Mushuq templu kuyayllapä kananpä kanqanta willanqan
2
Tsay watallachömi qanchis killa ishkay chunka juk (21) junaqchoa profëta Hageuta Tayta Dios nirqan: 2 “Judápa gobernadornin Zorobabelta, mandaq sacerdöti Josuéta y wakin runakunatapis niy:† 3 ‘Punta kaq templuta rikaqkuna musyayanmi kuyayllapä kanqanta. Kananqa ¿imanötä kaykan? ¿Manaku manakaqman churashqa kaykan?†4 “ ‘Tayta Diosmi nin: ¡Zorobabel, kallpata tsariy! Mandaq sacerdöti Josué, ¡qampis kallpata tsariy! Kay nacioncho taykaqkuna, ¡llapayki kallpata tsariyay! Qamkunawan kaykaptïqa shakyätsinakur llapayki aruyay. 5 Unay castaykikuna Egiptupita yarqayämuptin imaypis yanapanäpämi paykunawan pactuta rurarqä.† Tsaymi qamkunawanpis Espïritü kaykan. Qamkunawan tsaynö kaykaptïqa ama mantsariyaytsu.
6 “ ‘Wallkallanami pishiykan ciëlutapis, kay patsatapis, lamartapis tsuktsukyätsinäpä.† 7 Tsaynöllami llapan nacionkunatapis tsuktsukyätsishä. Tsaynö ruraptïmi imayka riquëzankunatapis kay templuman apayämunqa. Tsaynöpami kay templucho kuyayllapä kaqkunapis junta kanqa. Noqa llapanta mandaq Tayta Diosmi tsaynö nï.
8 “ ‘Noqapami qellaypis, qoripis kaykan. 9 Kanan shäriykätsiyanqayki templuqa punta kaq templupitapis mas kuyayllapämi kanqa. Tsaymi kaycho llapaykikunapis añawna kawayanki. Noqa llapanta mandaq Tayta Diosmi tsaynö nï’ ”.
10 Ishkay wata rey Darío mandaq kaykaptinmi isqun killa ishkay chunka chusku (24) junaqchob profëta Hageo Tayta Diospa willakuyninta willakur nirqan: 11 “Llapanta mandaq Tayta Diosmi nin: ‘Leynïkunapita sacerdötikunata tapur ninki: 12 “Pipis sacrificiuta rupatsinanpä sagrädu aytsata latsapanwan pitushqa apaptin tsay latsapanpa kuchun vïnuta o aceitita o ima mikuytapis töpaptin ¿tsay vïnu, aceiti o ima mikuypis sagrädutsurä kanqa?” ’ ”
Tsaynö tapuptinmi sacerdötikuna “manami” niyarqan.
13 Tsaymi Hageo yapay tapur nirqan: “Juk runa ayata yatanqanpita impüru kaykar† mikuykunata yataptin ¿tsay mikuykunapis impürutsurä kanqa?”
Tsaynö tapuptinmi sacerdötikuna niyarqan: “Aw, impürumi kanqa”.
14 Tsaymi Hageo nirqan: “Tayta Diosmi nin: ‘Tsaynömi kay runakunapis impüru kaykäyan. Tsaymi llapan ruranqankuna y noqapä apayämunqanpis impüru kaykan.
15 “ ‘Templüta manarä shäritsiyta qallaykur ima päsayäshunqaykitapis shumaq tantiyakuyay. 16 Ishkay chunka (20) säcu mikuyta qoriyänaykipä mururpis cosëchachöqa chunka säcullatami qoriyashqayki. Pitsqa chunka (50) uyllu vïnuta jipiyta yarparpis ishkay chunka (20) uyllullatami jipiyashqayki. 17 Usyawan, ranchawan y runtu tamyawanmi llapan murukuyanqaykitapis ushakätsishqä. Tsaynö ruraykaptïpis qamkunaqa manami templüta shäritsiyashqaykitsu.
18 “ ‘Kanan kaykantsik isqun killa ishkay chunka chusku (24) junaqchömi. Kanan junaqmi templupa cimientunkunata allitsayta qallaykuyashqayki. 19 Tsaymi kananpitaqa bendicionnïta llapan aruyanqaykiman churamushä. Tsaynö churamuptïmi tröjaykikunacho mikuynikikunapis ushakanqatsu y üvaykikuna, hïgusnikikuna, granädaykikuna y olïvusnikikunapis shumaq wayunqa’ ”.
Zorobabelpä Tayta Dios ninqan
20 Tsay junaqllami Hageuta Tayta Dios yapay nirqan: 21 “Judápa gobernadornin Zorobabelta willay ciëluta y kay patsatapis tsuktsukyätsimunäpä kanqanta. 22 Reykunatami manakaqman churashä. Munayyuq nacionkunatapis vincishqa kayänanpämi kamakätsishä. Guërra carrëtankunatapis manijaqnintintami kuchpakätsishä. Cawallun muntashqa aywaqkunatapis kikinpura wanutsinakuyänanpämi kamakätsishä. 23 Salatielpa tsurin sirvimaqnï Zorobabel, tsay junaqmi sellakunä sortïjänö kanaykipä churashayki.c Tsaynö kanaykipämi qamta akrashqä. Noqa llapanta mandaq Tayta Diosmi tsaynö nï”.