Judá runakuna Tayta Dios munanqannö kawayänanpä ninqan
13
“Tsay witsanmi pukyupita pashtamuq yakuwan mayllaqnö Davidpita aywaraqkunapa y Jerusaléncho täkuqkunapa jutsankunata perdonashä”.†2 Llapanta mandaq Tayta Diosmi nin: “Tsay witsanmi kay entëru nacioncho ïdulukunata ushakätsishä. Tsaymi qepa yuriqkuna tsay ïdulukunapa jutinkunatapis musyayanqanatsu. Tsaynöllami llulla profëtakunatapis y llutanta yarpätsiq supaykunatapis ushakätsishä. 3 Noqapa jutïcho pipis llullakur willakuptinqa kikinkunapa taytan y mamanmi niyanqa: ‘¡Qamqa wanunkimi! ¡Kikikipa yarpayllaykipitami Tayta Diospa willakuyninta willakuykanki!’ Tsaynö nirmi llutanta willakuykaqta kikinpa mamanwan taytan tuksiyanqa.
4 “Tsay witsanmi llapan llulla profëtakuna llullakur willakuyanqanpita pasaypa penqakuyanqa. Tsaymi profëtakuna aqshukuyänan qaratsapita rurashqa mantunta imaypis aqshukuyanqanatsu ni profëta tukuyanqanatsu. 5 Tsaypa trokinmi niyanqa: ‘Noqaqa manami profëtatsu kä. Común runalla karmi wamra kanqäpita patsa chakrallacho wiñashqä’. 6 Pipis ‘¿imanirtä cuerpuyki roqushqa kaykan?’a nir tapuptinmi niyanqa: ‘Tsaytaqa amïgükunapa wayincho arurmi malograkushqä’ ”.
7 Llapanta mandaq Tayta Diosmi nin:
“Espäda, üshata mitsinanpä churanqä amïgüpa contran rikakuy.
Üsha mitsiqta wanuskatsiptï üshankuna wakpa kaypami aywakuyanqa.†
Ashkashkunatapis ushakätsishämi.
8 Tsaymi kay nacioncho taqkunaqa pullanpita mas wanuyanqa.
Wakin kaqllanami kawaykar quëdayanqa.
9 Kawaykar quëdaqkunataqa jutsaynaq kayänanpämi purificatsishä.
Qellayta ninawan fundiqnö y qorita ninawan qanranta jipiqnömi paykunata purificashä.†
Paykuna mañakayämaptinmi wiyashä.
Tsaymi nishä: ‘Qamkunaqa kuyanqä wamräkunami kaykäyanki’.†
Paykunanami niyämanqa: ‘Noqakunapa Diosnïqa qammi kaykanki’ ”.