2 Rubén, Simeón, Leví, Judá,

3 Isacar, Zabulón, Benjamín,

4 Dan, Neftalí, Gad jainoax Aser.

5 Jatíbi Jacobnin chiní bakebora kanchis chonka ikana iki. Joséra moabi Egiptonko iká iki.

6 José betan jawen wetsabo, jainoax jatíbi ja janontian janí jonibora mawákana iki;

7 ikaxbira israelitabo icha bakeax ikonbiresi kaiax kikinbires koshi ikana iki. Ja maira ja jonibaonbires bochoa iká iki.

8 Jawetio basi iitira, Egiptonko bená apo iká iki, janra José onanama iká iki, jaskákinra jawen jonibo yoia iki:

9 “Oinkanwe, israelitabora noa xewina icha ikanai, itan noa winoa koshi ikanai;

10 jaskara iketianra, bebon kaikanaketian shinanshamanxon jan jato bechiteti non ati jake, jaskáayamabira, reteanantitian noa akí non rawíbo betan rabékanti iki, jaskatax nato mainmeax bokanti iki”, akin.

11 Jaskákinra egipciobaon israelitabo akonbireskin jato yankabires koshi teemanoxon jan jato koiranxon imatibo janepakekana iki. Pitón betan Ramsés jemara jato amakana iki, ja jemabaonra faraón Egipto apon, jawékiatibo benxoai iká iki.

12 Ikaxbi akonbireskin isinhakin jato masá tenemakanabira, bebonbires kaikana iki. Jaskara iketianra, egipciobo ikonbiresi jatoki rakékana iki.

13 Ja egipciobaonra, yanka yonokin israelitabo akonbireskin jato masá tenemakana iki.

14 Ladrilloai mapó meínni kerásti teera jato amakana iki, jainxonra jatíbi wain teebo amakin jato isinhakana chexakakin masá tenekana iki. Jatíbi jaskarabo amakinra, israelitabo akonbireskin jato masá tenemakana iki.

15 Jaskáaribakinbira, ja hebreo ainbobo jan bakenmai Sifra betan Fúa, Egipto apon yoia iki:

16 —Jawetianki hebreo ainbobo maton bakenmai, ja pikóbena jawen jakina oinkanwe. Ainbo iketian reteyamakanwe, ikaxbi benbo iketian ¡Retekanwe! —akin.

17 Jaskara ikenbira jato bakenmaibaon, Dioski rakékin, Egipto apon yoia keská senenhayamakana iki, jaskákinra benbo bakebo reteyamakana iki.

18 Jatianra Egipto apon ja ainbobo kenamaxon jato yoia iki: —¿Jaweati benbo bakebo maton reteyamaarin? —akin.

19 Jatianra ja ainbobaon yoia iki: —Hebreo ainbobokayara egipciobo keskáma iki. Jaskarama ikaxa jaton yora koshiorabo ikax, jato imai noa nokotamatianbi moa bakenkanai —akin.

20 Jaskataxa israelita jonibo bebon kaikareskana iki, jainoaxa ikonbiresi koshikareskana iki.

21 Ikaxbi jato bakenmaibo Dioski rakékanaitianra, jan jato jakonhakin akinna, jaton rareboribi icha kaikana iki.

22 Jatian Faraónmanbiribi, jatíbi jawen jonibo jato yoia iki: “Jatíbi hebreo benbo bake pikotaibo jeneki potakanwe, ikaxbi ja ainbo bakebo reteyamakanwe”, akin.