11
¡Líbano nación, punkuykikunata kichay nina yaykur cedru qeruykikunata lunyar ushananpä!2 Ciprés qerukuna, waqayay cedru qerukuna ishkiyanqanpita.
Kuyayllapä cedru qerukuna ushakashqanami kaykäyan.
Basáncho kaykaq encina qerukuna, jatun munti ushakaptin waqayay.†
3 Lloqlluypa lloqlluykaq qewakunapis tsakishqanami kaykäyan.
Tsaymi üsha mitsiqkuna qayarayparä waqaykäyan.
Jordán mayu pampacho muntikunapis ushakashqanami kaykäyan.
Muntikuna manana kaptinmi leonkunapis qayaraykäyan.
Ishkay mitsikuqman tinkutsiypa tantiyatsinqan
4 Tayta Diosnïmi nimarqan: “Pishtaypä kaykaq üshakunata shumaq mitsiy. 5 Üshakunata rantiqkunaqa mana kuyapaypami pishtaykäyan. Rantikuqkunapis niyan: ‘¡Päkillä! ¡Tayta Diospa bendicionninwanmi imaykayuq rikakushqä!’ Üsha mitsiqkunapis manami üshankunata kuyapäyantsu.a
6 “Tsaynö kaptinmi noqapis kay nacioncho taq runakunata kuyapäshätsu. Tsaymi chikiqninkunapa y mandaq reykunapa makinman churashä. Chikiqninkuna kay nacionta ushakätsiptin manami imanöpapis salvashätsu. Noqa Tayta Diosmi tsaynö nï”.
7 Tsaymi üshata rantiq negociantikuna minkakamaptin pishtananpä kaq üshankunata shumaq rikarqä. Rikanäpämi ishkay tukruta ashirqä. Jukaq tukrutami jutitsirqä Alli Kaway jutiyuq kananpä. Jukaq tukrutanami jutitsirqä Jukllatsashqa jutiyuq kananpä. Tsay tukrükunawanmib üshakunata mitsirqä. 8 Makïcho kaykaq kimsaq mitsiqkuna chikimar ajanätsiyämaptinmi juk killallacho paykunata qarqurqä.
9 Tsaymi üshakunata nirqä: “¡Manami qamkunata mitsiyäshaykinatsu! ¡Wanuyaptikipis, wanutsiyäshuptikipis y kikikikunapura wanutsinakuyaptikipis manami imapis qokamanqanatsu!”
10 Tsaynö nirmi Alli Kaway jutitsinqä tukrüta pakirqä. Tsaynö pakirmi musyatsishqä maytsay nación runakunawan ruranqan pactuta Tayta Dios ushakätsinqanta. 11 Tsaymi tsay junaq ushakarqan paykunawan Tayta Dios pactu ruranqan. Pakinqäta rikarmi üshata rantiq negociantikuna tantiyayarqan pactu ruranqanta Tayta Dios ushakätsinqanta.
12 Tsaymi nirqä: “Qamkunapä alli kaptinqa mitsinqäpita pägayämay. Pägayämayta mana munarqa amapis pägayämaytsu”.
Tsaymi mitsinqäpita kimsa chunka (30) qellayta pägayämarqan.
13 Tsaynö pägayämaptinmi Tayta Dios nimarqan: “Mitsinaykipä qamta churaykaptïqa wallkallata pägayäshurniki noqatapis manakaqmanmi churaykäyäman. Arunqaykipita pägayäshunqayki qellaytaqa templucho kaykaq babulman wiñay”.
Tsaymi tsay kimsa chunka (30) qellayta aparkur templucho kaykaq babulman wiñarqä.† 14 Tsaypitanami Jukllatsashqa jutiyuq tukrüta pakiskirqä. Tsaynöpami musyatsirqä Judá runakunawan Israel runakuna chikinakur kawayanqanta.
15 Tsaymi Tayta Dios nimarqan: “Kananqa mana alli mitsikuq runa kanqannö kay. 16 Kananpitaqa kay nacionmanmi juk mitsikuqta churashä oqrakashqatapis mana ashiqta, mallwatapis mana cäsuqta, chakin pakishqatapis mana jampiqta y uyukunatapis alli qewaman mana qatiqta. Shumaq mitsinanpa trokinqa wera werallanta mikurmi shillullantana jaqiykunqa”.†
17 ¡Allaw, mana väliq mitsikuq runa!
Mitsiykanqayki üshata jaqinqaykipita derëcha kaq makikitapis roqur ushatsun.
Derëcha kaq ñawikitapis espädawan oqtiyätsun.
Rikraykipis wanukätsun.
Derëcha kaq ñawikipis qaprayar ama rikatsunnatsu.