Tayta Dios munanqannö kawanantsikpä yachatsikuy
4
Wawqikuna panikuna, Señor Jesucristupa jutinchömi qamkunata rugayä yachatsinqänölla Tayta Dios munanqannö imaypis kawayänaykipä. Pay munanqannö kawayanqaykita musyarpis qoyay qoyay sïguiyänaykipämi shakyaykätsiyä.2 Musyayankimi Señor Jesucristupa willakuqnin kar imata yachatsiyanqätapis. 3 Jutsaynaq kawayänaykita Tayta Dios munarmi fornicación jutsata rurayänaykita munantsu, 4 tsaypa trokinqa majaykikunawan respitanakur alli kawayänaykitami munan. 5 Manami munantsu Jesucristuman mana yärakuqkunanö llutankunata rurar jukwan jukwan kakuyänaykita. 6 Tsaynö kaptinqa ama mayqaykikunapis jukpa warminwan kakuyaytsu. Tsaynö kakurqa runa mayikitami engañaykanki. Willayashqänami tsaynö kaqkunata Señor Jesucristo mana kuyapaypa castigananpä kanqanta.
7 Manami jutsata rurar purinantsikpätsu Tayta Dios akramashqantsik, tsaypa trokinqa pay munanqannö kawanantsikpämi. 8 Kay yachatsiyanqäkunaman pipis mana yärakurqa manami noqakunatatsu penqakuyman churayäman, sinöqa Espíritu Santuta qaramaqnintsik Tayta Diostami.
9 Jukniki juknikipis kuyanakur alli kawayänaykipämi Tayta Dios tantiyatsiyäshushqayki. Tsaymi ministiyankinatsu kuyanakuyänaykipä tantiyatsinäta. 10 Macedonia provinciacho taq llapan wawqikunawan panikunawan alli kuyanakurmi kawaykäyanki. Tsaynö kaptinpis qamkunatami shakyätsiyä masrä kuyanakuyänaykipä.
11 Piwanpis mana rimanakur shumaq kawayay. Runa mayiki imanö kawanqantapis ama rikapäyaytsu. Tsaypa trokinqa yätsinqänölla ima aruyllachöpis arukuyay. 12 Tsaynö aruyaptikiqa manami imaykikunapis pishïyäshunkitsu y Jesucristuman mana yärakuqkunapis respitayäshunkimi.
Señor Jesucristo kutimunanpä ninqan
13 Wawqikuna panikuna, wanurpis kawarimunantsikpä kanqanta musyayänaykitami munä. Wakin runakunaqa wanur pamparäyanqallancho ushakäyänanpä kanqanta yarparmi pasaypa llakikuyan. Noqantsikqa paykunanö ama llakikushuntsu. 14 Musyantsikmi wanunqanpita Jesucristuta Tayta Dios kawaritsimunqanta. Jesucristuta kawaritsimunqannöllami payman yärakuqkunatapis Tayta Dios kawaritsimur Jesucristuwan qorikunqa.
15 Tsaymi Jesucristo yachatsinqannö noqapis qamkunata nï: Mayqantsikpis Jesucristo kutimunqan junaqyaq kawarqa manami wanushqakunapita mas puntatatsu paywan tinkuq aywashun. 16 Ciëlupita Jesucristo kutimuptinmi mandaq ángel jinchi qayakamunqan y Tayta Diospa cornëtanta tukamunqanpis wiyakämunqa. Tsay hörami Jesucristuman yärakuykar wanukuqkuna puntata kawariyämunqa. 17 Nirkurnami kawaqkunatapis qorikamäshun. Pukutay janancho Señor Jesucristuwan llapantsik tinkurmi paywan juntu imayyaqpis kawashun.† 18 Tsaynö kananpä kaykaptinqa kay yachatsinqäkunata yarpätsinakur jukniki juknikipis shakyätsinakuyay.