2 Ikaxbira faraónman jato yoia iki: —¿Jatian ja Iboki tsoa iki, jawen joi ikonhaxon ja israelitabo en jato raanti? Jawekeskaxonbira ja Ibo en onanyamake, jaskara ixonra jaweskaxonbi israelitabo en jato raanyamai —akin.

3 Jatianra jabaon yoia iki: —Hebreobaon Diossenra noa nokoa iki; jaskara iketianra tsoa jonibi jain jaama mananman noa bokanai, kimisha nete bain kaax nokóti ochóra, noa kaai, Dios yoina retexon menoxonira noa kaai, jakonma isin iamax reteanantiainra noa mawámanake —akin.

4 Ikaxbira Egipto apon jato yoia iki: —Moisés betan Aarón, ¿Jaweatiki jonibo teetaibi maton teai? ¡Moa teetankanwe! —akin.

5 Jatianra faraónman jato yoiribia iki: —Rama ichaira israelitabo nato main jaketianki, ¿Maton tee jenemakasai? —akin.

6 Ja netebira jan jato teemati joni koshibo itan jato teemaibaon koshibo faraónman jaskara akanti jato yoia iki:

7 —Jayá ladrilloati xobi pei taxo choshi moa apachoai keskáakin israelitabo moa jato meniamakanwe; ¡Jatonbi xobi peí choshi bibatankanon!

8 Ikaxbira moatianbi peoxon rama kamanbi jatí icha ladrillo akanatii, akanon ixon yoixon jato senenhamakanwe. ¡Westíora ladrillobira maxkata iti yamake! Jabora chikishbo iki, ja kopira ikanai saí iki: ‘¡Non Dios yoina menoxonon bokanwe!’ iki.

9 Ja jonibo kikinbiresakin koshi teemakanwe; jato tantimayamakanwe Moisés betan Aarónman janso joibo ikonhayamakanon ixon —akin aká iki.

10 Jato teemaibo betan jaton joni koshibaonra kaxon jonibo neskáakin yoikana iki: —Faraónmanra yoike xobi pei taxo choshi moa mato menitima.

11 Ramara matonbi benai kati jake, jaweranoaki maton nokoai jainoara maton biti iki. Ikaxbi jaskai kopíra, jatí icha ladrillo maton anon ixon yoiati naman maton atima iki —akin.

12 Jatianra israelitabo Egipto mainko jatíbiain janbiskana iki, ja xobi taxo choshin toan, jiwi pei choshi jayá ladrilloati benai.

13 Netetiibira faraónman jato teemai koshibaon jatí icha ladrillo ati yoixon jato senenhamakana iki, ja xobi pei taxo choshi menia apachoaitibiri ladrillo akantira jato yoikana iki.

14 Jatianra ja tee ointi koshi faraónman imaabaon, jato teekinti koshibo jaton imaa israelitabo rishkikana iki, jainxonra jato yoikana iki: —¿Jawekeskákinki bakish itan rama nete, ja maton apachoaiti ladrilloakin maton senenhamaa iki? —akin.

15 Jatianra israelita joni koshibo jakonmaakana faraónhiba keshai kaxon yoikana iki: —¿Jaweatiki mia apo ixonbi, noa min yonotibo ikenbi, min noa jato jaskáamai?

16 Noara moa xobi pei taxo choshi meniamakanai, ja meniamakinbira, ladrillo ayamama ati noa yoikanai, jainxonribira noa rishkikanai. ¡Jabaon noa jayá ati meniamakana kopí riki, non senenhati atipanyamaa, non apó! —akin.

17 Jaskákankebira faraónman jato yoia iki: —¡Matora wetsama iki, chikishbo ikaxa mato ikai jaskati! Ja kopíra neskatibo mato ikai: ‘Non Ibo yoina menoxonon bokanwe iki mato ikai’.

18 ¡Moa teetankanwe! Mato xobi pei taxo choshi meniamakanabira ja apachoaiti icha ladrillo maton ea meniti jake —akin.

19 Ja netetiibi jatí icha apachoaiti naman ladrillo atima jato yoiara, israelita joni koshibaona atikoma iká iki.

20 Ja faraón betan yoyo ikax pikóbainkinra, Moisés betan Aarón jato manaax ikanaitian nokokana iki,

21 jatianra israelita joni koshibo jato yoia iki: —Abánon Ibon jaton aká jawéki oinxon jato masá tenemakin. Mato kopí riki faraón betan jawen joni koshibaon noa jakonmakin oinnai. Jaki paranaxon noa retetira matonbi ake —akin.

22 Jatianra Moiséssen orankin Ibo yoia iki: —Ibó, ¿Jaweatiki nato jonibo min ramiai? ¿Jaweati min ea raannarin?

23 En faraón min janenko yoyo anontianbira, faraónman bebonbires min jonibo ramiai, jatianra jato pikonoxon min jawebi ayamai —akin.