Kuyanqan runakunata Tayta Dios salvananpä awninqan
10
Mikuykuna wiñaykäyanqan witsan tamyatsimunanpä Tayta Diosta mañakuyay.Mañakuyaptikiqa illaqukatsimur allimi tamyatsimunqa.
Tsaynöpami chakraykikunacho qewa shumaq wiñamunqa.
2 Ïdulukunapa jutincho willakuqkunaqa llullakuyanmi.
Tsaynöllami adivïnukunapis llullakuyan.
Imapä suëñuyanqanta tapukuyaptinpis llutankunallatami parlayan.
Janan shonqullami kuyapäyanpis.
Tsaynö engañaptinmi runakuna mitsiqniynaq üshakunanö maytsaychöpis mashtakashqa kaykäyan.†
3 Tayta Diosmi nin:
“Kuyanqä runakunapa mandaqninkunawan ajanashqa karmi paykunata pasaypa castigashä.†
Nirkurmi kuyanqä Judá runakunata kikï rikashä.
Yanapaptïmi guërracho guërrata rurananpä allinnin cawallunö kayanqa.
4 “Judá runakunapitami juk alli mandaq shamunqa.
Payqa kanqa cimientucho allinnin kaq ruminö,
tolduta ichïtsinanpä estäcanö
y guërracho pelyananpä flëchanömi.
Tsaynöllami Judá runakunapita wakin mandaqkunapis kayanqa.
5 Paykunami alli chölullantä kayanqa.
Imayka nänicho mituta jaruyanqannömi chikiqninkunata guërracho ushakätsiyanqa.
Yanapaptïmi pelyacho vinciyanqa.
Cawallun muntashqa kaqkunatapis vincirmi penqakuyman churayanqa.
6 “Judá runakunatami shakyätsishä.
Josépita aywaraqkunatamia salvashä.
Paykunata kuyaparmi nacionninman kutitsishä.
Imaypis mana kacharishqanömi kayanqa.
Noqaqa paykunapa Tayta Diosninkunami kaykä.
Mañakayämanqanta imaypis wiyashämi.
7 Efraínb runakunaqa alli chölullantämi kayanqa.
Vïnuta upurkur kushikuqnömi kushishqa kawayanqa.
Kushishqa kaykaqta rikarmi tsurinkunapis kushikuyanqa.
Yanapanqäpita kushikurmi alabayämanqa.
8 “Kuyanqä runakunatami salvashä.
Wichyakur qayarmi mashtakashqa kaykäyanqanpita qorimushä.
Ñöpata mirayanqannömi yupaytapis mana atipaypä mirayanqa.
9 Maytsay markakunaman mashtakätsiptïpis sirviyämänanpämi tantiyakuyanqa.
Karu nacionkunapitami tsurinkunawan kutiyämunqa.
10 Noqami Egiptupita y Asiriapitapis kutitsimushä.
Kutitsimurmi Galaad y Líbano partikunacho täyänanpä churashä.
Tsaycho atskaman mirayaptinmi täyänanpä sitiupis pishinqa.
11 “Imayka lamarcho ölakunanörä ñakaykuna kaptinpis tsayta wiyätsiqnömi yanapashä.
Cargashqa mayunö ñakaykuna kaptinpis añaw kawakuyänanpämi yanapashä.
Asiria runakuna chölu tukuyaptinpis y Egipto runakuna munayyuq kayaptinpis penqakuymanmi churashä.
12 Kuyanqä runakunatami shakyätsishä cäsukamar alli kawayänanpä.
Noqa Tayta Diosmi tsaynö nï”.