3 Tsaynö niptinmi Jonásqa qeshpir Jope markaman aywakurqan. Tsaychömi Tarsis markaman büqui yarqunanpäna kaykaqta tarirqan. Tsaymi Tayta Diospita qeshpiyta yarpar pasäjita jinan höra rantiskir tsay büquiwan Tarsisman aywakurqan.

4 Tsay büquiwan aywaykaptinmi Tayta Dios pasaypa wayratsimurqan. Tsaymi yaku junishparä pasaypa pulchaqyaptin büquipis pakikänanpäna kaykarqan. 5 Tsaymi büqui manijaqkuna pasaypa mantsarirnin juknin juknin diosninkunata mañakuyarqan. Nirkurmi büqui mana jundikänanpä apayanqan bultunkunata lamarman jitariyarqan.

Tsayyaqnami büqui rurin kaq cuartucho Jonás pasaypa punukashqa kaykarqan. 6 Büqui manijaqkunapa capitanninmi rikchatsir nirqan: “¡Punuy siki! ¡Imanirtä kushishqa punur kaykanki! Shärir diosnikita mañakuy. Capazchi salvamashwanpis kaycho mana ushakänantsikpä”.

7 Tsaypitanami büqui manijaqkuna willanakur niyarqan: “Kaynö ñakanantsikpä pï jutsayuq kanqantapis musyanantsikpä suertita jitashun”.

Tsaynö suertita jitayaptinmi Jonáspä suerti yarqamurqan.

8 Tsaymi Jonásta tapur niyarqan: “Taytay, willayämay. ¿Imatatä rurashqayki kaynö ñakanantsikpä? ¿Imachötä arunki? ¿Maypitatä shamushqayki? ¿May runatä kanki? ¿Mayqan castatä kanki?” nir.

9 Jonásnami nirqan: “Noqaqa hebreo casta runami kä. Ciëlucho kaykaq Tayta Diospita mantsapakurmi payta sirvï. Paymi lamartapis kay patsatapis kamashqa”.

10 Tsaynö niptinmi büquicho aruqkuna pasaypa mantsakar niyarqan: “¡Imanirtä Tayta Diosta cäsukushqaykitsu!”

Tsaynö niyarqan Tayta Diospita qeshpiykanqanta willashqa kaptinmi. 11 Mas peorrä yaku pulchaqyaptinmi tapur niyarqan: “Kanan ¿imatatä rurashun yaku wiyänanpä?”

12 Jonásnami nirqan: “Lamarman jitarpayämay pulchaqyanqanpita yaku wiyänanpä. Noqami jutsayuq kaykä kayjinanpa lamar pulchaqyänanpä”.

13 Tsaynö niptinpis büqui manijaqkuna imaykanöpapis lamar kuchunmanmi büquita kutitsiyta munayarqan. Pasaypa wayraptinmi kutitsiyta munarpis kamäpakuyarqantsu.

14 Tsaymi Tayta Diosta mañakur niyarqan: “Taytay, qam munaptikimi llapan kaykuna päsaykan. Kay runapa jutsankunapita ama ushakaykatsiyällämaytsu. Lamarman jitaskiyaptï jutsan mana kaykaptinqa noqakunata ama jitapaykayällämaytsu”.

15 Tsaynö mañakuskir Jonásta jitarpuyaptinmi pasaypa pulchaqyaykanqancho lamar wiyakaskirqan.

16 Tsaynö wiyakaskiptinmi Tayta Dios munayyuq kanqanta tantiyaskir büqui manijaqkuna pasaypa mantsakäyarqan. Tsaymi sacrificiuta rupatsir awniyarqan payta sirviyänanpä.

17 (2.1) Jonásta ultakurkunanpämi Tayta Dios shuyaraykätsirqan jatunkaray pescäduta. Ultakurkuptinmi pescädupa pachancho kimsa paqas kimsa junaq karqan.^†