Cada wata ayunar sïguiyänanpä o mana sïguiyänanpäpis tapukuyanqan
7
Rey Darío chusku wata mandaq kaykaptinmi profëta Zacaríasta Tayta Dios yapay parlaparqan. Tsayqa karqan isqun kaq killacho chusku kaq junaqmia. Isqun kaq killapa jutinmi Quisleu karqan. 2 Tsay witsanmi Bet-el runakuna Sarezerta, Regem-melecta y wakin runakunatapis Tayta Diosta rugakuyänanpä kachakuyarqan. 3 Tsaymi llapanta mandaq Tayta Diospa templunman chaykur sacerdötikunata y profëtakunata tapukur niyarqan: “Pitsqa kaq killacho atska watanami waqar ayunayä.b ¿Tsaynöllaku ayunar sïguiyäshä?”4 Tsaynö tapukuyaptinmi willanäpä llapanta mandaq Tayta Dios nimarqan: 5 “Judácho taykaq llapan runakunata y sacerdötikunata niy: ‘Qamkuna qanchis chunka (70) watantin† pitsqa kaq y qanchis kaq killachoc ayunar waqarnin ¿munanqänötsurä ayunayarqayki? 6 Qamkunaqa adorayämanqayki fiestachöpis pachaykikuna juntanallanpämi mikur upur kaykäyanki. 7 Unay castaykikunapis qamkunanö kayanqantami profëtäkunawan willakatsirqä. Tsay witsanmi Jerusalénta manarä ushakätsiptin alli kawayarqan. Ñöpancho kaykaq markakunachöpis juntami runakuna täyarqan. Tsaynöllami Neguev particho y Sefelacho taq runakunapis atskaq taykäyarqan’ ”.
8 Mastami profëta Zacaríasta Tayta Dios nirqan: 9 “Llapanta mandaq Tayta Dios karmi nï: ‘Runa mayikita juzgarqa pitapis mana jananpaypa juzgayay. Jukniki juknikipis kuyanakuyay. 10 Viüdakunata, waktsakunata, juklä nación runakunata ni muchuqkunatapis ama ñakatsiyaytsu. Runa mayikipa contran imatapis ama yarpäyaytsu.†
11 “ ‘Profëtäkunawan willakatsiptïpis unay castaykikunaqa manami cäsukayämarqantsu. Tsaypa trokinqa mana wiyayämänanpämi rinrinkunata tsapakurkur jukläpa tikraräkuyarqan. 12 Imayka diamantinöd chukru kananpämi shonqunkunatapis chukruyätsiyarqan. Tsaynö rurayarqan unay profëtakuna willakuyanqan leynïkunata y yachatsinqäkunata wiyakuyta mana munarmi. Profëtakuna willakuyänanpä Espïritümi tantiyatsirqan. Tsaynö kaykaptinpis mana wiyakuyaptinmi pasaypa ajanarqä. 13 Tsaymi paykuna mana cäsuyämanqannölla noqapis paykunata cäsurqätsu. Llapanta mandaq Tayta Dios karmi tsaynö nï. 14 Tsaymi shukukuy wayra mashtaypa mashtar apanqannöpis mana reqiyanqan nacionkunaman wakpa kaypa paykunata mashtakätsirqä. Ñöpata täyanqan nacionpis tsunyaqman tikrashqa kaptinmi runakuna tsaypa päsayarqannatsu. Tsaymi kuyayllapä nacionnincho pipis täyarqannatsu’ ”.