2 jainxonra jatíbi jonibo jato yoia iki: —Neskárai Ibo ja Israelbaon Dios: ‘Moatianbira maton rekenbaon Tarékan, jawen bakeboyaxon, Abraham betan Nacoryaxon Éufrates paro kexa janontian; wetsa diosbires rabia iki.

3 Éufrates kexakeara Abraham en bia iki, jaskáaxonra jatíbiain Canaán main en nimaa iki. Jainxonra ja kaimanoxon, rekenpari jawen bake Isaac en menia iki,

4 jaskáxon Isaac en rabé bake meniara, Jacob betan Esaú iká iki. Ja Esaúra Seírhainoa manan mai en menia iki, ikaxbi Jacob jawen bakeboya Egiptonko kaa iki.

5 Jatianra Moisés betan Aarón en raana kaxon egipciobo jato anibires masá tenemaa iki, mato jainoa en pikoai kaman.

6 Jatian ja maton rekenbo moa Egiptonkoniax pikóketianra, egipciobaon jaton reteananti carretaninxonbo itan kabayoninxonbo, joshin aniparo kaman jato chibankana iki.

7 Jainxon jabaon ea kenaketianra, jabo itan egipciobo naxaran ikonbires yamé en jato chitemaxona iki, jaskáxonra egipciobo aniparo jene en jato mapomaa iki. Jaskara ixonra matonbi onanke en Egiptonko jaskara aníbo. Japekáora basibires mato tsoa jonibi jain jaama mananman iká iki,

8 amorreobaon mainko en mato beai kaman, Jordánhainoax bari pikotaiori. Jabora mato betan reteanana iki, ikaxbi en matoki menikaamaketianra jabo matonharesa iki, jaskáxonra ja mai maton iboa iki.

9 Japekáora Balac Sipornin bake, moabitabaon apo mato betan reteanani joá iki. Balacninra, matoki jakonmakin yoyo imakaskin Beornin bake Balaam, benati jato raana iki.

10 Ikaxbi Balaamra, en matoki jakonmai yoyo imayamakin, mato yoii jakonires yoyo inon ixon imaa iki. Jaskáxonra en mato ramiamayamaa iki.

11 Jatianra mato Jordán paro shitabaini boax, Jericóain mato nokókana iki. Jericóainoa jonibora mato betan reteanana iki, jaskáribira amorreobo, ferezeobo, cananeobo, hititabo, gergeseobo, heveobo, jainoax jebuseobo mato betan reteanana iki, ikaxbi en amaara maton jatoaresa iki.

12 Ja rabé amorreo apora, espadaninbi nin kanótininbi maton jatoaresyamaa iki, enra mato bebon ikonbires nokon raké shinan jatoki raana iki, jaskatira jabo mato nokotamatianbi jabákana iki.

13 Enra mato jain teetama ikenbi maibo menia iki; jainxon jema akamabo ikenbi en mato jemabo menia iki. Jatian ramara mato jain jaxon, uvabo itan aceitunabo banamaa ixonbi maton jawékiakai’ —akinbo. Jainxon Josuénin tekikin yoia iki:

14 —Jaskara ixonra jatíbi natobo kopí, Iboki rakékin, akonkin shinanxon itan akonkinribi maton senenhaxonti iki. Moa maton rekenbaon Éufrates paro kexaxon itan Egiptonkoxon rabikatikanai diosbo jenetaanan, ja Ibon yoiaires axonkanwe.

15 Ikaxbi ja Ibon tee axonkashamakin, rama shinankanwe tson yoiaikayaki maton ninkáxonti iki ixon: Ja maton rekenbaon Éufrates paro kexaxon rabikatikanai diosbo iamaxon nato main jaa amorreobaon diosboki, maton ninkáxontiki ixon. Enra, nokon bakebo betan ja Ibon yoia keská ninkáxon, jawen tee axonaires iki —akin.

16 Jatianra jonibaon yoia iki: —¡Ja non Ibokon jeneyamakinra, jawetianbi ja wetsa diosbo moa non tee axonyamai!

17 Ja non Ibonra noa itan non rekenboyabi Egiptonkonia ja kikinhakin yanka yonokaatiainoa noa pikoa iki. Janra ichabires ratéti jawéki noo bebon aká iki, jainxonra non jokin icha jemabo winobeaitian, koiraananbi noa jan akinna iki.

18 Janra noa joai bain iká jatíbi jemabo, noa potaxona iki, ja neno jakatiai amorreoboribi. Jatíbi jaskarabo kopíra nonribi ja Ibon yoiabo ninkáxon axonti iki, itan jara non Dios iki —iki ikana iki.

19 Ikaxbira Josuénin jato yoia iki: —Matonra Ibo ninkáxonbi tee axontima iki, jara westíora jakon Dios itan washimis iki, jaki yoitimax mato ochaketianra, teneyamakin mato oinrestima iki.

20 Ja jenetaanan maton wetsa diosbo akinnaitianra, Ibon mato jakonma imati iki, jaskáxonra ichabires jakonhabea ixonbi mato keyoti iki —akin.

21 Jatianra jonibaon neskáa iki: —Jaskarara noa winótima iki. Nonra ja Ibon yoia keskábo tee axonti iki —akinbo.

22 Jatianra Josuénin jato neskáa iki: —Matobi riki ja Ibon yoia tee axónnoxon katotabo, itan jaskara riki iki ikábo —akin. Jatianra noabo riki, iki ikana iki.

23 Jainxonra Josuénin jato neskáa iki: —Jaskara iketian jatíbi mato xaran iká wetsa diosbo jenekanwe, jaskátaanan jatíbi maton shinanyanixbi Israelbaon Ibo Dioski banékanwe —akin.

24 Jatianra jonibaon neskáa iki: —Nonra ja non Ibo Dios akinnai, jainxonra ja ati yoiaboribi non axonti iki —akin akana iki.

25 Ja netebira Siquemhainxon, Josué itan jonibaon ja senenhabekonti joi akana iki, esébo itan ja senenhati koshi joibo jato menia iki,

26 ja Diossen esé jain iká kirikanin wishakana iki. Japekáora westíora ani makan bixon, ja Ibo rabiti xobonko iká encina jiwi naman aká iki,

27 jainxonra Josuénin jatíbi jonibo yoia iki: —Nato makanra jan noa shinanmai iti iki, janra jatíbi ja noa Ibon yoiabo ninkata iki. Maton Dios betan ikonma inaketian, jan mato jaskarama riki ixon shinanmati —akinra jato aká iki.

28 Japekáora Josuénin, westíorabo moa jaton mainbiribi jato raana iki.

29 Japekáo basimabira, Ibon yonoti Josué Nunman bake, pacha chonka baritiayanix moa mawata iki.

30 Jawen mainkobiribi Timnat-serainra miinkana iki, jara Gaas manainoax norteori, Efraín mananman iká iki.

31 Israelitabaonra, Josué janontian itan ja yamaa pekáobi, Ibon tee axonkana iki, jatianribira yosibo jaxon jatíbi ja Ibon jaskáakin israelitabo akinbea onankana iká iki.

32 Josekan xao Egiptonkonia bexonra, israelitabaon Siquemhain miinkana iki, ja maira Hamornin bakebo pacha plata koríki kopía Jacobnin maroa iká iki, ja Siquemman papa, japekáora Josekan chiní bakebaona ja mai baneta iki.

33 Ja Aarónman bake Eleazar mawáketianra, jawen bake Fineesen mainko miinkana iki, jara Efraín jonibaon mananman iká iki.