7
Jatianra Ibon Moisés yoia iki: —Oinwe, enra nokon toan faraón bebonxon anon ixon mia imai, jainxonra en imaa min wetsa Aarónman mia yoyo ixonti iki.2 Jatíbi en mia ati yoiabora, min Aarón yoiti iki; jatianra Aarónman faraón yoiti iki, jawen mainmea israelitabo jato pikómanon ixon.
3 Ikaxbi en imaara jato raankashamakin faraónman jawen keena keskares ati iki, jatianra ja oinnax ratéti jawékibo Egiptonko en ati iki.
4 Moisés itan Aarónra faraónman mato joi ninkáxontima iki, ikaxbira nokon koshi Egiptonko en paketi iki, ani jawékibo atikeskabiakin jato kopi axonra nokon joni israelitabo en jainoa jato pikoti iki.
5 Nokon koshi shinanman Egiptonko jawékibo axon jato oinmaxon, jainxon israelitabo en jainoa pikoketianra egipciobaon onankanti iki, ea riki, Ibo ixon —akin.
6 Moisés betan Aarónmanra jaskara ati Ibon yoia keská jatíbi aká iki.
7 Faraón betan yoyo inontianra, Moisés posaka chonka baritiaya iká iki, jatianra Aarón posaka chonka kimisha baritiaya iká iki.
Aarónman kekoti
8 Moisés itan Aarónra Ibon yoia iki:
9 —Jatian faraónman mia jaskara iosma jawéki ati yoiara, min Aarón yoiti iki, jawen kekoti bixon, rononon ixon faraón bebon maiki potati —akin.
10 Moisés itan Aarónra faraónhiba kaa iki, jatianra Ibon jaskara ati yoia akana iki: Faraón betan jawen joni koshibo bebonxonra Aarónman jawen kekoti maiki potaa iki, jatianra rono baneta iki.
11 Jatianra faraónman jawen onanya jonibo jato kenamaa iki, jabo bexonra jaton onannaton Aarónman aká keskáribi akana iki:
12 Westíorabaonra jaton kekoti maiki potakana iki, jatianra ja kekótibo westíorabo rono baneta iki. Jaskákenbira Aarónman kekoti ronoaton ja onanyabaon kekoti ronoabo pikin keyoa iki.
13 Jaskáakenbira, faraónman jawen keena keskares aká iki, jatora yoiti ixonyamaa iki, jaskara iti moa Ibon yoia keskára iká iki.
Jan masá teneti jimi
14 Jaskaa pekáora Ibon Moisés yoia iki: —Faraónra jawen keena keskáres akin, israelitabo rankashamai.
15 Ikaxbi bakish yamékiri paron kaai ipakeaitianra min oinni kati jake. Jain kexáxon manawe, ja ronoibata kekoti botanwe.
16 Jainxonra min yoiti jake: ‘Ja hebreobaon Ibo Diossenra, mia yoinon ixon ea miiba raanke: Minronki jawen jonibo katánon ixon jenexonti iki, tsoa jonibi jain jaama mananman boxon já rabii bokanon ixon. Jaskara ikenbira ramakamanbi min jawen joi ninkaxonyamai.
17 Jaskara ikenra, Ibon yoike: Ramara min onanti jake eara Ibo iki, ixon. Ja nato en tsomaa kekótinin Nilo paro jene en rishkiara jimi banetai.
18 Ja yapabora keyóti iki, ja paro ikonbiresi pisiketianra keráskin egipciobaon onpax xeakantima iki’ —akin.
19 Jainxonribira, Ibon Moisés yoia iki: —Aarón yoiwe jawen kekoti sananon parobo ikaiori, weanbo ikaori, ianbo ikaori, jainoax Egiptonko jain onpax akanabo ikaori; jatíbi jain onpax ikainkobo jimi inon ixon. ¡Jaskataxa jatíbi ja jiwi chomonkobo itan makan chomonkobobi jimi iti iki! —akin.
20 Jatian Moisés betan Aarónmanra, Ibon jaskáati yoia keská akana iki. Faraón betan jawen joni koshibo bebonxonra jawen kekoti sanantaanan Aarónman paro jene rishkia iki, jatianra jatíbi Nilo paro jene jimi baneta iki.
21 Yapabora mawata iki, ja Nilo parobira kikinbires pisi iká iki, jaskara iketianra egipciobaon jainoa onpax xeayamakana iki. ¡Jatíbi Egiptoainoa onpaxa jimi iká iki!
22 Ikaxbira egipcio onanya jonibaon jaton jaskáaxon ati onanna meranxon jaskararibi akana iki. Jatianra faraónman jawen keena keská akin, Moisés betan Aarónman joi ninkáxonyamaa iki, jaskara iti moa Ibon yoia keská ikin.
23 Ja jawéki moa jawebi onankashamabaini faraón ja apo ikax jain iti xobonko karibaa iki,
24 jatianra jakon onpax binoxon jatíbi egipciobaon paro kexa pozobo akana iki, ja paro onpax xeati jisáma iketian.
Jan masá teneti tokoro
25 Nilo paro jene Ibon rishkiibata, moa kanchis nete pekáora,