Chusku carrëtakunata revelacioncho rikanqan
6
Tsaypitanami yapay rikarqä mas juk revelacionta. Tsaychömi rikarqä ishkay jirka puntan chawpinpita chusku carrëtakuna yarqaykäyämuqta. Tsay jirka puntakunaqa broncipitami karqan. 2 Punta yarqamuq carrëtatami qarachäyarqan puka cawallukuna. Tsaypa qepanta yarqamuq carrëtatanami qarachäyarqan yana cawallukuna. 3 Tsaypa qepanta yarqamuq carrëtatami qarachäyarqan yuraq cawallukuna. Ultimu yarqamuq carrëtatanami qarachäyarqan bäyu cawallukuna.†4 Tsaykunata rikarmi parlapaykämaq angelta tapurqä: “Taytay, rikatsimanqayki ¿imatä kaykan?” nir.
5 Tapuptïmi ángel nimarqan: “Tsaykunaqa kaykäyan kay patsata kamaq Tayta Diospa ñöpanpita chuskunläman aywaq wayrakunami.† 6 Yana cawallukunami norti kaqläpa carrëtata qarachaykäyan. Yuraq cawallukunami rupay jeqanan kaqläpa carrëtata qarachaykäyan. Bäyu cawallukunami sur kaqläpa carrëtata qarachaykäyan”.
7 Manarä aywarmi tsay cawallukunaqa entëru kay patsapa juklla cörriyta munar brincaykachaykäyarqan. Tsay cawallukunatami ángel nirqan: “Entëru patsata tumayämuy”.
Tsaymi paykunaqa entëru patsata tumayämurqan.
8 Tsaypitanami ángel qayaykamar nimarqan: “¡Rikay! Norti kaqläpa aywaq cawallukunami castïgüta tsayman chätsiyashqa.a Tsaymi kananqa rabyanaynï qallqushqana”.
9 Tsaypitanami Tayta Dios nimarqan: 10 “Heldai, Tobías y Jedaíasmi Babiloniacho täyanqanpita chäyämushqa. Paykuna apayämunqan qoritawan qellayta mañakuskir tsay junaqlla Sofoníaspa tsurin Josíaspa wayinman ayway. 11 Chaykur apanqayki qellaypita y qoripita corönata ruraskatsir jatitsinki Josadacpa tsurin mandaq sacerdöti Josuéta.
12 “Jatirkatsir ninki: ‘Llapanta mandaq Tayta Diosmi nin: “Kaychömi kaykan Renuevo ninqan runa.† Paymi templüta shäritsinqa. 13 Templüta shäritsiptinmi rey kananpä churayanqa. Trönunman jamaykur mandaptinmi ñöpanman juk sacerdötipis jamakunqa mandashinanpä. Paykunaqa ishkanpis tsay yarpayllami kayanqa. 14 Tsay corönaqa templuchömi churaranqa. Tsayta rikarmi runakuna yarpäyanqa Heldai, Tobías, Jedaías kamaripäkuq kayanqanta y Sofoníaspa tsurin Josías corönata ruranqanta”.
15 “ ‘Tayta Diosnintsikta cäsukuyaptikiqa juk nacionpitami templuta arushiyäshunaykipä runakuna shayämunqa. Ninqänö kamakaptinmi musyayanki qamkunaman llapanta mandaq Tayta Dios kachamanqanta’ ”.