2 Ikaxbi min jato pikómayamaitianra, nato min main jatíbiain tokoronin en jato masá tenemati iki.

3 Tokoronin Nilo paro bochoara kobinai keská iti iki, jabora mia apo ikax jain iká xobonko weíkanti iki, mia oxai jain rakatainkobobira iti iki, min joni koshibaon xobonko itan min jonibaon xobonkobora iti iki, panhanoxon jainxon meínti min hornoainbobira iti iki.

4 Ja tokorobora min yoranko choronbetanti iki, min joni koshiboyabi min jonibaon yorankoboribira jaskáti iki’ —akin.

5 Jatianra Ibon ja Moisés yoia iki: —Aarón yoiwe jawen kekoti sananon parobo ikáori, weanbo itan ianbo ikaori, jatian abánon jainoax tokorobo jokonxon jatíbiain Egipto mai bochoakin —akin.

6 Jatianra Aarónman jawen kekóti Egipto jeneori sanana iki, jaskáara jainoax jokonxon tokorobaon ja mai bochoaa iki.

7 Jaskáaketianra ja onanyabaon jaton onanna meranxon, jaskaraboribi akana iki, jatianra jabaonribi Egipto mainko tokorobo bemakana iki.

8 Jatianra faraónman, Moisés betan Aarón kenamaxon jato yoia iki: —Ibo yoiwe, eibakea itan nokon joniboibakea moa noa tokorobo bomaxonon, jatianra abátankanon Ibo menikin yoina menoxonkin ixon min jonibo en jato pikoti iki —akin.

9 Jatianra Moiséssen faraón yoia iki: —Ea yoiwe, jawetian Ibo en yokáxontinki mia keenai, mia kopí, jainoax min joni koshibo kopí itan min jonibo kopí, ja tokorobo moa miibakeax itan mia iká xobonkoniax, jokonax boax Nilo paronbicho ikanti kopi —akin.

10 —Bakishbi ea axonwe —akinra faraónman aká iki. Jatianra Moiséssen yoia iki: —Jaskara aketianra min onanti iki, tsoabira yamake non Ibo Dios keska ixon.

11 Mia apo ikax jain iká xobonkoniax boaxa tokorobo paronbicho moa iti iki. Jatianra mia, min joni koshibo, min joniboyabi moa maton masá tenematima iki —akin.

12 Moisés betan Aarónra, faraón iká xobomeax moa pikota iki. Japekáora Moiséssen Ibo yokata iki, faraón ati raana tokorobo moa bomanon ixon.

13 Jatianra Ibon ja Moiséssen yokata ninkáxona iki, jatianbira jatíbi ja xobonko iká, jeman iká, wainko iká tokorobo moa keyoti mawata iki.

14 Ja tokorobo mawata jonibaon tsinkiara, jatíbiain jakonmabires pisi poata iki.

15 Jaskara ikenbira, moa jatíbi jakon iketian faraónman Moisés betan Aarónman joi ninkáyamakin jawen keena keskáres aká iki, jaskara iti Ibon yoia keskatira iká iki.

16 Jatianra Ibon Moisés yoia iki: —Egiptonko jatíbiain sebe kainon ixon jawen kekótinin mai poto rishkinon Aarón yoiwe —akin.

17 Jaskáati yoia keskára akana iki. Aarónmanra jawen kekotinin mai poto rishkia iki, jatianra jatíbi Egipto maipoto sebea iki, jaskáxonra joniboyabi yoinabo seben jato aká iki.

18 Onanya jonibaonribira jaton onanna meranxon sebe imati shinanna iki, ixonbira atipanyakamana iki. Jaskákanaitianra joniboyabi yoinabo seben jato moa aká iki.

19 Jatianra onanyabaon faraón yoia iki: —¡Natora Diossen jawéki iki! —akin. Ikaxbira faraónman jaton joi ninkáyamakin jawen keena keskares aká iki, ja moa Ibon yoia keskati ikin.

20 Jatianra Ibon Moisés yoia iki: —Bakish yamékirira faraón paron kaai, jaskara iketian nete xabataitian wenitax kaxon yoitanwe: ‘Ibonra neskara yoike akin: Nokon jonibo ea raanxonwe ea rabii botankanon ixon.

21 Min jato raanyamaketianra, en icha chepa raanai, miki, min joni koshiboiba, jainxon min joniboiba, jainxon min xobon ikáboiba, egipciobaon xobobaonra icha chepa bochoti iki, jainoaxa mainkobobi iti iki.

22 Moa jaskáketianra, jain nokon jonibo jaa Gosén mainkobichores westíora chepabi en imatima iki. Jaskáaxonra min onanti iki, ea Ibora, ja main iki ixon.

23 Enra ja nokon jonibo jatonbiribi iká onanti inon ixon imai, itan min jonibo jatonbiribi iká onanti inon ixon imai. Nato jaskara itira bakish ikai’, ikira ikai —akin.

24 Jaskarara Ibon aká iki, jatianra faraón apo ikax jain iká xobo, chepa koin kextokan mapoa iki, jawen joni koshibaon xobonkobora iká iki, jainoax jatíbi ja Egipto mainkora iká iki. Ja chepabaonra jatíbi Egipto mai akonbireskin ramiayona iki.

25 Jatianra faraónman Moisés itan Aarón, kenamaxon yoia iki: —Maton Dios yoina retexon menii botankanwe, ikaxbira nato mainmeax mato pikótima iki —akin.

26 Jatianra Moiséssen yoia iki: —Non jaskaati ikaxbira jakonma iti iki, ja yoinabora egipciobaon mekekanai iki, enra ikonhai, ja jaton rabiai yoinabo retexon non menoai oinxonra noa makanman tsakaxon retekanti iki.

27 Tsoa jonibi jain jaama mananmanra noa kati jake, kimisha nete kaxonra, non Ibo Dios yoina retexon non meniti iki, jan noa yoia keskára non ati iki —akin aká iki.

28 Jatian faraónman yoia iki: —Enra mato raanai tsoa jonibi jain jaama mananman, maton Ibo yoina retexon maton meninon ixon, matora kati iki, ikaxbira mato ochóira katima iki. Earibi Dios yokáxontakanwe —akin.

29 Jatianra Moiséssen yoia iki: —Ja nenoax pikókinra, en Ibo yokáti iki, abánon miibakea bakish moa chepabo bomakin ixon, min joni koshiboibakea itan joniboibakearibi, jaskara en aketian jatíbitian min noa paranboyamanon ixonra en ati iki, jainxon jaton Ibo yoina retexon menii israelitabo bokaskanaitian jato bechitei mia iamanon ixon —akin.

30 Faraón iká xobomeax pikókainax Moisés Ibo betan yoyo ika iki,

31 jatianra Moiséssen yokata keská Ibon aká iki: faraónhibakeax, jawen joni koshiboibakeax itan jawen joniboibakeaxa chepabo moa boa iki.

32 Ikaxbira faraónman jakiribi jawen keena keskáres akin, israelitabo jato raanyamaa iki.