2 Jatianra Ibon yokata iki: —¿Ja min tsomaaki jawe iki? —akin. Jatianra Moiséssen aká iki: —Kekóti riki —akin.

3 —Jatianra maiki potawe —akin Ibon aká iki. Jatianra Moiséssen maiki potaa iki, jaskaatianbira, ja kekóti rono baneta iki. Jatianra ja patax iamai Moisés ishtoa iki,

4 ikaxbira Ibon yoia iki: —Jinan yatanwe —akin. Jatianra Moiséssen ja rono yatana jakiribi moa kekóti baneta iki.

5 Nato min akára, Ibon mia nokoa ikonhakanti kopí min aká iki, jara min rekenbaon Dios iki, Abraham, Isaac, Jacobnin Dios

6 akinra Ibon aká iki. Rama min chopa meran xochi ponté min meken niawe. Moiséssen jawen xochinko meken niataanan tsekaxon oinnara moa yora payoti isiman yatana waxmen keska joxo iká iki.

7 Jatianra Diossen yoia iki: —Min meken xochinko niaribiwe —akin. Jatianra Moiséssen jaskáa iki, jatian jawen meken jakiribi tsekáara, jatíbi jawen yorayabi moa kikinni benxoa iká iki.

8 Japekáora Ibon yoia iki: —Rekenhakin ja oinxon onanti min akenbi ikonhayamaxon itan min yoiabi ninkáyamaxonra, jakiribi min jato axonaton mia ikonhakanti iki;

9 ikaxbi ja rabéakin ja oinxon onanti min jato axona jaweratobi ikonhayamaxon, itan min yoia mia ninkáyamakanketianra, Nilo paro onpax weaxon min maiki chikoti iki, ja paro onpax min chikoa maiki nokotaitianbira jimi banéti iki —akin.

10 —¡Jawe ireskiaipanon, Ibó! —akinra Moiséssen aká iki. Eara jakonni yoyo iti onanma iki, natora bakish itan ramabichoma iki, ja min yonoti betan yoyo ikaitianbichoma riki, moabira jaskara ea iká iki. Ja yoyo ikira jatíbitian ea kebénoresai, ika iki.

11 Jaskákenbira Ibon yoia iki: —¿Tsonki joni kexá menia iki? ¿Eamarin jato yoyo iosma imai, pabe imai, benche imai, iamaxon jato oinmaribati atipana?

12 Jaskara iketian, katanwe, mia yoyo ikaitianra ea mibé iti iki, jaskati mia yoyo itira en mia onanmati iki —akin.

13 Jatianra Moiséssen yoikin teaboresa iki: —¡Ea jaskáayamawe, Ibó, ea raanyamawe, wetsa jonikaya raanwe! —akin.

14 Jaskáaketianra Moiséski sináxon Ibon yoia iki: —¡Ikaxbikan min wetsa Aarón, ja levita jain ikayanon! Enra onanke jara jakoni yoyo ikai iki. Jaskarares ibápananra mia bechii já joai, jatianra mia oinnax ikonbiresi raroti iki.

15 Jabetan yoyo iwe, ja min yoitibo jatíbi yoiwe; mato yoyo ikaitianra ea mato betan iti iki, jainxonra en mato onanmati iki, ja maton ati jawékibo maton anon ixon.

16 Enbi yoiai keskákinra min Aarón yoiti iki, ja min yoiara tekikin Aarónman jonibo yoiti iki.

17 Nato kekóti botanwe, janra ratéti jawékibo min ati iki —akin.

18 Jatianra Moisés jawen rayos Jetronin xobonko moa kariba iki, jainxonra yoia iki: —Eara Egiptonko karibati jake, ja nokon kaibobo ikainko. Enra jato oinkasai jarésparikiakana ixon —akin. Jatianra Jetronin aká iki: —Jakon katanwe —akin.

19 Madián mainbipari iketianra, Ibon Moisés yoia iki: —Egiptonko karibatanwe, mia retekasi ikátiaibora jatíbi moa mawákana iki —akin.

20 Jatianra Moisés jawen awin betan jawen bake, burron peyásantanan Egiptonko jakiribi kaa iki, Diossen menia kekóti tsomáya.

21 Japekáora Moisés Ibon yoia iki: —Egiptonko nokóxonra, jaskara anon ixon en mia koshi menia, faraón bebonxon jatíbi rateti jawékibo min ati iki. Jatianra ja Israelitabo raankashamanon ixon, enbi imaa faraón yoitimati iki.

22 Jaskataitianra faraón min yoiti iki: ‘Ibora neskatai: Israelra nokon reken bake keská iki, iki.

23 Enra moa mia yoia iki, ea rabii kanon ixon, nokon bake min ea raanxonti; ikaxbi min ea raanxonyamaketianra, min reken bake en reteai’ —akin.

24 Jatian moa kaai jawen awin betan jawen bakeya bain oxaa yaméra, Moiséski pikoxon Ibon retekasa iki.

25 Jaskaaitianra Séforanin makan chichikanin jawen baken jakina rebichi xatea iki; jaskaaxonra ja baken jakina rebichinin taenko tii axon Moisés yoia iki: “Ikonshaman jimi kopíbichoresiki mia nokon bene”, akin.

26 Jatianra Ibon Moisés moa kanon ixon jenea iki. Jakina rebichi xatea jimi kopíresiki Moisés nokon bene ikira Séfora iká iki.

27 Jatianribira Ibon Aarón yoia iki: “Tsoa jonibi jain jaama mananman kaxon Moisés bechitanwe”, akin. Jatianra Aarónman kaxon Diossen mananmamea Moisés nokoa iki. Jainxonra jowé akin betsó aka iki.

28 Jatianra Moiséssen Aarón yoia iki, jatíbi jawéki Ibon yoiti yoiabo, ani ratéti jawékibo axonti yoiaboribira yoia iki.

29 Jainoaxa Israel joni koshibo tsinkii, rabekaxbi Egiptonko kaa iki,

30 jatianra jatíbi Ibon Moisés yoiabo Aarónman jato yoia iki, ani ratéti jawékibo jonibo bebonxon Diossen ati yoiaboribira aká iki.

31 Ikon riki ixonra jonibaon shinanna iki. Noa onitsapitaira Ibon oinke ikira ikana iki, jaskataxa Ibo rabii onanti inon ikax beokana iki.