Hageo
1
Tayta Diospa willakuyninta profëta Hageo willakunqanmi kaycho qellqaraykan. Rey Darío Persia nacioncho mandar ishkay watamanna aywaykaptinmi soqta kaq killa punta kaq junaqcho willakurqan.a Tsay willakunqanmi karqan Judápa gobernadornin Zorobabelpä y mandaq sacerdöti Josuépä. Zorobabelmi Salatielpa tsurin karqan y Josuénami Josadacpa tsurin karqan.†2 Llapanta mandaq Tayta Diosmi Israel runakunata nin: “Qamkunaqa nikäyanki: ‘Tayta Diospa templunta yapay shäritsinantsikpä manarämi tiempu chämunrätsu’ ”.
3 Tsaymi Tayta Diospa willakuyninta profëta Hageo willakur nirqan: 4 “¿Templü juchushqa kaykaqta rikaykarku kuyayllapä wayikikunacho kushishqa taykäyanki?”
5 Llapanta mandaq Tayta Diosmi nin:
“Imanö kawayanqaykitapis shumaq tantiyakuyay.
6 Atskata mururpis wallkallatami cosechaykäyanki.
Atskata mikuyaptikipis pachaykikuna manami juntantsu.
Yakuta upurpis jinallami yakunaykäyanki.
Raktata jatikurpis manami qoñüyankitsu.
Arupakur gänanqaykipis manami aypantsu”.
7 Llapanta mandaq Tayta Diosmi nin:
“Imanö kawayanqaykitapis shumaq tantiyakuyay.
8 Templuta yapay shäritsiyänaykipä muntikunaman aywar qeruta apayämuy.
Templuta shäritsiyaptikiqa kushikushämi.
Tsaychömi kushishqa alabayämanki.
9 “Atskata cosechayta yarparpis wallkallatami qoriyanki.
Wayikikunaman churakuyanqaykitapis juk pükayllami ushakätsï.
Tantiyakuyay imanir tsaynö ruranqätapis.
Tsaynö rurä templü juchutsishqa kaykaqta rikaykarpis kikikikunapa wayillaykipä yarpachakuyaptikimi.
10 Tsaynö kayaptikimi tamyatsimütsu.
Tsaymi chakraykikunacho mikuynikikunapis wayunnatsu.†
11 Pasaypa usya kananpä noqami kamakätsishqä.
Tsaymi trïgupis, üvapis, olïvupis, ni ima mikuypis wayunnatsu.
Uywakunapäpis qewa manami kannatsu.
Runakunapis manakaqllapämi aruyan”.
Templuta shäritsir qallaykuyanqan
12 Profëta Hageo willakunqanta wiyarmi Salatielpa tsurin Zorobabel, Josadacpa tsurin mandaq sacerdöti Josué y llapan runakuna pasaypa mantsarirnin Tayta Dios ninqanta wiyakuyarqan. 13 Tsaymi profëta Hageuwan willakatsir Judá runakunata Tayta Dios nirqan: “Noqaqa yanapanäpä qamkunawanmi kaykä”.
14 Tsaynö nirmi aruyänanpä Tayta Dios shakyätsirqan. Tsaymi Judápa gobernadornin Zorobabel, mandaq sacerdöti Josué y wakin runakunapis llapanta mandaq Tayta Diospa templunta shäritsir qallaykuyarqan.† 15 Arur qallaykuyarqan soqta kaq killa ishkay chunka chusku (24) junaqchömi.b Tsayqa karqan rey Darío ishkay wata mandaq kaykaptinmi.†