Mushuq kawayta chaskinqantsik
3
Jesucristuwan kawarimushqana kaykarqa gloriacho kaqkunata† ashiyay. Tsaychömi Tayta Diospa derëchancho Jesucristo jamaraykan.† 2 Kay patsallacho kawayänaykipä yarpachakuyänaykipa trokinqa gloriacho kawayänaykipä yarpachakuyay. 3 Qamkunaqa jutsa ruraypä wanushqana karmi† Jesucristuwan Tayta Diospa ñöpancho kawaykäyanki. Tsaynö kawayanqaykita runakuna kanan mana rikarpis 4 kawayta qomaqnintsik Jesucristo kutimuptinmi qamkunapis paywan gloriacho kayanki.5 Tsaynö kaykaptinqa jutsata mana ruraypa kawayay. Fornicación jutsata ama rurayaytsu ni shonquykikuna mana allikunata munanqanta ama rurayaytsu. Imaykayuq kayllapä ama yarpäyaytsu. Imaykayuq kayllapä yarpararqa ïdulukunata adoraqnömi kaykäyanki. 6 Tsaynö jutsa ruraqkunataqa Tayta Diosmi ajanarnin castiganqa.†
7 Qamkunapis ñöpataqa tsaynömi kawayarqayki. 8 Kananqa ama pitapis ajapäyaytsu, nanaparäyaytsu ni chikiyaytsu. Ama pipa wasantapis rimayaytsu ni manakaqkunata parlayaytsu. 9 Tsaynöpis jukniki jukniki llullapänakuyaytsu. Makwa latsapata jitariqnö unay kawaynikikunata kacharir† 10 pay qarayäshunqayki mushuq kawaytana kawayay.† Mushuq kawayta chaskikuyaptikimi kamamaqnintsik Tayta Dios qoyay qoyay tantiyatsiyäshunki pay kanqannö qamkunapis kayänaykipä. 11 Tsaymi Israel runa o mana Israel runa karpis, señalashqa o señalanni karpis, mana yachaq karpis, jäpa karpis, wätay o libri karpis Jesucristuman criyikurqa llapantsikpis paypa munayninchöna kawaykantsik.
12 Tayta Dios akranqan y kuyanqan santu runakuna kaykarqa jukniki juknikipis kuyapänakur kawayay. Tsaynöpis yanapanakuyay, mana yachaq tukur kawayay, pïmaypäpis alli shonqu kayay y pacienciakuyay.† 13 Imallapitapis ajanäyänaykipa trokinqa wiyaräkuyay. Qallayätsinakurqa perdonanakuyay. Jesucristo perdonashunqaykinölla qamkunapis perdonanakuyay.† 14 Imanö karpis kuyanakur jukniki juknikipis juk shonqulla kawayay.
15 Jesucristupitaa alli kawayta chaskishqa kaykarqa pïmaywanpis alli kawayay. Juk shonqulla kawayänaykipämi Tayta Dios qayayäshushqayki. Tsaynöpis Tayta Diosta imaypis agradëcikuyay. 16 Jesucristupa alli willakuyninta imaypis yarparäyay. Tsay willakuyninta shumaq tantiyakur yachatsinakuyay y cäsukuyänaykipä shakyätsinakuyay. Salmukunata, cantukunata y cörukunata cantar llapan shonquykikunawan agradëcikur Tayta Diosta alabayay. 17 Imata rurarpis y imata parlarpis Señor Jesucristupa jutincho rurayanki y parlayanki. Jesucristo salvayäshunqaykipita Tayta Diosta imaypis agradëcikuyay.†
Jesucristuman yärakuqkuna imanö kawayänanpäpis ninqan
18 Warmikuna, Señor Jesucristuta chaskikushqana kaykarqa runaykikunata cäsukuyay.
19 Ollqukuna, warmikikunata kuyayay. Ajapäyänaykipa trokinqa alli shimillaykikunapa tantiyatsiyay.
20 Wamrakuna, mamaykita y taytaykita imaypis cäsukuyay. Tsaynö cäsukuyänaykitami Señor Jesucristo munan.†
21 Wamrayuqkuna, wamraykikuna mana qallayäyänanpä llutallaqa ama ajapäyaytsu.
22 Wätaykuna, kay patsacho kaq patronnikikuna mandayäshunqaykita rurayay. Rikayäshunqayki hörallaqa ama aruq tukuyaytsu, tsaypa trokinqa Tayta Diospita mantsapakur llapan voluntänikikunawan aruyay. 23 Imata rurarpis runakunapänöllaqa ama rurayaytsu, sinöqa Señor Jesucristupänö llapan shonquykikunawan kushishqa rurayay. 24 Musyayankimi Señor Jesucristupita gloriacho herenciata chaskiyänaykipä kanqanta. Señor Jesucristumi rasunpaypa patronniki kaykan. 25 Mana alli ruraqkunataqa pï kaptinpis mana kuyapaypami Tayta Dios castiganqa.†