2 Jainoaxa moxa jiwishoko zarza chii tiritai meranoax, Ibon ángel jaki pikota iki. Jatianra Moiséssen kikinhakin oinxon onanna iki, ja moxa jiwishoko zarza tiritibi menoti keyóyamai.

3 Jatianra shinanna iki: “¡Jawe jawékibira jaskaisma iki! Oinparibatanon, jawe kopíki ja jiwishoko zarza tiritibi keyóyamai”, ixon.

4 Jatianra Ibon oinna ja oinni kaai Moisés jaki ochómaitian, moxa jiwi zarza meranxon kenaa iki: —¡Moisés! ¡Moisés! —akin. Jatianra Moiséssen aká iki: —Neno riki ea —akin.

5 Jatian Diossen yoia iki: —Ochoma joyamawe. Min sawea taopewe, jain mia niara iresama mai iki —akin.

6 Jainxonra yoiribia iki: —Eara min rekenbaon Dios iki. Ea riki Abrahamman, Isaacnin, jainoax Jacobnin Dios —akin. Jatianra Dios ointinin rakékin, Moiséssen jawen bemanan mapoa iki,

7 ikaxbira Ibon yoiboresa iki: —Egiptonko iká nokon jonibaon jaskáakin masá teneaira en akonbireskin oinke. Jato teemaibaon jato aká isin tenei ishi ianan jakonmai yoyo ikanaira en ninkáke, ja masá tenekanaira en akonbireskin onanke.

8 Egipciobaon koshinkonia jato kishpinmati kopíra ea joke; nato mainmeara en jato tsekai, ani itan mai jakonhainra en jato boai, jainra icha leche itan mishkin jake. Ja main jabora cananeobo, hititabo, amorreobo, ferezeobo, heveobo itan jebuseobo iki.

9 Ointa, israelitabo masá tenei jakonmai yoyo ikanaira en ninkáke, egipciobaon akonbireskin jato isinhakana masá tenemakanairibira en oinke.

10 Jaskara iketian, moa katanwe, Egiptonkonia nokon joni israelitabo tsekanon ixonra faraónhiba en mia raanai —akin.

11 Ikaxbira Moiséssen Dios yoia iki: —¿Jatianki ea tsoa iki, Egiptonkonia israelitabo tsekai ea faraón bebon kati? —akin.

12 Jatianra Diossen yoia iki: —Eara mibé iti iki, ja enbi mia raanai onantira neskara iti iki: Jawetianki, Egiptonkonia nokon jonibo min tsekai, jatianra nato mananmanxon jatíxonbi maton ea rabiti iki —akin.

13 Ikaxbira Moiséssen yoia iki: —Kaxon israelitabo en yoiabira atikoma iti iki: ‘Maton rekenbaon Diossen ea matoiba raana riki’, akin en jato aketianra, ea yokákanti iki: ‘¿Jawe janerin?’ akin. Jatianki, ¿En jaweraki jato yoiti iki? —akin aká iki.

14 Jatianra Diossen yoia iki: —Eara Ea Iki. Jatianra ja israelitabo min yoiti iki: ‘Ja Ea riki ikaitonriki ea matoiba raana’ —akin.

15 Jainxonra Diossen Moisés yoiribia iki: —Jainxonribi israelitabo yoiwe: ‘Ja Ibo, maton rekenbaon Dios, ja Abraham, Isaac itan Jacobnin Diossenra matoiba ea raanke’. Nato nokon janera jatíbitianbires iki; ja janera jatíbi pacha baritiabo winókaaibi jabi iki.

16 Kaxon, Israel joni koshibo tsinkixon jato yoitanwe: ‘Ja maton rekenbaon Ibo Dios, ja Abraham, Isaac, Jacobnin Diossenra, Egiptonkoxon mato masá tenemakanai oinxon, matoakin shinanxon eki pikoxon ea yoike.

17 Jainxonribira ea yoike Egiptonkoxon maton masá teneaitian jainoa mato tsekati, jainxonra ja cananeo, hitita, amorreo, ferezeo, heveo itan jebuseobaon mainko, jain icha jawékiati ja mainko, mato boai ea yoike’, akin.

18 Min yoiara, joni koshibaon mia ninkáxonkanti iki; jatianra Egipto apo oinni jato betan mia kati iki, jainxonra min yoiti iki: ‘Ja Ibo Dios, ja hebreobaon Diosra noki pikóke. Jaskara iketian, tsoa jonibi jain jaama mananman noa kabatanon noa jenewe, nenoax kimisha nete bain kaxonra, non Ibo Dios yoina retexon non menoxonti iki’, akin.

19 Ikaxbi ja Egipto apo jato raankashamai jaskataira, en kikinhakin onanke, jeen inon ixon akonbireskin en teayamaara jato raantima iki.

20 Jaskara iketianra, nokon koshi en pikoti iki, egipciobo mawánon ixonra jaton mainxon jatíbi ratéti meskó jawékibaon en jato isinhati iki; jaskara iká pekáora Faraónman jato pikómati iki.

21 Jainxonribira, en amaa egipciobaon, israelitabo jakonhati iki, jaskataxa ja pikoti boí jawebioma bokantima iki.

22 Ainbobaonra westíoraxonbo jato patax iká egipcio ainbobo, iamaxon jabé jaa wetsa ainbo inonbi, plata aká jawékibo, oro aká jawékibo, itan ja saweti chopabo meninon ixon yokákanti iki, jabora maton benbo bakebo, itan ainbo bakebo maton sawemati iki, jaskáxon jatíbi jawéki egipciobo maton bichinara, jawékioma banékanti iki —akin aká iki.