2 jatianra ja min bakeboyabi min bababo min yoiti iki, ja egipcioboki shirokin en jaskaa, itan jatoibaxon ani ratéti jawékibo en aká. Jaskáxonra ea riki Ibo ixon maton onanti iki —akin.

3 Moisés betan Aarónmanra faraón oinni kaxon yoia iki: —Hebreobaon Ibo Diossa neskatai: ‘¿Jawetiankamanki, yoitimati jenetax ebebomeax mia naman shinanmeetai? Ea rabii botankanon nokon jonibo ea raanxonwe ikira ikai;

4 ikaxbi min jato raankashamaitianra, bakish icha chanpo min main en bemati iki,

5 ja icha chanpon mapoara mai jishtima iti iki. Oi xewa winota pekáo ja ichama banetabora keyokin ja chanpobaon piti iki, jainxonra jatíbi wainkonia jiwi peiboribi piti iki.

6 Apo ikax jain mia iká xobonkora bochoti iki, ja min joni koshibaon xobonkora bochoti iki, jainoax jatíbi egipciobaon xobonkoboribira bochoti iki. ¡Jaskara ikára jawetianbi maton papabaon, itan maton papashokobaon jato janontian, itan rama non nete kamanbi oinyosma iti iki!’ —akin. Jaskati yoyo iki senentaananra, faraón iká xobonkoniax Moisés moa kaa iki.

7 Jatianra faraónman joni koshibaon yoia iki: —¿Jawetian kamanki, nato joni noa jakonma imai jenetai? Jaton Ibo Dios rabii botankanon ixon benbobobicho jato raanwe. ¿Egipto moa ramíyonkebiki min ramakamanbi onanamapari iki non apó? —akin.

8 Jatianra Moisés betan Aarón jakiribi kenamaxon faraónman yoia iki: —Moa botankanwe maton Ibo Dios rabii. Ikaxbi eapari yoikanwe ja boaiki tsoabo iki —akin.

9 Jatianra Moiséssen yoia iki: —Noara kati jake non bakebo betan jainoax non yosibo betan, non bake benbobo, itan bake ainbobo betan, non carnerobo itan non wakabora non boti jake, non Ibon ani fiesta riki —akin.

10 Ikaxbira faraónman jato yoia iki: —¡Jakonma shinanax mato ikaira onantibires iki! ¿Matonki ikonhai jatíbi maton bake maxkoboyabi maton Ibo betan ikí mato kaai?

11 Jaskarara iamai, mato yosibobichores botankanwe, ja maton Ibo rabii, mato jaskara atin keenaibetin —akin. Jatianra Moisés betan Aarón já bebomea moa potakanti faraónman jato yoia iki.

12 Ikaxbira Ibon Moisés yoia iki: —Jatíbi ja mainmea banábo itan jatíbi ja oi xewakan akábi ja winota pekáo jaréspariabo keyoi chanpo benon ixon Egiptoori min meken sananwe —akin.

13 Jaskáara Moiséssen jawen meken Egiptoori sanana iki, jatianra bari pikotaiorixon, Ibon amaa neten itan yamé jatiobi ja mai niwen payana iki. Ja wetsa nete xabáketianra, bari pikotaiorikeax niweatonin moa ichabires chanpo bea iká iki,

14 ja chanpobaonra jatíbiain weixon ja mai jato bichina iki. Jawetianbira moatianbi jaskara iamaa iki, jainoax neskata pekáo jaskara iamanoxiki, ichabires chanpo ja neten iní keská,

15 kikinbires icha ixon mai mapoara jishtima iká iki, jatianra jatíbi banábo, jainoax ja oi xewa iká pekáo yobin jiwibaon bimi banetabo keyokin pia iki. Egiptonkora jaweranobi jawe pei paxabi yama iká iki: xobi pei, itan jiwi peibobira yamaa iki.

16 Faraónmanra Moisés betan Aarón, jatianbi kenamaxon jato yoia iki: —Maton Ibo Dioski itan matokira ea ochake,

17 enra mato yokatai ramabichorespari ochaa ikenbi ea shinanxonyamakanwe, ea kopi maton Ibo Dios yokakanwe, nato jan masá teneti kikin jakonma jawéki retemis eibakea ochó raanon ixon —akin.

18 Faraón iká xobomeax pikókainxonra Moiséssen Ibo yokata iki.

19 Jatianra Ibon imaa wetsaorikeax niwe bea iki, jatianra bari kaiorikeax niwe koshi bexon ja chanpobo Aniparo joshin ikain jato potaa iki. Egiptonkora westíora chanpobi banéyamaa iki.

20 Ikaxbira Ibonbi imaa faraónman jawen keena keskáres akin israelitabo jato raankashamaa iki.

21 Jatianra Ibon Moisés yoia iki: —Min meken naiori sananwe, jatíbi Egiptonko yamé kikin kextó ikax moa tii axon onanti itiakin —akin.

22 Moiséssenra jawen meken naiori sanana iki, jatianra jatíbi Egiptonko kikinbires yamé iká iki,

23 kimisha netera, ja patax ikábo tsonbi ointi atipanyamaa iki, jainoax jaweranobi taxketi atipanyamakana iki. Jaskara ikenbira israelita jonibaon xobonkobores nete iká iki.

24 Jatianra faraónman Moisés kenamaa joketian yoia iki: —Maton Ibo rabii moa botankanwe, maton bakeribi moa botankawe; ikaxbi maton carnerobo itan maton wakabo boyamakanwe —akin.

25 Ikaxbira Moiséssen yoia iki: —Jaskarama riki, ja Ibo rabikin non menoxonti yoinabora min noa meniti jake.

26 Ja non yoinaboribira non boai. Westíora yoinabira neno baneti yamake, jainoa jaweti yoina katóxon retexonra non Ibo rabiti jake. Jain nokotamapari ixonra non onanyamake non Ibo rabitiki noa jawen maxkati kaai ixon —akin.

27 Ikaxbira Ibon imaa faraónman jawen keena keskáres akin jato raankashamaa iki.

28 Jainxonra faraónman Moisés yoia iki: —Nenoax moa katanwe, ea oinni moa jakiribi joetsayamawe, jakiribi ebebon joai netenra, mia mawáti iki —akin.

29 Jatianra Moiséssen yoia iki: —Jakonhakinra min yoike. Mia oinnira moa ea jakiribi joyamai —akin.