Colosenses
Colosas markacho taq yärakuq mayinkunaman apóstol Pablo cartakunqan
Apóstol Pablo winchikunqan
1
1-2 Colosas markacho kaykaq salvashqa kaqkuna:Noqa Pablo, Jesucristupa apostolnin kanäpä Tayta Dios churamashqa kaptinmi wawqintsik Timoteuwan cartakaykäyämü. Qamkuna Tayta Diospana karmi pay munanqannö kawaykäyanki. Yayantsik Tayta Dios [y Señor Jesucristo] kuyapäyäshurniki alli kawayänaykipä yanapaykuyälläshuy.
Tayta Diosta Pablo mañakunqan
3 Qamkunapä mañakur Señornintsik Jesucristupa Taytan Diostami imaypis agradëcikuyä. 4 Jesucristuman shumaq yärakuyanqaykita y yärakuq mayintsikkunawan kuyanakuyanqaykitami musyayashqä. 5 Tayta Dioswan gloriacho imayyaqpis kawayänaykipä kanqanta musyarmi tsaynö kawaykäyanki. Jesucristupa willakuyninta chaskiyanqayki junaqpita patsami gloriacho kawayänaykipä kanqanta musyayashqayki.
6 Jesucristupa alli willakuynin qamkunaman chämunqannömi maytsaymanpis chaykan. Tsay alli willakuyta chaskirmi Tayta Dios munanqannöna kawaykäyan. Qamkunapis Jesucristupa alli willakuyninta chaskikuyanqaykipita patsami Tayta Dios kuyakuq kanqanta tantiyar pay munanqannöna kawaykäyanki.
7 Tsay willakuyninta chaskiyänaykipäqa willakuq mayï kuyay Epafrasmi† willayäshushqayki. Paypis Jesucristupa sirviqnin karmi shumaq tantiyatsiyäshushqayki. 8 Epafrasmi willayämashqa Espíritu Santu yanapayäshuptiki kuyanakur shumaq kawaykäyanqaykita.
9 Tsaynö kawayanqaykita musyayanqä junaqpita patsami imaypis Tayta Diosta mañakuykäyä Espíritu Santu yachayta qarayäshuptiki Tayta Dios munanqannö kawayänaykipä. 10 Pay munanqannö kawar y imaypis allillata rurarmi qoyay qoyay payta reqiyanki.
11 Tsaynöpis mañakuykäyä munayninwan yanapayäshuptiki ima ñakaycho karpis mana ajayaypa payman yärakuyänaykipä 12 y imaypis kushishqa agradëcikuyänaykipä. Paymi salvamashqantsik llapan salvanqan kaqkunawan herenciantsikta chaskir gloriacho kawanantsikpä.
13 Satanáspa munaynincho kaykanqantsikpitami Tayta Dios jipimashqantsik† kuyay Tsurin Jesucristupa mandakuyninchöna kawanantsikpä. 14 Jesucristo [yawarninta jichar] rantimarnintsikmi jutsantsikpita perdonamashqantsik.†
Jesucristo llapanpitapis mas munayyuq kanqan
15 Tayta Diosta mana rikarpis Jesucristuchömi pay imanö kanqantapis tantiyantsik.
Payqa llapan kamanqankunapä punta yuriqmi kaykan.a
16 Paywanmi Tayta Dios kamarqan llapan imaykatapis:
ciëlucho kaqkunata, kay patsacho kaqkunata,
rikanqantsikta, mana rikanqantsikta
y ciëlucho llapan munayyuqkunatapis.†
Llapantapis kamarqan Jesucristuwanmi y paypa munaynincho kayänanpämi.
17 Manarä imapis kaptinmi Jesucristo kaykarqanna.
Llapan imaykatapis munayninchömi katsin.†
18 Jesucristumi umantsik.
Noqantsiknami iglesian kar cuerpun kaykantsik.†
Llapanpita mas puntata Jesucristo kawarimurmi pïmaypitapis mas munayyuq kaykan.†
19 Tsaynö munayyuq kananpämi Jesucristucho Tayta Dios kaykan.
20 Jesucristo kayninpami kay patsacho kaqkunawan y ciëlucho kaqkunawanpis Tayta Dios amistarqan.†
21 Ñöpataqa noqantsikpis llutankunata yarparmi Tayta Diospa contran karqantsik. Jutsantsikkunami paypita rakimashqantsik. 22 Tsaynö kawaykashqami cruzcho Jesucristo wanunqanpita Tayta Dios perdonamashqantsik. Tsaymi paypa ñöpancho jutsaynaq santuna kashun.
23 Ñöpanman chänantsikpäqa Jesucristuman imaypis yärakushun. Alli willakuynincho nimanqantsikta imaypis wiyakushun. Tsay willakuytaqa maytsaychöpis willakuykäyanmi. Tsaynöllami noqapis willakuykä willakuqnin kanäpä Tayta Dios akramashqa kaptin.
Ñakarpis Pablo willakunqan
24 Mana Israel runakunata willakunqäpita ñakatsiyämaptinmi Jesucristo iglesianpä ñakanqankunata cumplï. Paypa iglesianqa cuerpunmi kaykan.† Tsaymi llakikunäpa trokin kushikü. 25 Iglesianta sirvinäpä Tayta Dios churamashqa kaptinmi† qamkunatapis llapan willakuyninta musyaykätsï.
26 Tsay willakuyninta unay runakuna mana musyashqa kayaptinpis kananmi itsanqa Tayta Dios musyatsimashqantsik. 27 Tsaymi musyantsik mana Israel runakunapäpis tsay willakuy pasaypa kushikuypä kanqanta. Tsay willakuymi nin: Jesucristo qamkunachömi kaykan. Payman yärakurmi Tayta Diospa ñöpanman chäyanki.
28 Tsaymi Tayta Dios yachayta qarayämanqanman tupu Jesucristupa willakuyninta llapan runakunata willar shumaq tantiyatsiyä. Tsaynö willakuyä Jesucristuman pïmaypis criyikur Tayta Diospa ñöpanman jutsaynaqna chäyänanpämi. 29 Tsaynö kananpä Jesucristo munayninwan yanapamaptinmi imanö ñakarpis willakur puriykä.