3 Nirkurnami eunucukunapa mandaqnin Aspenazta Nabucodonosor nirqan prësu apayämunqan wakin Israel chölukunata palaciuman pushananpä. Wakin chölukunaqa reypa castanmi kayarqan y wakinnami Israelcho imaykayuq runakunapa castan kayarqan.^† 4 Tsay akrayanqan chölukunami kayarqan sänu, kuyayllapä, shumaq tantiyakuq, yachatsiptin juklla yachakuq y alli yachaq. Tsaymi paykuna alli kayarqan reypa palaciuncho sirviyänanpä, Babilonia^a runakuna qellqayanqankunata estudiayänanpä y parlayanqan idiömata yachakuyänanpä.

5 Rey Nabucodonosormi ordenarqan palaciucho kusinakuyanqan mikuykunata tsay chölukuna qoyay qoyay mikuyänanpä y vïnuta upuyänanpä. Tsaynöllami ordenarqan kimsa wata shumaq yachakuskir palaciucho payta sirviyänanpä.

6 Tsay akranqan chölukunawanmi Daniel, Ananías, Misael y Azarías kayarqan. Paykunaqa Judápitami kayarqan. 7 Paykunapa jutinta Aspenaz trukatsirmi Danielpa jutinta trukatsirqan Beltsasar kananpä, Ananíaspa jutinta trukatsirqan Sadrac kananpä, Misaelpa jutinta trukatsirqan Mesac kananpä y Azaríaspa jutintana trukatsirqan Abed-nego kananpä.

8 Danielmi impüru kayta mana munar yarpachakurqan reypa mikuyninta mana mikunanpä y vïnuntapis mana upunanpä. Tsaymi Aspenazta rugarqan tsay mikuykunata mana qarananpä. 9 Tayta Dios yanapaptinmi Danielqa Aspenazwan yachanänakuyarqan. 10 Tsaynö rugaptinmi Aspenaz nirqan: “Itsanqa reypitami mantsapakü. Paymi nimashqa qamkunata alli mikuyta y alli vïnuta qaranäpä. Wakin chölukuna wera kaykaqta rikarnin uyuta rikaykuyäshurniki wanutsimanqachi”.

11 Tsaynö niptinmi cuidaqnin runatana Daniel rugakurqan. Tsay runatami mandaq Aspenaz churarqan Danielta, Ananíasta, Misaelta y Azaríasta cuidananpä. Rugakurmi Daniel nirqan: 12 “Taytay, rugakulläshayki. Verdürallata y yakullata chunka junaq qaraykayällämay. 13 Tsay chunka junaq päsaskiptin reypa mikuyninta mikuq chölukunaman tinkutsiyämay imanö kaykäyanqätapis rikayämänaykipä. Paykunapita mas alli kayaptïqa mañakuyanqänölla qarayämay”.

14 Tsaymi cuidaq runa awnirnin mañakuyanqannölla chunka junaq qararqan. 15 Chunka junaq cumpliskiptinnami rey kamaripanqan mikuyta mikuqkunapitapis mas sänu kayarqan. 16 Tsaymi chölukunata cuidaq runaqa reypa mikuyninta y vïnuntapis tsay chölukunata qararqantsu. Tsaypa trokinqa verdürallatanami qararqan.

17 Tsay chuskun chölukunata Tayta Dios yachayta qormi yanaparqan Babilonia runakuna qellqayanqan röllukunata liyiyänanpä y yachatsinqankunata shumaq yachakuyänanpä. Tsaynöpis Danieltami yanaparqan pipis revelación chaskinqanta tantiyananpä y runakuna imapä suëñuyanqantapis musyananpä.

18 Rey Nabucodonosor ninqannö kimsa wata yacharkatsirnami reypa ñöpanman tsay chölukunata Aspenaz pusharqan. 19 Danielwan, Ananíaswan, Misaelwan y Azaríaswan parlaskirnami rey tantiyarqan llapan chölukunapitapis mas yachaq kayanqanta. Tsaymi paykunata churarqan yanapaqnin kayänanpä. 20 Mayjina aja kaqkunata rey tapuptinmi maytsaycho brüjukunapita y suerti qatiqkunapitapis chunka kuti mas tantiyayarqan. 21 Tsaynöpami Danielqa Babiloniacho tarqan rey Ciro punta kaq wata mandanqan witsanyaq.