Noqa Pablo, wawqintsik Silvano^a y Timoteumi kay cartata cartakaykäyämü. Qamkunaqa Yayantsik Tayta Diospa y Señor Jesucristupa munayninchömi kaykäyanki. Tayta Dios [y Señor Jesucristo] kuyapäyäshurniki alli kawayänaykipä yanapaykuyälläshuy.

2 Qamkunapä Tayta Diosta mañakurmi imaypis agradëcikuyä 3 payman yärakur allillata rurayanqaykipita, pïmaywanpis kuyanakuyanqaykipita y imanö ñakarpis Señornintsik Jesucristo kutimunanta shuyaraykäyanqaykipita.

4 Wawqikuna panikuna, musyayämi Tayta Dios kuyar akrayäshunqaykita. 5 Tsayta musyayä alli willakuyninta Espíritu Santupa munayninwan willakuptï criyikuyaptikimi. Qamkunapis musyayankimi kuyayanqäta y Tayta Dios munanqannö kawayanqäta.

6 Noqakunapa conträ y Señor Jesucristupa contran shäriyanqannömi qamkunapapis contraykikuna shäriyan. Pasaypa ñakarpis Espíritu Santu yanapayäshuptikimi Jesucristupa willakuyninta kushishqa wiyakuykäyanki. 7 Tsayta musyarmi Macedonia y Acaya provinciakunacho llapan wawqikuna panikuna tantiyakuyan qamkunanö wiyakuyänanpä.

8 Qamkuna kaqpita aywarmi Señor Jesucristupa willakuyninta Macedonia y Acaya provinciakunapa päsar maytsaychöpis willakuykäyan. Willakuyninta willakuyanqannöllami shumaq yärakuyanqaykitapis willakuykäyan. Tsaymi maypa chäyaptïpis parlaykäyan Tayta Diosman yärakuyanqaykita. Mana willayaptïpis 9 maytsaychömi musyaykäyan shumaq chaskikayämanqaykita y ïdulukunata adorayänaykipa trokin imayyaqpis kawaq Tayta Diostana adoraykäyanqaykita. Payqa rasunpaypa kaq Diosmi.

10 Tsaynöpis musyaykäyanmi Tayta Diospa Tsurin Jesucristo gloriapita kutimunanpä kanqanta shuyaykäyanqaykita. Paytami Tayta Dios wanunqanpita kawaritsimushqa. Paymi juiciu final junaqcho castïgupita salvamäshun.