3
Qamkuna kaqman shamuyta mana kamäpakurmi pasaypa llakikushqä. Tsaymi Atenas† markacho kikilläkuna kayänäpä kaptinpis 2 qamkuna kaqman wawqintsik Timoteuta kachamurqä. Musyayanqaykinöpis Timoteuqa Tayta Diospa sirviqnin karmi Jesucristupa alli willakuyninta willakur puriykan. Paymi yachatsiyäshunki y shakyätsiyäshunki Jesucristuman yärakuyänaykipä.3 Tsaynö shakyätsiyäshuptikimi runakuna chikiyäshuptikipis llakikuyankitsu. Musyayankimi Jesucristuman criyikunqantsikpita runakuna ñakatsimänantsikpä kanqanta. 4 Tsaynöllami qamkunawan kaykarpis willarqä Jesucristuman yärakunqantsikpita runakuna chikimänantsikpä kanqanta. Tsay ninqänöllami llapanpis päsaykan. 5 Tsaymi qamkunapä llakikur Tayta Diosman yärakuyanqaykita musyanäpä Timoteuta kachamurqä. Pasaypami llakikurqä Satanás ima tsapatapis churapäyäshuptiki Jesucristuman manana yärakuyanqaykita yarpar. Tsaynö kaptinqa alli willakuyta willanqäkunapis manakaqllapämi kanman karqan.
Tesalónicapita Timoteo kutinqan
6 Qamkuna kaqpita Timoteo kutiykamurmi willamashqa Tayta Diosman shumaq yärakuyanqaykita y kuyanakuyanqaykitapis. Tsaynöpis willamashqa noqakunapä llakikur kutiyämunäta munaykäyanqaykita. Tsaymi noqakunapis watukakuq kutimuyta yarpaykäyä.† 7 Shumaq yärakuyanqaykita willayämaptinmi ñakarpis kushishqa kaykäyä. 8 Alli kaykäyanqaykita musyaskirmi shonqükunapis atsikyarkushqa.
9 Tayta Diosnintsik yanapayäshunqaykipita pasaypa kushikur llapan shonqükunawanmi payta agradëcikuyä. 10 Tsaymi paqaspapis junaqpapis llapan shonqükunawan payta mañakuykäyä qamkunaman kutiyämunäpä. Chämurnami masta yachatsiyäshayki Tayta Dios munanqannö kawayänaykipä.
11 Qamkuna kaqman watukaqnikikuna kutiyämunäpä Yayantsik Tayta Dios y Señornintsik Jesucristo yanapaykayämätsun. 12 Señor Jesucristo yanapaykuyälläshuy qamkunata kuyanqänölla kikikipura y wakin runakunawanpis kuyanakur kawayänaykipä. 13 Tsaynöpis yanapaykuyälläshuy llapan shonquykikunawan yärakur pay munanqannö kawayänaykipä. Tsaynöpami salvanqan runakunawan Señornintsik Jesucristo kutimuptin Yayantsik Tayta Diospa ñöpancho jutsaynaq kayanki.