Israel nacionpa vecïnun nacionkunapä willanqan
9
Kaychömi qellqaraykan Tayta Diospa willakuynin Hadrac markacho y Damasco markacho taq runakunapä.† Llapan trïbu Israel runakuna imanö kawayanqanta Tayta Dios rikanqannömi Siriacho taq runakunatapis rikaykan. 2 Damascupa lindëruncho taykaq Hamat runakunatapis, Tiro runakunatapis y Sidón runakunatapis mayjina yachaq kayaptinpis paymi juzgananpä rikaykan.†3 Tiro runakunaqa markankunata tsapananpä altu murällatami shäritsiyashqa. Pasaypa imaykayuq kayänanpämi allpatanörä qellayta qoriyashqa y mitutanörä qorita qoriyashqa. 4 Tsaynö kaykaqtami Tayta Dios muchuqyätsinqa. Imaykankunatapis lamarman jitaskirmi markankunata chipyaq rupatsinqa.
5 Tsayta rikarmi Ascalón markacho taqkunaqa pasaypa mantsariyanqa. Gaza runakunapis pasaypa llakikurninmi tsuktsukyäyanqa. Pipis yanapananpä manana kaptinmi Ecrón runakunapis pasaypa llakikuyanqa. Gaza markapa mandaqnintapis wanutsiyanqami. Ascalón markapis tsunyaqmi rikakunqa. 6 Asdod markachöpis jäpa runakunami täyanqa.
Tayta Diosmi nin: “Allish tukuyanqanpitami filisteoa runakunata castigashä.† 7 Yawaryuq aytsata mikuykäyanqantapis shiminpitami qechushä. Ïdulukunapä kankayanqan sacrificiuta mikuykäyaptinmi qechushä.
“Kawaykar quëdaq runakunaqa noqatana sirviyämarmi Judá runakunanöna kayanqa. Ecrón runakunaqa jebuseob runakunanömi kayanqa.
8 “Templüta pipis mana atacananpä kikïmi cuidashä. Kuyanqä runakunata pipis mana ñakatsinanpä kikïmi rikashä”.
Siónman rey chaptin alabayanqan
9 “¡Sión runakuna, pasaypa kushikuyay!
¡Jerusalén runakuna, kushikur cantayay!†
Rikayay mandashuqniki rey shamuykaqta.
Paymi allillata ruraq salvashuqniki kaykan.
Qollmi shonqu karmi ashnun muntashqa shamuykan.
Malta ashnun muntashqami shamuykan.†
10 “Paymi Efraín runakunapa guërra carrëtankunatapis ushakätsinqa.
Jerusaléncho guërrapä kaq cawallukunatapis ushakätsinqami.
Guërrata rurayänanpä flëchankunatapis llapantami ushakätsinqa.
Paymi maytsay nacioncho taq runakunapä alli kawayta apamunqa.
Lamarpa jukaq kuchunpita jukaq kuchunyaqmi kay patsacho taqkunata mandanqa.
Tsaynöpis mandanqa Éufrates mayupita kay patsa kuchunyaqmi.†
11 “Jerusalén runakuna, yawarta jichar pactu ruranqantsikta yarparmi yanapayäshayki.†
Yakuynaq jatun pözuchönö prësu kaykäyanqaykipitami jipiyämushayki.
12 ¡Jäpa nacioncho tarpis kutimuyta yarparqa nacionnikikunaman kutikayämuyna!
Alläpa ñakayanqaykipita ishkay kuti mastami bendicionnïta churamushä.
13 Judá runakuna, flëcha jitakunänömi kayanki.
Efraín runakuna, flëchänömi kayanki.
Sión runakuna, espädänömi kayanki.
Qamkunatami kachayäshayki Grecia runakunata munaynikiman churayänaykipä”.
14 Kuyanqan runakunaman Tayta Dios shamurmi flëchankunatapis illaqukuytanörä contrankunaman jitanqa.
Munayyuq Tayta Diosmi cornëtanta tukar sur kaqläpita shukukuy wayranö shamunqa contrankunata ushakätsinanpä.
15 Kuyanqan runakunatami llapanta mandaq Tayta Dios tsapanqa.
Tsaynö tsapaptinmi warakarpis contrankuna chätsiyanqatsu.
Tsaymi kuyanqan runakuna kushikurnin machashqa runanö büllata rurayanqa.
Chikiqninkunata wanuskatsirmi yawarninwan oqukushqa kayanqa.
Sacrificiupä qorinqan yawar tazoncho junta wiñaraykaqnö y altarpa waqrankunacho yawar pichuraykaqnömi chikiqninkunapa yawarninwan pichushqa kayanqa.
16 Tsay junaqmi kuyanqan runakunata Tayta Dios salvanqa.
Mitsikuq runa üshankunata salvanqannömi paykunatapis salvanqa.
Kuyanqan runakunaqa corönacho kuyayllapä adornunömi nacionninkunacho kayanqa.
17 Täyanqan nacionmi maypis täkuypä y kuyayllapä kanqa.
Trïgupis y mushuq vïnupis atskami kanqa.
Tsaychömi ollqu wamrakunapis y warmi wamrakunapis kuyayllapä wiñayanqa.†