3 “Maytsay nación runakunami Jerusalén runakunata chikir contran shäriyanqa. Tsaymi jatunkaray ruminö kayänanpä Jerusalén runakunata churashä. Pipis joqariyta munaqtaqa wanuqpämi ñitinqa”.

4 Tayta Diosmi nin: “Tsay witsanmi soldädukunapa llapan cawallunkunata mantsakätsishä. Muntaq soldädukunatapis löcuyätsishämi. Juklä nación runakunapa cawallunkunatapis qaprayätsishämi. Judá runakunatami itsanqa alli rikashä. 5 Tsaymi Judá soldädukunapa capitanninkunaqa shonqunkunallacho niyanqa: ‘Llapanta mandaq Tayta Diosmi Jerusaléncho taq runakunata imaypis yanapan’.

6 “Tsay witsanmi kamakätsishä Judá soldädukunapa capitanninkuna shanshanö kayänanpä. Tsaymi yantata y trïgu manöjuta nina rupar ushanqannö paykunapis vecïnun nacionkunata itsuqnin kaqlänintapis derëchan kaqlänintapis ushayanqa. Jerusalén runakunanami markankunacho yapay täyanqa. 7 Jerusalénta manarä salvarmi puntataqa Judácho kaykaq wakin marka runakunatarä salvashä. Tsaynöpami Jerusaléncho taqkuna y Davidpita aywaraqkuna runa tukuyanqatsu.

8 “Tsay witsanmi Jerusaléncho taq runakunata pipis atacaptin noqa Tayta Dios yanapashä atacaqninta vincinanpä. Tsaycho taqkuna mayqanpis pishi kallpa kaptinqa rey Davidnö kallpayuq kananpämi yanapashä. Tsaynöllami Davidpita aywaraqta yapay churashä rey kananpä. Pay mandanqa puntanta aywaq ángel mandanqannömi.

9 “Tsay junaqmi mayqan nacionpis Jerusalénta atacaptin tsay atacaq nacionta chipyaq ushakätsishä. 10 Davidpita aywaraqkunata y Jerusaléncho taqkunatami tantiyatsishä kuyapäkuq kayänanpä y imay hörapis mañakayämänanpä. Tuksiyämanqanta^† rikamarmi waqayanqa. Mayor tsurin wanuskiptin waqaqnörämi makintapis takayparä waqayanqa.

11 “Tsay junaqmi Meguido pampacho kaykaq Hadad-rimónpä llakikuyanqannö Jerusaléncho pasaypa llakikuyanqa. 12 Judá runakunaqa pasaypa llakikur ayllunpa ayllunpami waqayanqa. Tsaymi waqayanqa David castapita aywaraqkuna warmintin, Natánpita aywaraqkuna warmintin, 13 Leví trïbupita aywaraqkuna warmintin, Simeipita aywaraqkuna warmintin, 14 y wakin kaq casta kaqkuna warmintin.