2 Jato mai bichinxon, jainoa maton jato potaboai jonibaon jaton diosbo jainxon rabikanaibo, jatíbi keyokin ras akanwe: ja mananmameabo, ja mai matokan ikábo itan ja ani jiwi naman ikábo.

3 Ja makan tsamánkanabo reokanwe, ja makanbo beshéakin rorokanwe, ja rabikanai jiwi xatebo tsinkixon menokanwe, jaton diosbo jisáakin akanabo keyokin ras akanwe; jaton diossen janebaon moa shinanbenokanwe.

4 Jabaon akai mawakinres maton Ibo Dios rabiamakanwe.

5 Mato jonibo xarameara, westiora tsamá maton rebobo ikain, jain jawen jane iti Ibon katóti iki, jatianra Dios rabii jain mato kati iki.

6 Jainxonra já axonkin yoinabo retexon maton keyokin menoti iki, chonka jawekiainoa westiorabo Ibo menikin maton boti iki, ja kopíati jawekibo kopíakin maton jain meniti iki, meniti yoia ixon itan matonbi keenxon jaweki menikin, maton jain boti iki, ja reken pikota waka bakebo, itan ja carnero bakeboribi maton jain boti iki.

7 Maton Ibo Dios bebonxora maton piti iki, jatianra maton Ibo Diossen mato jakonhakin shinanxona, teexon maton aká yoabo jawékiai, maton rarebobo betan mato raroti iki.

8 Jain ixonra rama westíorabaon jaskara aká jakon iti jisá iketian, nenonxon maton akai keskábo maton atima iki.

9 Matora ja Ibo Diossen mato meniti jakonshaman jati, iboakin bitinko nokotamapari iki.

10 Ikaxbi ja Jordán shitabaini kaax, ja Diossen mato meniti mainko jaaxa, jan mato kateaketana maton rawiboibakeax moa xabakaata ikax, mato jawebi rakétima iki,

11 jatianra jain jawen jane iti maton Ibo Diossen katotainko, jatíbi ja ati en mato yoiabo boxon maton meniti iki: jashaman axonkinra, yoinabo retexon maton keyokin menoxonti iki, chonka jawekiainoara westiorabo maton meniti iki, ja kopíati jawekibora maton kopíati iki, itan jatíbi jawéki ja Ibo meninoxon katotabora, maton meniti iki.

12 Jainxonra maton Ibo Dios bebonxon maton fiesta ati iki, maton bakeboyaxon, itan maton yonotibo betan, maton bia keskáakin jawe maibi iboakin biama iketianra, mato xaran iká Levitaboribi maton fiesta akinti iki.

13 Matonra Ibo yoina menoxonkin, jainxon atima ikenbi wetsankoxonbires anake, koiramekanwe;

14 ja maton Ibo Diossen, mato jonibo tsamabo ikainoa westíora tsamá katota ikainxonbichoresa maton ati iki. Jatíbi ja ati en mato yoiabora jainxon maton senenhati iki.

15 Jaskara ikenbira, wetsatianbires inonbi inaati yoina retexon wetsa jemankoxonbires maton piti iki, maton Ibo Diossen jakonhakin icha yoina mato meniara, icharibi maton piti iki. Benxokaata, iamax benxokaatama ixonbira, chaxo nami akai keskáakin jatixonbi maton piresti iki.

16 Ixonbira jawen jimi maton pitima iki, ja ayamakinra maiki maton chikoti iki.

17 Ja mato jain jaa jemankoxonra maton pitima iki, ja chonkankoniabo westíora tsamá trigo maton menia, jainxonribi ja maton uva xeati, xeni, jainoax ja reken pikota waka bakebo itan carnero bakebo, jainxon maton pitimaribi iki, ja Ibo meniti yoia jawekibo, itan ja matonbi shinanxon meniai jawékiboribi.

18 Jaskarabora maton ati iki Ibo Dios bebonxon, jainxon jaskáati jan katotainxonbichores; jaskarabo Ibo bebonxon akira, maton bakeboyabi maton yonotibo, itan mato xaran jaa Levitabo betan mato rarotiki, ja maton teexon aká ikábo akí.

19 Ja main jaxonra, jawetianbi Levitabo maton potatima iki.

20 Jaskáati yoia ixon, maton Ibo Diossen, maton mai ani itiakin mato tekixonketianra, nami pikaskin wetsatianbires maton piti iki.

21 Jain jawen jane iti maton Ibo Diossen katota, mato ikainoax ochó iketianra, ja Diossen mato menia wakabo betan carnerobo retexon, jain mato ikainxonbi, maton keena keskáakin maton piresti iki, jaskáati en mato yoia keskáakin.

22 Chaxo nami akai keskáakinra benxokaatama ixonbi maton piresti iki.

23 Ixonbira, jawekeskáaxonbi jawen jimi maton pitima iki, ja jimira jan jati iki; jaskara ikenra ja nami pikin, jan jati jimiribi maton pitima iki.

24 Ja jimira onpax akaikeskáakin maiki maton chikoti iki.

25 Ja piamakanwe, jatianra Ibon oinna pontéshamanres jakon akáx, maton bakeboyabi mato jakon jati iki.

26 Ja jawékibo meniti maton shinanna, itan ja meninoxon maton yoiabora, jainxon meniti Ibon katotainxon meninoxon maton boti iki,

27 jatianra jainxon, ja maton Ibo Dios axonkin makan tsamana pekatenxon, ja maton meniai yoinabo maton keyokin menoxonti iki. Ja maton meniai yoinabaon jiminra, ja maton Ibo Dios axonkin makan tsamana maton rashó ati iki, ikaxbi jawen namira maton piti iki.

28 Ja nato en mato yoiabo ninkakanwe itan jatíbi senenhakanwe, maton bakeboyabi jatíbitian mato jakon janon, Ibo Diossen oinna ponté itan jakon akaibo ikax mato jaskara inon.

29 Ja maton jato bichinti maibotiibi ikainoabora, maton Ibo Diossen jato keyoti iki, jatianra jaton maibo biax mato jain jati iki,

30 ja mainmeabaon aká chibanax jakonmain pakénaketian koiramekanwe, jaton diosbo matonribi rabiti shinanya ikax, jain boyamakanwe.

31 Jaskáaxon maton Ibo Dios ramiayamakanwe, ja jonibaon jatíbi jan keentima jakonmabires jawékibo jaton diosbo rabikin akanaitianra, Ibon teneti atipanyamake, jaskati ikonbiresi jakonmao kaxonra, jaton bakebi retexon menoxonkana iki.

32 Jatíbi ja ati en mato yoiabo jatíbitian akí axekanwe, jawebi tekikin yoiamakanwe, jain yoiabo jawebi bichinyamakanwe.