Ja senenhabekonti joi jain iká carpa xobo manaon nai koin iká
9
15 Ja senenhabekonti joi jain iká Diossen xobo akana netenra, ja xobo koinman mapoa iki. Jatianra yametaitian peokootax nete xabatai kaman, ja Diossen xobo manaon chii tirí iká iki.16 Jatíbitianra jaskata iki, netenra nai koinman xobo mapoa iki, jatian yamé oinkanabiribi chii tirí iká iki.
17 Ja nai koin, carpa xobo manaonkeax keyáinatax kaitianra, israelitabo ja chibani bokana iki, jaweranoki ja nai koin tsasiax jainbi paniai, jainra jaton carpa peannax ikana iki.
18 Ibon kati yoiara, israelitabo bokana iki, ja jainbi banéti jato yoiara jainpari ikana iki, jawetio basiki ja Diossen xobo manaon nai koin jainbi paniai, jatio basira jainbi ikana iki.
19 Ja xobo manaon nai koin taxkéyamai pania basiaitianra, taxkéyamakin jainpari ixon, Ibon jaskara ati yoiabo israelitabaon senenhakana iki.
20 Ja Ibon xobo pekaten iká nai koin jaweti neteres iketianra, Ibon jato kati yoia moa jainoax bokana iki, jaskáribiakin, jainpari tsasiti yoiara jain banékana iki.
21 Wetsatianbora westíora yaméres ja nai koin jainbi tsasia iki, jatian moa yamékiri keyatax jainoax kaaitian, israelitaboribi ja chibani bokátikanai. Ja yamé iká keskáribii neten ikax ja nai koin keyatax kaaitianra, israelitabo ja chibani bokátikanai.
22 Jawetianki ja nai koin ja Diossen xobo pekaten rabé netebo ikai, westíora oxe ikai, iamaax, westíora baritia ikai, israelitabora jatio basiribi jainbi tsamakana iki. Ikaxbi jawetianki ja nai koin keyatax kaai jatianra ja chibani bokátikanai.
23 Ibon jaskáti yoiara jainbipari banékatikanai, jawetianki jainoax kati jato yoiai jatianra moa bokátikanai. Jainbipari ikai kamanra Dios rabii teekatikanai, jaskáati Moisés meranxon Ibon jato yoia keskati.