2 jara toota iki, jaskatax westíora benbo bakeya iká iki. Jan oinna ja benbo bake metsá iketianra, kimisha oxe senen jonea iki;

3 ikaxbi, bebonbires basi joneti atikoma iketianra, junco pei tasá bixon, senpa betan boín jatíbi xabábo jene weinaketian xépokin boyaa iki, jaskáaxonra ja bake ja tasá meran axon, Nilo paro kexá junco pei meran aká iki;

4 jainxonra, ja bake jawekeskabo winónaketian ochóchaaxon ointi ja baken poi yoia iki.

5 Jaskáaxon iikin oinnara, faraónman bake ainbo paron nashii ipakea iki, jatianra jawen yonoti ainbobo betan paro kexa kawaantankin, junco pei meranoa tasá meraa iki. Jatianra jawen yanka yonoti ainbo, ja tasá biti raana iki.

6 Ja tasá kepentaanan oinnara, westíora benbo bake ja tasá meranoax winii iká iki, ja faraónman bake ainbaonra noibakin onisaa iki, jatianra neskata iki: —Natora hebreo benbo bake iki —iki.

7 Jatianra neskara akáki jawekeska iti iki ixon, ja baken poin, ja faraónman bake ainbo yokata iki: —¿Min jisáki jakon iti iki, jan bake aniai hebreo ainbo, jan nato bake xoma amati en kenati? —akin.

8 —Ja ainbo ointanwe —akinra faraónman bake ainbaon aká iki. Jatianra ja xontako ja baken tita kenai kaa iki,

9 jatianra moa joketian ja faraónman bake ainbaon, yoia iki: —Nato bake bixon, ea aniaxonwe, ja min tee kopíra en mia kopíati iki —akin. Ja bakera jawen titan boxon, ania iki,

10 jatianra moa bake aniketian, faraónman bake ainbo jawen titan menia iki. Jara jawen bakebi keská itiakin onanhakin bia iki; jara Moisés akin janea iki, jainoaxa neskata iki: —Enra jenemea bia iki —iki.

11 Jatianra moa anii senenax, Moisés jawen kikin kaibobo oinni kaa iki, kaxon jato oinnara, ikonbires chorish tee akí ikana iki. Jainxonra meraa iki, westíora egipcionin jawen kaibo israelita rishkiaitian.

12 Jatianra jatíbiain oken oinbekonabi jain tsoabi yamaketian, ja egipcio joni retexon, mashin miinna iki.

13 Ja wetsa nete xabáketianra, jakiribi karibaa iki, jatianra rabé israelita reteananai oinna iki. Jatianra jan ramiakin peoa yokata iki: —¿Jaweatiki min kaibo ikenbi ja meeti mia iitai? —akin.

14 Jatianra ja hebreonin yoia iki: —¿Tsonki noo xaran koshi itan joi benxoai iti mia imaa iki? ¿Minki ja egipcio aibata keskáakinribi ea reteti shinanai? —akin. Ja ninkataxa Moisés raketa iki, jan egipcio joni reteibata moa onankanke ikax.

15 Jaskaakin Moiséssen egipcio joni retea onanxonra, faraónman retenoxon jato benamaa iki; ikaxbira jabati kaax Moisés Madián mainko jaa iki. Jain ikaxa pozo patax yakata iki.

16 Madiánhinoa jonin janera Reuel iká iki, jara ikonma sacerdote iká iki, jara kanchis bake xontakoya iká iki. Ja netera, jabo jaton papan carnerobo onpax xeamanoxon pozonkonia onpax bixon jain onpax atinko bochoai bokana iká iki,

17 ikaxbira yoina koiranaibo bexon jawetires ixonbi jainoa jato potaa iki. Jatianra Moiséssen wenixon jato akinna iki, jaskáaxonra ja carnerobo onpax xeamaa iki.

18 Jatianra ja xontakobo, jawen papa ikain banékanketian, jan jato yokata iki: —¿Jawe kopíki, rama mato ishtonhira joá? —akin.

19 Jatianra jabaon yoia iki: —Westíora egipcio joninra, yoina koiranaibaon noa ramiati ikenbi noa akinke, jaskáa pekáora onpax bixon, non carnerobo noa xeamaxonke —akin.

20 Jatianra Reuelnin jato yoia iki: —¿Jatianki ja joni jawerano iki? ¿Jaweatiki maton jabicho potabeirana? ¡Pii jonon kenatankanwe! —akin.

21 Jatian jaskatax Moisés Reuelnin xobonko jaai banénox, jen ika iki. Japekáora Reuelnin jawen bake Séfora awinhanon ixon menia iki,

22 ja ainbaon bakeara benbo iká iki, jara Moisésnin Gersón akin janea iki, já yoyo ika iki: “Wetsankoniax joaxa, wetsa main ea iitai”, iki.

23 Moa basi iitira, Egipto apo mawata iki. Jaskara ikenbira israelitabo yanka yonokataipari ikax, chexakaati ishi iki yoyo iananbi winikana iki. Jatianra onisaitian Diossen jato ninkata iki,

24 jatianra masá tenei joikanaitian jato akinna iki, ja Abraham, Isaac, jainoax Jacob betan ja senenhabekonti joi aní shinanxon.

25 Jaskara tenekanaitian onanxonra jato Diossen oinna iki.