja Ibon ángel yoyo iki senenketian, jatíbi israelitabo ikonbiresi koshin winii sion ikana iki.
5 Jakopíra Boquina akin jain janekana iki, jainxonra Ibo yoina retexon menoxonkana iki.
Josué mawata
6 Jatian Josué jatoibakeax moa kaa pekáora, israelitabo westíoraxonbo moa jaton biti iká maibo bii bokana iki.
7 Ja Josué janontianra, israelitabaon Ibo rabikin jeneyamakana iki, Josué yamaketian jaresparia jaton koshibo janontianribira akana iki. Ibon jatíbi jawékibo Israel kopí akaibora jabaon oinna iki.
8 Ikaxbi Josuéra pacha chonka baritiayanix mawata iki,
9 ja mawáketianra, jawen mainkobiribi Timnat-sera ikain miinkana iki. Jara Efraín mananman iká iki; itan norteori iká Gaas mananhorira iká iki.
10 Jatianra ja Josué betan ikátiai israelitaboribi mawati keyókana iki. Jakopíra, jato pekáo pikotabaon jaton Ibo onanmabobi ikana iki; nin jaskáakin ja Israelbo akinbeabobira, onanyamakana iká iki.
Israelitabaon Dios jenea
11 Ikaxbi ja israelitabaon aká jawéki Ibon oinnara jakonma iká iki, jatonbi meskó keska dios Baal axonbo rabikinra peokana iki.
12 Israelitabaonra, jan jaton rekenbo Egiptonkonia pikoni Ibo jenekana iki. Jaskáxonra jato patax iká jonibaon jaton diosbo rabikanainko ja chibani jikikana iki, jaskákinra Dios sinámakana iki.
13 Ja dios Baal betan Astarté rabikinra Ibo jenekana iki,
14 jaskatira Israelboki Ibo sinata iki, jaskákin amaara yometsobaon jaton jayata jawékibo jato bonnana iki, jainxonribira jato patax iká jaton rawibo betan reteananaitian, jaweati atipanyamakanketian jatoareskana iki.
15 Ja israelitabo reteanani bokanaitiibira, Ibo jatoki bechiaketa iki, jaskatira jakonmabores winókana iki, janbi jato jaskáti yoia keskatibora ikana iki. Jaskáaribaxonbira Ibon israelitabo masá tenemaa iki,
16 jaskáaxonra jan jato yometsoaibo xaramea, jato xabáanon ixon joni koshibo jikimaa iki.
17 Ikaxbira israelitabaon, ja joni koshibo ninkáxonyamakin, Iboki yoitimakin jatonbi wetsa diosbores rabikana iki. Jaton rekenbaon Ibon esébo ninkáxonkatikanai keskáakinra, jabaon ninkáxonyamakana iki.
18 Ibonbira jan jato koshi jikima ixon, jato akinna iki. Jainxonribira ja koshibo janontian jaton rawíbaon akaitian israelitabo jato akinna iki, itan masá tenei sion iki noibatitaitian ninkaxon jato akinna iki.
19 Ikaxbi jawetianki, ja joni koshi mawatai, jatianra jakiribi jabo ramiti peokokana iki, jaton rekenbo ikátiai bebonbires, jaton diosbo akinhananbi rabiibora ikana iki. Jato jaskati jaa jakonmabo jeneyamakana iki, itan jaton keena keská ati shinanbobira jeneyamakana iki.
20 Jakopíra, Ibo Israelboki sinatax neskata iki: “Nato jonibaonra jaton rekenbo betan en ja senenhabekonti joi aká moa masaakana iki, itan ekira yoitimakanai.
21 Jaskara iketianra jato bebonmea westíora jemabi en moa potayamai, ja Josuénin mawákin jenebainabo”, akin.
22 Jaskáaxonra amayankanai israelitabaon jawen joi ninkáxonkin ixon Ibon oinkasa iki, ja jaton rekenbaon aní keskáribiakin.
23 Jaskara kopira Josué meniama jemabo jatianbi Ibon jato potayamaa iki, jaskáayamakinra jainbi jato banemaa iki.