Kuyanqan runakunata yapay alli kawayänanpä Tayta Dios awninqan
8
Llapanta mandaq Tayta Diosmi nimarqan: 2 “Noqa llapanta mandaq Tayta Dios karmi nï: Sióncho taqkunata pasaypami kuyä. Tsaymi chikiqninkunataqa rikaytapis munätsu.3 “Noqa Tayta Diosmi nï: Sión jirkanmanmi kutimushä. Jerusalénchömi täshä. Tsay markataqa cäsukuq marka kanqantami niyanqa. Llapanta mandaq Tayta Dios akranqan sagrädu jirkan kanqantami niyanqa.†
4 “Noqa llapanta mandaq Tayta Dios karmi nï: Jerusalén markapa pläzankunacho awkinkunapis y chakwankunapis yapaymi jamaräyanqa. Paykunaqa pasaypa chachayashqana karmi tukrunkunallawanna puriyanqa. 5 Wamrakunapis atska karmi cällikunacho pukllayanqa.
6 “Noqa llapanta mandaq Tayta Dios karmi nï: Tsaynö kananpä kanqanta mana criyiyaptikipis noqapäqa manami ajatsu kanqa.
7 “Noqa llapanta mandaq Tayta Dios karmi nï: Noqami kuyanqä runakunata jipimushä maytsay nacionman prësu apayashqa kayaptinpis. 8 Paykunataqa Jerusaléncho täyänanpämi maytsaypitapis qorimushä. Paykunami kuyanqä runakuna kayanqa. Noqanami paykunapa Diosninkuna kashä.† Llapan awninqäta cumplirmi paykunata shumaq rikashä.
9 “Noqa llapanta mandaq Tayta Dios karmi nï: Templüpa cimientunta allitsayta qallaykuyanqayki junaqpita patsami profëtakuna willayäshurqayki shäritsir ushayänaykipä kanqanta. Tsaynö kaykaptinqa kushi kushilla aruyay. 10 Templuta shäritsiyta manarä qallaykuyaptikiqa manami qellay kashqatsu aruqkunata pägayänaykipä ni uywapa flëtinta pägayänaykipäpis. Jukniki juknikipis chikinakuyänaykipä kachariptïmi nänipa purirpis mantsa mantsalla puriyarqayki. 11 Kananpitaqa manami tsaynönatsu kawayanki. Noqa llapanta mandaq Tayta Diosmi tsaynö nï. 12 Tsaypa trokinqa llapaykikuna añawnami kawayanki. Üvaykikunapis shumaqnami wayunqa. Chakraykikunacho murukuyanqaykipis allinami wayunqa. Tamyapis tiempullanchömi tamyamunqa. Bendicionnïta churamuptïmi alli kawayanki. 13 Judá runakuna y Israel runakuna, ñöpataqa maytsay nación runakunami niyarqan maldicionashqa kayanqaykita. Tsaynö niyaptinpis noqami salvar bendicionnïta qamkunaman churamushä. ¡Mantsariyänaykipa trokinqa kallpata tsariyay!
14 “Noqa llapanta mandaq Tayta Dios karmi nï: Unay castaykikuna ajanätsiyämaptin castiganäpä ninqänöllami paykunata castigarqä. 15 Qamkunamanmi itsanqa bendicionnïta churamushä. Tsaynö churamushä Jerusaléncho täyaptikipis o Judácho kaykaq wakin markakunacho täyaptikipis. Tsaynö yanapanäpä kaykaptinqa ama mantsariyaytsu. 16 Ama llullapänakuyaytsu. Runakuna alli kawayänanpä shumaq arreglayay. Pïmaywanpis alli kawayay. 17 Jukniki juknikipis mana allita rurayänaykipä ama yarpäyaytsu. Tsaynöpis ama llullakuyaytsu.† Tsaynö kawarqa pasaypami ajanätsiyämanki. Noqa Tayta Diosmi tsaynö nï”.
18 Mastapis llapanta mandaq Tayta Diosmi nimarqan: 19 “Chusku kaq killacho, pitsqa kaq killacho, qanchis kaq killacho, chunka kaq killacho llakikur ayunayänanpaa trokinqa Judá runakuna kushikurnin fiestata rurar alabayämanqa. Tsaynö kananpä kaykaptinqa mana llullapänakuypa allilla kawayätsun”.
20 Noqa llapanta mandaq Tayta Dios karmi nï: Juklä nacionkunapita y juklä markakunapitami Jerusalénman runakuna shayämunqa. 21 Shayämunanpämi juk markaman juk markaman aywar niyanqa: “¡Aywashun Tayta Diosta rugakunantsikpä! ¡Llapanta mandaq Tayta Diosta ashishun!”
Tsaymi wakin runakunapis niyanqa: “¡Noqakunapis aywayäshä!”
22 Tsaynö willanakurmi markankunapita y nacionninkunapitapis llapanta mandaq Tayta Diosta ashir mañakuyänanpä Jerusalénman shayämunqa.
23 Noqa llapanta mandaq Tayta Dios karmi nï: Tsay witsanmi maytsay nacionpita karpis y ima idiömata parlaq karpis chunka runakuna Judá nación runata latsapanpita tsarirkur rugakur niyanqa: “Qamwan aywaytami munayä. Wiyayashqä Tayta Dios qamkunawan kaykanqantami”.