2 Ikaxbi rama benbobo betan ainbobo israelitabo yoiwe, jato patax iká benbobo betan ainbobo oro itan plata aká jawékibo jato yokákanon —akin.

3 Israelitabo akonbireskin jakonhatira Ibonbi egipciobo shinanmaa iki. Jainxonribira, faraónman joni koshibaon Moisés iresama kikin joni shinankana iki, jatíbi Egipto jonibaonra jaskábires shinankana iki.

4 Jatianra Moiséssen faraón yoia iki: —Ibonra neskara yoike: ‘Nato yamé pochínikonra jatíbi Egiptonko ea winotai,

5 jatianra egipciobaon reken bakebo mawakanti iki, ja faraónman yakátinin yakata jawen reken bakenkoniax peokootax, ja yanka yonokaatai ainbaon reken bake ja renetiain teetai senenra mawákanti iki. Jainoaxa jatíbi yoinabaon reken bakeboribi mawati iki.

6 Jatíbi Egiptonkora onisi chexakaati saa ikanti iki, jawetianbira jaskara ikáma iki, jainoax jawetianbira jaskara itima iki’.

7 Ikaxbi maton onannon ixonra egipciobo jato axonbi, israelitabo Ibon jato jaweatima iki, ochítibaonbira jato jojó atima iki, tsoa joninbi itan yoinaninbira jato jaweatima iki.

8 Jatianra jatíbi min joni koshibo ea oinni bekanti iki, chirankooxonra moa katanon ixon ea yoikanti iki: ‘Nenoax moa katanwe jatíbi jan mia chibanaiboyabi’, akin. Jatian ea jaskaayamara ea kayamai —akin. Jaskáaxa faraónhibakeax kikinni sinata Moisés pikota iki.

9 Japekáora Ibon Moisés yoia iki: —Matora jawekeskaxonbi faraónman joi ninkáxonyamai, jaskataitianra bebonbires jan ratéti jawékibo Egiptonko en ati iki —akin.

10 Jatianra Moisés betan Aarónman, jatíbi nato jan ratéti jawékibo faraón bebonxon aká iki, ikaxbi Ibonbi imaa jawen keena keskáres akin, faraónman Egiptonkonia israelitabo jato raanyamaa iki.