12
Chölullarä kanqaykiyaq kamamaqnintsik Tayta Dios munanqannö kawanaykipä yarpachakuy. Awkinyarnaqa manami payta shumaq sirviyta kamäpakunkinatsu. Kawarpis llakikullarnami kawanki. 2 Tsaynö kaykaptinqa rupayta, killata, qoyllurkunata y ima atsikyaqtapis rikayta puëdinqaykiyaq y ñawikipis manarä tsakanqanyaq Tayta Diosta sirviy.3 Awkinyaptikiqa llapan cuerpuykimi tsuktsukyanqa.
Chankaykipis karkaryanqami.
Kiruykipis ushakanqami.
Ñawikipis tsakanqanami.
4 Cällicho jalaläyaptinpis manami wiyankinatsu.
Mulinu taqraranqantapis manami wiyankinatsu.
Pishqukuna cantayanqantapis manami wiyankinatsu.
5 Witsaypa aywaytapis manami valurankinatsu.
Nänikunapa aywarpis ishkinankinami.
Almendru jacha waytaraykaqnömi aqtsaykipis soquyanqa.
Chukllush purinqannömi purinkipis.
Majaykitapis manami munapankinatsu.
Wanukurqa imaypis mana kutimuqnami aywakunki.
Cällichömi qorikäyanqa waqaraykar pampaq apayäshunaykipäpis.
6 Tsaynö kaykaptinqa qellay cadënayki manarä rachinqanyaq,
qori mankayki manarä pakinqanyaq,
uylluyki pözu kuchuncho manarä pakinqanyaq
y pözupita yakuta jipinaykipä waska manarä rachikanqanyaq Tayta Diosta sirvinki.a
7 Allpallapita rurashqa karmi cuerpuntsik yapay allpaman tikranqa.
Tayta Dios qaramanqantsik almantsikmi itsanqa pay kaqman kutinqa.
8 Noqa yachatsikuqmi nï:
“¡Imaykapis ushakaqllami kaykan!
¡Kay patsacho päsanqankuna imanir y imapä kanqantapis manami tantiyayta puëdintsiktsu!”
Libru ushanan
9 Kay libruta qellqaq runaqa qoyay qoyay mas yachaq tikrarmi runakunata yachanqanman yachatsirqan. Willakuyanqan proverbiukunatab qoriykurmi atskata qellqarqan. Tsaynöllami atska proverbiukunata kikinpa yarpayllanpitapis qellqarqan. 10 Palabrakunata shumaq kamakätsirmi llapanta qellqarqan. Tsay qellqanqankunaqa llapanpis rasun kaqllami kaykan.
11 Wirukuna qerunö y firmi jawiraq estäcanömi yachaqkuna yätsinqankunaqa kaykan. Tsaynö yätsinanpä Tayta Diosmi tantiyatsin. Payqa alli mitsikuqmi kaykan.
12 Hïju, juk libruta liyir paqtä kaycho qellqaraykanqanpita mas juk yachatsikuyta chaskinkiman. Runakunaqa atska librukunatami qellqayan. Alläpa estudiaypis ajayätsikunmi.
13 Kay llapan yachatsikuyta wiyar tantiyakunki Tayta Diospita mantsapakur mandamientunkunata cumplinaykipä kanqanta. Tsaypämi kay patsacho runa kawan.
14 Tayta Diosqa imanöpis kawanqantsikman tupumi juzgamäshun. Pakayllapa ruranqantsikpitapis juzgamäshunmi.