Qellqashqa röllu pajaykaqta revelacioncho rikanqan
5
Tsaypitanami rikarqä juk röllu pajaykaqta.† 2 Tsaymi ángel tapumarqan: “¿Imatatä rikaykanki?” nir.Tsaymi nirqä: “Pajaykaq röllutami rikaykä. Tsay röllupa largun kaykan chunka metru y anchunnami pitsqa metru”.
3 Niptïmi nimarqan: “Tsaychömi qellqaraykan kay patsaman castïgu chämunanpä kanqan. Tsay röllupa jukaq waqtanchömi qellqaraykan suwakuqkuna wanutsishqa kayänanpä kanqan. Jukaq waqtanchönami qellqaraykan jutïcho awnirpis llullakuqkuna wanutsishqa kayänanpä kanqan. 4 Llapanta mandaq Tayta Diosmi nin: ‘Tsay castïgutami kachamushqä suwakunapa wayinman yaykunanpä y jutïcho awnirpis llullakuqkunapa wayinmanpis yaykunanpä.† Tsay castïguwanmi tsaycho taqkuna chipyaq wanuyanqa. Tsaymi ushakanqa wayipa pirqaraykaq ruminkunapis y qerunkunapis’ ”.
Tupucho warmi kaykaqta revelacioncho rikanqan
5 Tsaypitanami noqawan parlaykaq ángel witiykamur nimarqan: “Taqay shamuykaqta rikay”.
6 Rikaykurmi tapurqä: “¿Imatä taqay kaykan?” nir.
Angelnami nimarqan: “Taqayqa kaykan jatun tupumi. Tsaychömi wiñaraykan maytsaycho taq runakunapa jutsankuna”.
7 Tsay jatun tupuqa plömupita rurashqa tsapanawan tsapashqami karqan. Tsapananta kichaskiptinmi rikarqä tupupa rurincho juk warmi jamaraykaqta. 8 Tsaymi ángel nimarqan: “Kay warmiqa runakunapa jutsankunami kaykan”.
Tsaynö nirmi tupuman warmita tsumur plömu tsapanawan yapay tsapaskirqan.
9 Yapay ñukirkunqächömi rikarqä cigüeñapa älantanö älashqa ishkay warmikunata. Tsay älankunata wayra joqariptinmi pajar aywayarqan. Tsaymi tsay tuputa joqarkur altullapa apayarqan. 10 Tsayta rikarmi angelta tapurqä: “¿Maypatä apaykäyan tsay jatun tuputa?” nir.
11 Paynami nimarqan: “Babiloniachömi tsay tupupä templuta ruratsiyanqa. Templuta shäritsiyta ushaskirnami tsayman churayanqa”.