Diossen carpa xobo anicha moa iti keskabiakin akana
40
17 Jatianra jawen rabé baritia iti peokootaitonin, reken nete itan reken oxe, Egiptonkoniax pikota pekáo, Ibon carpa xobo anicha moa iti keskabiakin akana iki.18 Ibo rabiti xobora Moiséssen moa iti keskabiakin aká iki, jaki koshiti kanobora tipina iki, tablabora keyana iki, natapotibora aká iki, jaki tewanmati witábora nichina iki,
19 chopan mabéxon chopanribi panaaketanxon chorish chopan mapoara Ibon xobo iká iki, jaskáakin ati Ibon yoia keskára iká iki.
20 Japekáora ja esé wishaya tabla rabé Moiséssen bia iki, jaskáaxonra ja senenhabekonti joi ja ani bonanti meran aká iki; jainxonra jan iaxon ja bonanti boti jiwi tonron oken abékona iki, jaskáaxonra jan mápoti aká iki,
21 jainxonra xobo chicho boa iki; jan bonanti bepoti nachitekinra chopa panina iki, jaskaati Ibon yoia keskáakin.
22 Jaskaaxonra, jain tsinkiti carpa xobo anicha chichó, jain pan ati mesa aká iki, ja chopa panaa chichó ayamakinra ja patax norteori aká iki.
23 Ibo bebonxora, mesanko jakonhakin pan petipina iki, jaskaakin ati Ibon yoia keskáakin.
24 Jain joébo yasánti kanchis poyanya candelabroribira jain tsinkíti xobo meran aká iki, bonanti iká surhori, jain pan ati mesa iká bekeiba,
25 jainxonra Ibo bebonxon lámparabo ketéa iki, ja Ibon jaskaati yoia keskáakin.
26 Ja jan axon ininti menoti orobiresa, jainoax Dios betan nokoananti xobo chicho aká iki, jan nachitea chopa panaa bebon,
27 jainxonra incienso ininti menoa iki, jaskáati Ibon yoia keskáakin.
28 Japekáora Dios rabiti xobo jikitiain Moiséssen chopa panina iki;
29 jaskáaxonra yoina jan axon jatiobi keyokin menoti, ja Dios rabiti xobo jikitiainko aká iki, jainoax Dios betan nokoanantiainko, jan axonra Ibo menikin yoinaboyabi bimi berobo menoa iki, jaskáati Ibon yoia keskáakin.
30 Jainxon Dios nokoti xobo betan jain axon yoina menoti naxaranra ani kenchá palangana aká iki, jaskáaxonra jan chokiti onpax bochoa iki.
31 Jainoara Moisés betan Aarónman, itan jawen bakebaon, jan mechokiiti itan jan tachokiti onpax bikana iki.
32 Jainra ja Dios betan nokoananti xobonko jikinox, itan jainxon yoina menotiain kanox chokíkatikanai, jaskáti Ibon Moisés yoia iketian.
33 Ja senentiainbira, Diossen xobo betan jainxon yoina menoti katemakin xabá itiakin jemaa iki, jaskáaxonra ja jema jikitiain chopa panina iki.
Jainoax Dios betan nokoananti xobo manaonkea nai koin
Moiséssen xoboakin jankeaketianra,
34 ja jainoax Dios betan nokoananti nai koinman mapoa iki, jatianra Ibon penekan jawen xobo bochoa iki.
35 Jainxon Dios nokoti nai koinman mapoketian, Diossen xobo, Ibon penekan bochoaketianra Moisés jain jikiti atipanyamaa iki.
36 Diossen xobo pekatemeax nai koin keyáketianra, jaton chopa peotabo ras akax israelitabo moa boi tekíbainkana iki,
37 ikaxbi ja nai koin keyáyamaitianra, jabaon jaton chopa peotabo tsekayamakana iki, jaskáyamakinra nai koin keyataipari manakana iki.
38 Israelitabo boí jatíbiain ikanainkora, jatíxonbi jabaon oinna, ja Diossen xobo manaon Ibon nai koin neten iká iki, jatian yaméra ja xobo mananho chii tiri iká iki.