2 “Nato oxera matonashaman iti iki, jara baritia peokootaitian reken oxe iti iki.

3 Jatíbi israelita jonibo jato yoiwe: ‘Ja nato oxe chonka neteya iketianra, maton xobotíibi westíora carnero iamaxon westíora cabra beti iki.

4 Ikaxbi westíora xobonko ichama ixon, ja yoina retea pikin keyoti jisáma iketianra, xobo ibon ja patax iká ochómakeabo, jatí joni ixon piti senen toponxon jato meniti iki.

5 Ja yoinara westíora baritiaya iti iki, bene jawe jakonma néeomara iti iki, carnero iamax cabrara iti iki.

6 Ja oxe chonka chosko nete ikai kamanra reteyamaparikin maton benxoati iki, ja nete senenketianra jatíbi israel jonibaon yantánpaketaitian ja yoina reteti iki.

7 Ja yoina retea jimi bixonra jainxon maton piai xobo xepóti katemai iká jiwi jimin maton sikati iki.

8 Ja yaméra, chiikan xoia nami maton piti iki, xobi mokaya itan levaduraoma aká panyara maton piti iki.

9 Nami paxa iamax kobinra westíora pakéxbi maton pitima iki. Jatiobi yoinara, jawen mapo, taebo, pokoboyabi chiikan xoia iti iki,

10 jainxonra jawebi bakish ati maton texeatima iki. Texea jaketianra, maton menoti iki.

11 Ja pikinra chopa sawexon itan tasaweti sawexon kekoti tsomáyaxon, ishton ja yoina maton piti iki. Jara Ibon Pascua fiesta iki.

12 Ja yaméra, jatíbi Egiptonko ea winoti kaai, jatianra egipciobaon jaton reken bakeboyabi jaton yoinanin reken bakebo, en jato retei kaai, jainxonra Egiptonkonia jatíbi diosbo jan jato masá tenemai iki ixonra en yoiti iki. Ea Ibo ixonra en yoike.

13 Ja mato jain iká xobobora onanti inon ixon xepóti katemai iká jiwi, jimin maton sikati iki. Jatianra, egipciobo retekinbi, mato westíorabi en retetima iki, ja jimin sikaa oinnaxa ea winóresti iki.

14 Natora maton ja shinanti nete iki, Ibo kikin shinankinra ani fiesta maton ati jake. Jatíbitian senenhati esé iketianra papaboibakea bakebaon tekikin senenhati iki.

15 Kanchis nete senenra levaduraoma aká pan maton piti iki; ja senenai kamanra, ja reken netebi maton xobobaon levadurabo yamati iki. Jaweratonki ja kanchis nete senenamabi levaduraya aká pan piai, jara Israel jonibo xaranmea maton potati iki.

16 Ja reken nete itan ja senenainbi iká kanchis netenra, Ibo rabii mato tsinkíti iki. Ja netebora mato teetima iki, maton piti akíbichora mato iti iki.

17 Ja levaduraoma pan ati fiestara, maton ati jake, ja netera Egiptonkonia jatíbi en mato pikoa iki. Jatíbitian ja senenhati esé iketianra papaboibakea bakebaon tekikin senenhati iki.

18 Ja reken oxe chonka chosko nete yantan peoxonra ja rabé chonka westíora nete kaman levaduraoma aká pan maton piti iki.

19 Kanchis nete senenra, maton xobonko levadura yamati iki, jaweratonki levaduraya aká pan piai jara israelitabaon jemamea maton pikoti iki. Wetsankoniax joa itan ja mainmea inonbira maton pikoti iki.

20 Jatianresparira, levaduraoma aká jawebi maton pitima iki. Wetsankobires mato janonbira, levaduraoma aká pan maton piti iki’ ”, akin.

21 Jatianra Moiséssen israelita joni koshibo kenama bekanketian jato yoia iki: “Kaxon bitankanwe westíora carnero iamax westíora cabra maton awin betan bakeboyaxon maton pinon, Pascua fiesta akin maton retenon jainpari benxoakanwe.

22 Ja jimira, bandejanin maton biti iki; hisopo poyan senbóaxon, ja jimin pokoxonra xepóti katemai iká jiwi, maton sikati iki. Ja nete xabataitianra tsoabi xobonkoniax mato pikótima iki.

23 Egipciobo retei joxonra Ibon ointi iki, maton xobo xepoti katemai iká jiwi jimin sikaa, jatianra ja xobonko jikiamai winóresti iki. Jaskaaxonra Ibon ja retemis maton xobonko jikimatimaa iki.

24 Jatíbitian senenhati esé iketianra, maton chiní bakeboyaxonbi, nato ja ati yoia joi maton meketi iki.

25 Jaskaakin mato meniti ixon Ibon mato yoini mainko moa jikixonra, ja yoini keskáakin nato fiesta maton aresti iki.

26 Jatianra maton bakebaon mato yokáti iki: ‘¿Nato yoina reteax ikanaiki jawe yoii iká iki?’ akin.

27 Jatianra maton jato yoiti iki: ‘Nato yoinara Pascua fiesta iketian Ibo kikin shinankin reteti iki. Egipciobo retei kaax Egiptonko iká israelitabaon xobonko jikiamai winóresa iki, jaskáxonra non kaibobo reteyamaa iki’ ”, akin. Jatianra israelitabo Ibo rabii beóbainkana iki,

28 jaskata pekáora moa bokana iki, jainxonra Ibon Moisés betan Aarón yoia keskáshamanhakin akana iki.

29 Ja yamé pochínikonra jatíbi egipciobaon reken bakebo, xobobotiibi Ibon jato retea iki, faraónman yakátinin yakata jawen reken bakeribira aká iki, cárcel meran akanabaon reken bakeboyabi, jainxonra jatíbi yoinabaon reken bakeboribi retea iki.

30 Faraónra jawen joni koshibo betan jatíbi egipcioboyabi, ja yamé wenitax, kikinbiresi chexakaati jatíbi Egiptonko saa ikana iki. Westíora xobonkobira mawá maxkáyamaa iki.

31 Ja yamébira faraónman Moisés betan Aarón kenamaa joketian jato yoia iki: —Moa botankawe, mato itan israelitabo nokon jonibo betan moa iamakanwe. Ja maton yoia keskáakin Ibo rabii botankanwe.

32 Maton carnerobo betan maton wakabo botankanwe, ja kakasi mato ipachoai keskati, moa botankanwe. Jainxon ea kopi Dios yokakanwe —akin.

33 Egipciobaonra israelitabo jaton mainmeax moa ishton pikóti jato yoia iki, jabaon shinanara moa jatikaxbi mawatai iká iki.

34 Israelitabaonra levaduraoma akáma harina mein, chomon axon jatíbi jaton chopan kawaxon iakana iki.

35 Jainxonribira, Moiséssen jaskaati jato yoia, egipciobo oro betan plata aká jawékibo jato yokákana iki, chopaboribira jato yokákana iki.

36 Ibonbi imaara israelitabaon jato yokatabo, egipciobaon jakonshaman shinanyaxon jatíbi jato menikana iki, jaskáaxonra israelitabaon, egipciobo jatíbi jawéki jato boonkana iki.

37 Israelitabora Ramsésainoax pikotax Sucothain taenbi bokana iki. Ainbobo betan bakebo toponyamakin moa sontáro iti senen jonibobichores toponara sokota pacha waranka iká iki.

38 Jato betanra meskó jonibo ichabires bokana iki, jainxonra icha carnero betan waka bokana iki.

39 Egipciobaon jaton mainmea jato pikoa boi ishtonai kopíra, kakin ja piti ayamakana iki, jaskákinra Egiptonkonia harina mein bokana, levaduraoma bata panbores akana iki, paemapari iketian.

40 Israelitabo Egiptonko jakanara, chosko pacha kimisha chonka baritia iká iki,

41 ja chosko pacha kimisha chonka baritia senenhai netenribira, Ibon jatíbi jato Egipto mainmea jato pikoa iki.

42 Ja yaméra koiranxon Egiptonkonia Ibon jato pikoa iki. Jara Ibon yamé iki, já shinanira, israelitaboribi oxakantima iki ja chiní bakeboribira jaskákanti jake.