Mikuyta aypuyänanpä akrayanqan
6
Tsay witsanmi discïpulukuna atskaqna kayarqan. Paykunacho muchuq viüdakuna kayaptinmi qoyay qoyay mikuyta aypuyaq. Hebreo parlaq viüdakunata mas yanapayaptinmi griego parlaqkuna quejakurnin niyarqan: “Griego parlaq viüdakunata mana cäsuypami hebreo parlaqkunaqa kikinpuralla mikuyta aypunakuyan”.2 Tsaynö niyaptinmi llapan discïpulukunata qoriykur chunka ishkay apostolkuna niyarqan: “Wawqikuna, manami allitsu kanman Diospa willakuyninta kachaykur viüdakunata atiendir kayaptï. 3 Tsaymi mikuyta aypuyänanpä qamkunapita qanchis wawqikunata akrayänayki. Paykuna kayätsun alli rikashqa runakuna, Espíritu Santupa munaynincho kawaqkuna y alli yarpayyuq runakuna. 4 Tsaynöpami noqakunapa tiempükuna kanqa Tayta Diosta mañakuyänäpä y alli willakuyninta willakuyänäpä”.
5 Tsaynö willanakuskirmi akrayarqan Estebanta, Felipita, Prócoruta, Nicanorta, Timónta, Parmenasta y Antioquía markapita Nicolásta. Estebanqa Tayta Diosman shumaq yärakuq y Espíritu Santupa munaynincho kawaqmi karqan. Nicolásqa Israel runa kananpä unaypitanami cuerpunta señalakushqa karqan. 6 Nirkurmi tsay akrayanqan wawqikunapa umankunaman makinkunata churaykur apostolkuna Tayta Diosta mañakuyarqan.
7 Tsaymi Tayta Diospa willakuyninta willakuyaptin discïpulukuna Jerusaléncho mas atskaqna kayarqan. Tsaynöllami tsay willakuyman atskaq sacerdötikunapis criyikuyarqan.
Estebanta prësu tsariyanqan
8 Runakunapa rikanancho milagrukunata y señalkunataa rurananpämi Estebanta Tayta Dios yanaparqan. 9 Paywanmi Librina niyanqan sinagögacho qorikaq wakin Israel runakuna rimanakur qallaykuyarqan. Tsay runakunami kayarqan Cirene nacionpita, Alejandría markapita, Cilicia provinciapita y Asia provinciapita. 10 Espíritu Santupa munayninwan shumaq tantiyakur parlaptinmi Estebanta upällatsiyta kamäpakuyarqantsu.
11 Tsaymi pakayllapa runakunata pägayarqan Estebanpa contran parlayänanpä. Paykunami niyarqan: “Moiséspa y Tayta Diospa contran Esteban parlaykaqtami wiyayashqä”.
12 Tsaynö niyaptinmi Israel mayor runakuna, ley yachatsikuqkuna y wakin runakunapis pasaypa ajanäyarqan. Tsaymi Estebanta prësu tsariskir Sanedrín juezkuna qorikäyanqanman apayarqan. 13 Tsaychömi manakaqta parlar Estebanpa contran niyarqan: “Kay runaqa sagrädu templuntsikpa y leynintsikpa contranmi imaypis parlan. 14 Tsaynöpis nin Nazaretpita Jesús templuntsikta juchutsinanpä kanqanta y Moisés yachatsinqan costumbrintsikkunata mana cäsukunantsikpä kanqantami”.
15 Tsaycho jamaraykaq juezkunami Estebanpa qaqllanta angelpa qaqllantanö rikayarqan.