2 jatian jan yoia keská ikonketianra mato yoiti iki: ‘¡Ja maton onanama wetsa diosbo chibanon akanwe; jabo rabinon akanwe!’ akin.

3 Mato jaskáa, ikonhayamakanwe. Maton Ibo Diossenra mato tanakasai, jatíbi maton shinanyaxonbi, itan jatíbi maton kayayaxonbiki maton noia ixon onankaskin.

4 Maton Ibo Diosbicho chibankanwe, jainxon jaki rakékin jakon ixonkanwe; jan ati yoia joibo senenhakanwe, jawen joi ninkaxonkanwe, jainxon rabikanwe; já betanbi jakanwe.

5 Ja profeta, itan ja namá meran oinxon jaskara iti yoiai jonira moa reteti iki, Egiptonko yanka yonokaataibo mato ikenbi, jan mato jainoa pikoa maton Ibo Dioski yoitimanon ixon mato esea kopí, itan maton Ibo Dios moa maton chibanyamanon ixon mato jenemakasa iketianribi. Jaskáaxonra matoiba jakonma jaketian maton keyoti iki.

6 Atiki ja min kikin wetsanbi, min benbo baken, min bake ainbaon, min noi awinin, ikoni mia jabé raenanai joninbi, ja minbi itan min rekebaonbi onanama diosbo rabimakaskin, paraanan jonéshoko mia teakankin,

7 ja diosbora ja jemabotiibi iki, jabora ochómabo itan ochóboribi iki, nato mainra jatíbiain iki,

8 já keenaibo axonax parameeyamawe, jan mia yoiabo ninkáxonyamawe; jaon masá shinanyamawe, jainxon paranaxonyamawe;

9 jaskáayamakin retekayawe. Minparira peoti jake, ja min aká pekáora jatíbi ja jemamea jonibaon ati iki.

10 Egiptonkoniax yanka yonokaataitian, mia jainoa tsekaa ikenbi min Ibo Dios mia jenemakasa iketian, mawatai kaman makaman tsakawe.

11 Jaskaketian onantaanan rakéxonra jatíbi Israel jonibaon, jaskara jakonma jakiribi akantima iki.