2 Jato raanyamakin, min jato bechiteboresaitianra,

3 Ibon jawen atipana koshi min yoinaboki paketi iki, jatianra kikin jakonma masá teneti isinman aká, ja kabayobo, burrobo, camellobo, wakabo, jainoax carnerobo mawáti iki.

4 Ikaxbira onantiakin Ibon imaa Egiptonkoniabaon yoinabo xarameax israelitabaon yoinabo westíorabi mawátima iki’ —akin.

5 Jainxonra Ibon jatian ati shinanxon, yoia iki: —Neskarara en bakish akai —akin.

6 Ja wetsa nete xabáketianra, Ibon moa aká iki. Egipciobaon yoinabora jatíbi mawata iki, ikaxbira israelitabaon yoinabo westíorabi mawáyamaa iki.

7 Jatianra israelitabaon waka ointi faraónman jato raana iki, ikaxbira westíora yoinabi mawatama iká iki. Jaskara ikenbira, jawen keena keskáres akin israelitabo jato raanyamaa iki.

8 Jatianra Moisés betan Aarón Ibon yoia iki: —Horno meranoa chiimapo mesó bikanwe, jara Moiséssen faraón bebonxon bochiki potati iki.

9 Ja chiimapo potora jatíbiain janbísti iki, jaskáxonra Egiptonkoniabo jatíbi jonibo betan yoinabo jaton yora peké kooyabo imati iki —akin.

10 Moisés betan Aarónra horno meranoa chiimapo biax, faraónhiba kaa iki. Jainxonra Moiséssen ja chiimapo bochiki potaa iki, jaskáara jonibo betanbi yoinabo jaton yoranko jatíbiain peké kooyabo ikana iki.

11 Onanyabaonra Moisés bechiteti atipanyamaa iki, jaboribira jatíbi egipciobo keskáribi jatíbi jaton yora peké kooyabo iká iki.

12 Ikaxbira Ibon imaa, jawen keena keskáres akin Moisés betan Aarónman joi faraónman ninkáxonyamaa iki, jaskáranoxiki ixon Ibon Moisés moa yoiantana keskatishaman.

13 Jatianra Ibon Moisés yoia iki: —Bakish yamékiri wenixon, faraón neskaakin yoitanwe: ‘Ja hebreobaon Ibora ikai neskati: Nokon jonibo moa jato raanwe ea rabii botankanon ixon;

14 ramara jatíbi jan masá tenetibo mia ati en raanai, min joni koshibo ati, jainxon min joniboribi ati, jatian ea keskaribi nato mainko wetsa yamaa min onannon.

15 Mia, min joni koshibo itan min jonibo kikin jakonma jawéki amaxon nokon koshi en mia oinmakeana iki, jatianra nato main moa mia yamakeana iki;

16 ixonbira nokon koshi oinnon ixon en mia jamaparia iki, jatíbi nato mainxon ea onankanti kopí.

17 Jaskarabo ikebira, nokon jonibo rankashamai mia yoitimakaresai.

18 ¡Jaskara ikenra! Bakish neskaranribi oi xewa kikin kextó en pakeai, jawetianbi Egiptonko jaskara pakeismara ikai.

19 Jaskara iketian jain jakon itinko min yoinabo jato amawe, jainoax jatíbi min wainko ikáboribi jain jato amawe, oi xewa maankinra xobo meran iamai jeman ikábo, jonibo betan yoinabo jato reteti iki’ —akin.

20 Jaskáakin Ibon ikamatianbi onantiankin onsá yoiketianra jatíribi faraónman joni koshibo raketa iki, jatianra jaton kikinhakin yanka yonotibo betan jaton yoinabo xobo meran akana iki;

21 ikaxbira wetsabaon ikonshaman shinanyamakin, jaskarares winómakana iki.

22 Jatianra Ibon Moisés yoia iki: —Egiptonko iká jatíbi joniboki itan yoinaboki jainoax egipciobaon wainko banáboki oi xewa pakénon ixon min meken naiori sananwe —akin.

23 Moiséssenra naiori jawen meken sanana iki, jatianra Ibon imaa tirin ika iki, kaná itan oi xewara maiki maanna iki. Jatíbi Egiptonkora oi xewa imaa iki,

24 jatianra kanáyabi oi xewa maanni jenéyamaa iki. Egiptonkora oi xewa kikinbires kextó maanna jawetianbi ninkakaisma iká iki.

25 Oi xewakanra Egipto mainmea jatíbi jain iká jawékibo keyokin beshéa iki: jonibo betan yoinabora keyoa iki, jatíbi wainkonia banábora keyoa iki, ja oi xewa ani pakexbo maankinra jatíbi jiwi ponyanbo jaxkakin keyoa iki.

26 Jaskara ikenbira, ja israelitabo jain iká Gosén mainkobichores, westíora oi xewabi pakéyamaa iki.

27 Jatianra faraónman Moisés betan Aarón kenamaxon yoia iki: —Enra onanke, ea ochaara ikon iki. Ea itan nokon jonibo riki, jan jakonma aká, Ibonra jakonma akama iki.

28 Tirin ika betan oi xewakanra bebonbiresshora moa noa ake, jaskara iketianra mato kaaitian en moa mato chiteyamai. Noa kopi Ibo yokakanwe, jatianra en mato raanti iki —akin.

29 Jatianra Moiséssen yoia iki: —Nato jemameax pikókainxonbiresa bochiki nokon meken sananxon en Ibo yokati kaai. Jatianra moa oi xewa manni jeneti iki, jainoaxa moa tirin iki jenéti iki, jaskáketianra, nato maira Ibona iki ixon min onanti iki.

30 Ikaxbira en kikinhakin onanke, miara min joni koshibo betanbi Ibo Dioski rakéyamapariai —akin.

31 Lino betan cebada banábora oi xewakan keyokin beshéa iki, cebada bimiara moa jawen taxobo senbó iká iki, ja linora moa joaya iká iki.

32 Ikaxbi trigo itan ja trigo keskáribi centenora jatian xoxoamapari iká iki, jaskatira jawe jakonmabi winóyamaa iki.

33 Jaskati ja Faraón betan iká pekáo, moa jemameax pikókaini kaxonra Moiséssen jawen meken sananxon Ibo yokata iki. Jatianbira oi xewa betan oi bei jeneta iki, jainoaxa moa tirin iamaa iki.

34 Oibi, oi xewabi, tirin ikábobi yamaketian oinnaxa faraón moa jakiribi ochaa iki. Jatian jawen keena keskáres akira jabicho iamaa iki, jawen joni koshiboribira iká iki.

35 Faraónmanra jawen keena keskáres aká iki, jaskáxonra israelitabo raanyamaa iki, Moisés meranxon Ibon jaskara iti moabi yoia keskatira iká iki.