13 Ja oinna pekáora mia mawatai, jaskataxa min rekenbo betan mia iki kaai, min wetsa Aarón iká keskaribira mia iti iki,

14 jawebi jain xoxoyamai manan Zinhainoax ea onpax yokati eki joikanaitianra, en ati yoia senenhayamai mato eki yoitimaa iki, jaskákinra jato bebonxon maton ea jakon ninkakamayamaa iki —akin. (Jawebi jain xoxoyamai Zin mananman iká, Cadessainoa jene jainoax jokonai Meribá yoiira ikai jaskati.)

15 Jatianra Moiséssen Ibo yoia iki:

16 —Nokon Ibo Diossé, mia riki jatíbi jonibo jato jamai, min jonibo jan jato ikinti, westíora joni jaton koshi iti janewe,

17 janra jawerano inonbi jato ioti iki, jatianra carnerobo jan jato koirantioma keská ikantima iki —akin.

18 Jatianra Ibon Moisés yoia iki: —Nunman bake, Josuéra, moa koshi iti shinanya joni iki. Kenaxon já koshi iti janekin min meken jawen maponko awé.

19 Jaskáaxon ja sacerdote Eleazar bebonxon, itan jatíbi jonibo bebonxon, jaton koshi iti tee meniwe;

20 jatíbi Israel jonibaon yoiti ixonti kopíra, jatíribi min koshi shinan min meniti iki.

21 Ikaxbira sacerdote Eleazarhibapari Josué kati iki, jatianra jan nokon shinan onanti Urim meranxon, Eleazarnin min janenko ea yokáti iki. Jatíbi jawéki ati jan israelitabo yoiai jaton joni koshira Josué iti iki —akin.

22 Jatianra Moiséssen ja Ibon jaskara ati yoia senenhaa iki. Sacerdote Eleazar bebon itan jatíbi jonibo bebonra Moiséssen Josué boá iki.

23 Jawen maponko meken axonra Eleazarnin jaton koshi iti tee Josué menia iki, ja Moisés meranxon Ibon yoia keskáakin.